న్యూఢిల్లీ: ఎన్నో ఏండ్ల నిరీక్షణకు తెరదించుతూ భారత మహిళల క్రికెట్ జట్టుకు వన్డే వరల్డ్ కప్ అందించిన టీమిండియా కెప్టెన్ హర్మన్ ప్రీత్ కౌర్కు ఒకింత నిరాశ ఎదురైంది. ఐసీసీ ప్రకటించిన ఉమెన్స్ వరల్డ్ కప్-2025 టీమ్ ఆఫ్ ది టోర్నీలో హర్మన్కు చోటు దక్కలేదు. భారత్ను విశ్వవిజేతగా నిలిపిన హర్మన్ను టీమ్ ఆఫ్ ది టోర్నీకి ఐసీసీ ఎంపిక చేయలేదు. కాగా, ఈ మెగా టోర్నీలో హర్మన్ అంచనాల మేర రాణించలేదు.
సెమీస్‌లో బలమైన ప్రత్యర్థి ఆస్ట్రేలియాపై భారీ లక్ష్య ఛేదనలో కెప్టెన్ ఇన్నింగ్స్‌ (89) తప్పా.. తన స్థాయికి తగ్గ ప్రదర్శన చేయలేదు హర్మన్. వరల్డ్ కప్లో వరుసగా మూడు మ్యాచుల ఓటమి పాలుకావడంతో ఇండియా సెమీస్కు వెళ్లడం క్లిష్టంగా మారింది. దీంతో హర్మన్ కెప్టెన్సీపైన విమర్శలు వచ్చాయి. కానీ చివరకు ఇండియాను టోర్నీ విజేతగా నిలిపి విమర్శల చేత ప్రశంసలు అందుకుంది టీమిండియా కెప్టెన్.
కాగా, ఉమెన్స్ వరల్డ్ కప్-2025 టీమ్ ఆఫ్ ది టోర్నీని ఐసీసీ మంగళవారం (నవంబర్ 4) ప్రకటించింది. ఐసీసీ ప్రకటించిన ఈ జట్టులో టోర్నీ విజేత భారత్ నుంచి ముగ్గురికి చోటు దక్కింది. అద్భుత ప్రదర్శనతో ఆకట్టుకున్న స్టార్ ప్లేయర్స్ స్మృతి మందనా, జెమీమా రోడ్రిగ్స్, దీప్తి శర్మ భారత్ నుంచి ఐసీసీ టీమ్ ఆఫ్ ది టోర్నీకి ఎంపికయ్యారు. దక్షిణాఫ్రికా సారథి లారా వోల్వార్డ్‌ ఐసీసీ టీమ్ ఆఫ్ ది టోర్నీ కెప్టెన్గా ఎంపికైంది.
ఐసీసీ జట్టులో ఇండియా, దక్షిణాఫ్రికా, ఆస్ట్రేలియా జట్ల నుంచి ముగ్గురి చొప్పున ఎంపికయ్యారు. పాకిస్తాన్, ఇంగ్లాండ్ టీముల నుంచి ఒక్కొక్కరికి చోటు దక్కింది. 12వ ప్లేయర్గా ఇంగ్లాండ్ క్రీడాకారిణి నాట్ స్కైవర్‌ బ్రంట్ సెలెక్ట్ అయ్యింది. కాగా, స్వదేశంలో జరిగిన ఉమెన్స్ వన్డే వరల్డ్ కప్లో భారత మహిళల జట్టు విశ్వవిజేతగా నిలిచిన విషయం తెలిసిందే. ఫైనల్లో సౌతాఫ్రికాను మట్టికరిపించి.. తొలి ఐసీసీ వరల్డ్ కప్ కలను సాకారం చేసుకున్నారు ఇండియా అమ్మాయిలు.
ఐసీసీ మహిళల ప్రపంచ కప్ 2025 జట్టు:
స్మృతి మంధాన (భారత్), లారా వోల్వార్డ్ట్ (సి) (దక్షిణాఫ్రికా), జెమిమా రోడ్రిగ్స్ (భారత్), మారిజానే కాప్ (దక్షిణాఫ్రికా), ఆష్లీ గార్డనర్ (ఆస్ట్రేలియా), దీప్తి శర్మ (భారత్), అన్నాబెల్ సదర్లాండ్ (ఆస్ట్రేలియా), నాడిన్ డి క్లర్క్ (దక్షిణాఫ్రికా), సిద్రా నవాజ్ (WK) (పాకిస్తాన్), అలనా కింగ్ (ఆస్ట్రేలియా), సోఫీ ఎక్లెస్టోన్ (ఇంగ్లాండ్), 12వ ప్లేయర్ నాట్ స్కైవర్‌ బ్రంట్ (ఇంగ్లండ్‌)
