ఢిల్లీ : దేశ రాజధాని ఢిల్లీని భూకంపం వణికించింది. సుమారు రెండు నిమిషాల పాటు ప్రకంపనలు రావడంతో జనం భయాందోళనలకు గురయ్యారు. ఈ ప్రకంపనలకు ఇండ్లల్లో వస్తువులు కిందపడడం, ఫ్యాన్లు ఊగడంతో బయటకు పరుగులు పెట్టారు. భారీ భవంతుల్లో నివసించే వారు పిల్లాపాపలను ఎత్తుకుని ఆరుబయట ప్రాంతాలకు చేరుకున్నారు. ఉన్నట్టుండి అపార్ట్మెంట్ఊగడంతో ఉరుకులుపరుగులు పెడుతూ పదకొండు అంతస్తుల మెట్లు దిగానని ఓ యువతి ట్విట్టర్ లో ఫొటోలు షేర్ చేసింది. ఢిల్లీతో పాటు ఉత్తరాది రాష్ట్రాలలో ప్రకంపనలు చోటుచేసుకున్నాయని సమాచారం. ట్విట్టర్ లో ఎర్త్ క్వేక్ యాష్ ట్యాగ్ వైరల్ అయింది. తమ ఏరియాలోని పరిస్థితిని ఫొటోల ద్వారా షేర్ చేసుకోవడం మొదలుపెట్టారు.
కాగజ్నగర్లో కూడా..
కుమ్రంభీం ఆసిఫాబాద్‌ జిల్లా బెజ్జూర్‌, కౌటాల, చింతలమానెపల్లి మండలాల్లో మంగళవారం ఉదయం 8:40 గంటలకు భూమి స్వల్పంగా కంపించింది. చిన్న శబ్దంతో కుదుపునకు గురైంది. దీంతో జనం భయాందోళనకు గురయ్యారు. భూకంప తీవ్రత రిక్టర్ స్కేల్ పై 4.4 గా నమోదైంది. సిర్పూర్ టీ కి 8 కిలోమీటర్ల దూరంలో భూకంపం నమోదైంది.
