పునాస దిగుబడులపై  వానల ఎఫెక్ట్

V6 Velugu Posted on Sep 21, 2021

  • ఈసారి  1.09 కోట్ల టన్నుల ఆహార ధాన్యాల ఉత్పత్తి

హైదరాబాద్, వెలుగు: ఈసారి ఖరీఫ్ ​ఆహార ధాన్యాల ఉత్పత్తి కోటి 9 లక్షల​టన్నులు రానుంది. వరి ఉత్పత్తి సర్కార్​ అనుకున్న లక్ష్యాన్ని మించుతోంది. ఇక పప్పులు నామమాత్రంగానే ఉత్పత్తి అంచనా వేశారు. మొత్తం ఫుడ్ గ్రెయిన్స్​ ప్రొడక్షన్​లో 5.80 లక్షల​ టన్నులు మాత్రమే పప్పు పంటల ఉత్పత్తి ఉంది. 2020–21 వానాకాలం పంట ఉత్పత్తుల ఫస్ట్ అడ్వాన్స్ ఎస్టిమేట్స్​రిపోర్ట్​ను ఎకనామిక్స్ అండ్ స్టాటిస్టిక్స్​ సోమవారం ప్రభుత్వానికి నివేదించింది. మొత్తం ఫుడ్​ గ్రెయిన్స్​లో బియ్యం మేజర్ షేర్ ఉండగా మొక్కజొన్న, జొన్నలు, కందులు, పెసలు అంతంత మాత్రంగానే ఉత్పత్తి వస్తున్నట్లు అంచనా వేశారు. ఇక పత్తి టార్గెట్ కంటే చాలా తగ్గుతోంది. ఈసారి 49.68 లక్షల బేళ్లు పత్తి ఉత్పత్తి వస్తుందని పేర్కొన్నారు. ఈసారి ఖరీఫ్​ పంటలకు వర్షాల దెబ్బ గట్టిగా పడింది. దీంతో దిగుబడులు చాలా తగ్గి, ఉత్పత్తిపై ఎఫెక్ట్​ పడినట్లు ఆఫీసర్లు చెప్తున్నారు. ఆహార ధాన్యాల్లో అత్యంత కీలకమైన వరి సర్కార్ అంచనాలను తలకిందులు చేసింది. సాగు విస్తీర్ణం ప్రభుత్వం అనుకున్న దానికంటే 13 లక్షల ఎకరాలు అధికంగా సాగైంది.
వడ్లు కోటి 38 లక్షల మెట్రిక్​ టన్నులు
ఈ ఖరీఫ్​లో 41.85 లక్షల ఎకరాలు వరి సాగవుతుందని వ్యవసాయ శాఖ లక్ష్యంగా పెట్టుకుంది. ఎకరాకు 29 క్వింటాళ్ల దిగుబడి వస్తుందని సీజన్ మొదలు కంటే ముందు అంచనా వేశారు. ఈ లెక్కన కోటి 17 లక్షల​ టన్నుల ఉత్పత్తి వస్తుందనుకున్నారు. అయితే సీజన్ ప్రారంభం నుంచి ఇప్పటివరకు వరుస వర్షాలు, వరదలు పంటపై ఎఫెక్ట్​ చూపెట్టాయి. దీంతో అది 26.50  క్వింటాళ్ల వరకే పరిమితమైంది. అంటే రెండున్నర క్వింటాళ్లు తగ్గింది. అయినా సాగు విస్తీర్ణం పెరగడంతో వరి ఉత్పత్తి కోటి 38 లక్షల మెట్రిక్​వస్తుందని అంచనా వేశారు. పంట చేతికొచ్చే సరికి వాతావరణ పరిస్థితులు మారితే ఇది కొంత తగ్గే అవకాశముందని ఆఫీసర్లు చెప్తున్నారు. జొన్నలు 22 వేల మెట్రిక్​ టన్నులు, మొక్కజొన్న 11.37 లక్షల​ టన్నుల ఉత్పత్తి వస్తుందని అంచనా వేశారు. వరిపై సర్కార్ యూటర్న్ తీసుకోవడంతో జొన్నలు, మొక్కజొన్న కొనుగోళ్లపై ఏం నిర్ణయం తీసుకుంటుందోనన్న ఆందోళన రైతుల్లో నెలకొంది.
పత్తి తగ్గుతోంది..
పత్తి సర్కార్​లక్ష్యాలను తలకిందులు చేసింది. ఈ ఖరీఫ్​లో 70 లక్షల ఎకరాల్లో పత్తి సాగు కావాలని లక్ష్యంగా పెట్టుకుంది. అయితే 51.04 లక్షల ఎకరాలకే పరిమితమైంది. దీంతో ఉత్పత్తి 69.46 లక్షల బేళ్లు వస్తుందని ఫస్ట్​అడ్వాన్స్ ఎస్టిమేట్స్​ రిపోర్ట్​లో పేర్కొన్నారు. అనుకున్న లక్ష్యంలో 30 శాతం తగ్గుతోందని ఆఫీసర్లు తెలిపారు. ఇక సోయాబీన్​ 2.43 లక్షల టన్నులు, వేరుశనగ 24 వేల టన్నులు, పసుపు 2.45 లక్షల టన్నులు ఉత్పత్తి అంచనా వేశారు.

పప్పుల ఉత్పత్తి అంతంతే
పప్పు పంటల ఉత్పత్తి తక్కువగా ఉన్నట్లు రిపోర్ట్​లో పేర్కొన్నారు. సీజన్​ కంటే ముందు కందుల ఉత్పత్తి ఎక్కువగా వస్తుందనుకున్నప్పటికీ సాగు లక్ష్యాన్ని చేరలేదు. దీంతో ప్రొడక్షన్ తగ్గింది. మొత్తం పప్పు పంటల ఉత్పత్తి  5.80 లక్షల​ టన్నులు అంచనా వేశారు. ఇందులో కందుల ఉత్పత్తి 5.32 లక్షల టన్నులుగా ఉంది.  పెసలు 32 వేల టన్నులు, మినుములు 16 వేల టన్నులు ఉత్పతి  వస్తుందని అంచనా వేశారు.

Tagged crops, Effect, rain,

Latest Videos

Subscribe Now

More News