- వీటి నుంచి విచ్చలవిడిగా నల్లని పొగ, దుమ్ము
- పట్టించుకోని పొల్యూషన్కంట్రోల్ బోర్డు
మందమర్రి, వెలుగు: మంచిర్యాల జిల్లా మందమర్రి మండలంలో ఫ్యాక్టరీల నుంచి వచ్చే దుమ్ము, ధూళి, పొగతో పత్తిపంటపై తీవ్ర ప్రభావం పడుతోంది. చెట్ల ఆకుల మీద దుమ్ము, పొగ, కెమికల్స్ తెల్లటి పూత పూసినట్లు పేరుకుపోతున్నాయి. మంచిర్యాల-– చంద్రాపూర్(మహారాష్ట్ర) నేషనల్ హైవే 363కు ఇరువైపులా పులిమడుగు నుంచి అందుగులపేట, ఊరుమందమర్రి వరకున్న సిరామిక్స్ కంపెనీలు, రైస్మిల్స్, వెస్ట్ పేపర్మిల్ నుంచి వెలువడే కెమికల్స్ పొగతోపాటు నిర్మాణంలో ఉన్న నేషనల్ హైవే నుంచి నిత్యం వెలువడుతున్న దుమ్ము, ధూళి పత్తితో పాటు చెట్ల ఆకులపై పేరుకుపోతోంది.
దీంతో పత్తి చేన్లు తెల్లరంగులోకి మారుతున్నాయి. సిరామిక్స్ కంపెనీల నుంచి చెడువాసనతో కూడిన నల్లని పొగ, దుమ్ము కారణంగా పత్తితోపాటు ఇతర పంటలకు నష్టం జరుగుతోందని రైతులు చెబుతున్నారు. కాలుష్యం వెదజల్లుతున్న ఫ్యాక్టరీలపై చర్యలు తీసుకోవాలని ఎన్ని సార్లు పొల్యూషన్ కంట్రోల్ బోర్డు ఆఫీసర్లకు ఫిర్యాదు చేసినా పట్టించుకోవడం లేదని రైతులు ఆవేదన వ్యక్తం చేస్తున్నారు. రంగు మారిన పత్తిని మార్కెట్లో అమ్ముకోవడం కష్టంగా ఉందని వాపోతున్నారు. ఇప్పటికైనా కాలుష్య ఫ్యాక్టరీలపై చర్యలు తీసుకోవాలని కోరుతున్నారు.
