- ఖమ్మం జిల్లాలో గతేడాదితో పోల్చితే ఈసారి పెరిగిన విద్యుత్ వినియోగం
- మార్చి రెండో వారంలోనే ముదిరిన ఎండలు
- ఫ్యాన్లు, ఏసీ, కూలర్లు వాడక తప్పట్లేదంటున్న జనం
ఖమ్మం, వెలుగు : ఖమ్మం జిల్లాలో విద్యుత్ వినియోగం పెరిగింది. మార్చి రెండో వారంలోనే ఎండలు మండుతున్నాయి. దీంతో ఇండ్లలోఫ్యాన్లు, కూలర్లు, ఏసీల వాడకుండా ఉండలేని పరిస్థితి నెలకొంది. వ్యవసాయానికి బోర్లు, బావుల్లో మోటార్ల వాడకం కూడా పెరిగింది. గతేడాదిలో మార్చి నెలతో పోల్చితే ఈ సారి రోజుకు 35 మిలియన్యూనిట్ల విద్యుత్ అదనంగా వాడుతున్నట్లు అధికారులు చెబుతున్నారు.
40.5 డిగ్రీల టెపరేచర్..
ఖమ్మం జిల్లాలోబుధవారం అత్యధికంగా కొణిజర్ల మండలం గుబ్బగుర్తిలో 40.5 డిగ్రీలు, తిరుమలాయపాలెం మండలం కాకరవాయి, బచ్చోడులో 40.4 డిగ్రీల ఉష్ణోగ్రత నమోదైంది. మిగతా అన్ని చోట్ల 37 నుంచి 40 డిగ్రీల వరకు టెంపరేచర్ఉంటోంది. అయితే పెరుగుతున్న ఉష్ణోగ్రతకు తోడు, వాతావరణంలో తేమ శాతం తగ్గడంతో మరింత ఉక్కపోతగా అనిపిస్తోంది. భూగర్భ జలాలు తగ్గడం, చెరువులల్లో నీళ్లు లేకపోవడం లాంటి కారణాలు ఉక్కపోతకు కారణంగా తెలుస్తున్నాయి.
ఉదయం 8 గంటల నుంచి సాయంత్రం 4 గంటల వరకు ఎండ తీవ్రంగా కొడుతోంది. దీంతో గతేడాది మార్చిలో రోజుకు 7.10 నుంచి 7.40 మిలియన్ యూనిట్ల విద్యుత్ వాడకం ఉండగా, ఈసారి మాత్రం 7.50 నుంచి 7.95 మిలియన్ యూనిట్లకు పెరిగిందని రికార్డులు చెబుతున్నాయి. ఇక గత వారం రోజుల నుంచి మధ్యాహ్నం 3 గంటల సమయంలో విద్యుత్ డిమాండ్ పీక్ స్టేజికి చేరుతుందని ఆఫీసర్లు చెబుతున్నారు.
చెట్ల కింద సేద తీరుతున్రు..
ఎండల కారణంగా స్కూళ్లు, కాలేజీలకు వెళ్లే విద్యార్థులు, వ్యవసాయ పనులకు వెళ్లే కూలీలు ఇబ్బంది పడుతున్నారు. ఇంటర్ స్టూడెంట్స్ పరీక్షలు జరుగుతుండడంతో మధ్యాహ్నం ఎగ్జామ్ సెంటర్ల నుంచి ఇళ్లకు వచ్చేందుకు తిప్పలు పడుతున్నారు. రోడ్ల వెంబడి చెట్ల నీడకు సేదదీరుతున్నారు.
