- వాపస్కు బీఆర్ఎస్లో డోర్లు క్లోజ్
- నిరాశలో తాటికొండ అనుచరులు
జనగామ, వెలుగు: స్టేషన్ ఘన్పూర్మాజీ ఎమ్మెల్యే తాటికొండ రాజయ్య ఒంటరయ్యారు. బీఆర్ఎస్లో తనకు గుర్తింపు లేదంటూ కారు దిగిన ఆయనకు కాంగ్రెస్లో దారులు మూసుకపోయాయి. దీంతో రాజయ్య ఆయన అనుచరులు అయోమయంలో పడిపోయారు. స్టేషన్ఘన్పూర్ ఎమ్మెల్యే, తన చిరకాల ప్రత్యర్థి కడియం శ్రీహరితో వేగలేక రెండు నెలల క్రితం ఫిబ్రవరి 3న రాజయ్య బీఆర్ఎస్కు రాజీనామా చేశారు. ఈ సందర్భంగా కేసీఆర్ పై పలు ఆరోపణలు చేశారు. ఆత్మాభిమానం చంపుకోలేక పార్టీని వీడినట్లు భావోద్వేగంతో చెప్పారు. ఆ తర్వాత కాంగ్రెస్ లో చేరేందుకు రాజయ్య చేయని ప్రయత్నం లేదు. రాష్ట్రంలోని మంత్రులు మొదలుకొని సీఎం రేవంత్ రెడ్డి, రాష్ట్ర వ్యవహారాల ఇన్చార్జి దీపాదాస్ మున్షీ, ఏఐసీసీ అధ్యక్షుడు మల్లికార్జున ఖర్గే వరకు అందరినీ పలుమార్లు కలిశారు. వరంగల్ ఎంపీ టికెట్ లక్ష్యంగా పావులు కదిపారు. టికెట్ సంగతి దేవుడెరుగు కనీసం పార్టీలో చేర్చుకునేందుకు కూడా కాంగ్రెస్ గ్రీన్సిగ్నల్ఇవ్వలేదు. బీఆర్ఎస్ కు రాజీనామా చేసి రెండు నెలలైనా ఏ పార్టీలో చేరలేదు. వరుసగా నాలుగుసార్లు ఎమ్మెల్యేగా గెలిచి, డిప్యూటీ సీఎంగానూ పనిచేసిన రాజయ్య ముందస్తు ప్లాన్, పక్కా హామీ లాంటివి లేకుండా ఓవర్ కాన్ఫిడెన్స్తో బీఆర్ఎస్ కు బై బై చెప్పి ఇబ్బందులు పడుతున్నారనే అభిప్రాయాలు వ్యక్తమవుతున్నాయి.
పల్లా చివరి ప్రయత్నం..
జనగామ ఎమ్మెల్యే పల్లా రాజేశ్వర్ రెడ్డికి తాటికొండ రాజయ్యకు మధ్య ఉన్న సాన్నిహిత్యం తో ఆయన్ని తిరిగి గులాబీ గూటికి తీసుకు వచ్చేందుకు పల్లా చివరి ప్రయత్నాలు చేస్తున్నట్లు తెలిసింది. అటు మాజీ మంత్రి హరీశ్రావు సైతం స్టేషన్ ఘన్పూర్ నియోజకవర్గంలోని పలువురు ముఖ్య నేతలతో ఇటీవల మాట్లాడారు. రాజయ్యను తిరిగి పార్టీలోకి తెస్తే ఎలా ఉంటుందనే అభిప్రాయాలను సేకరించినట్లు క్యాడర్ చెబుతోంది. ఈ క్రమంలో రాజయ్య రీ ఎంట్రీ ఉంటుందని ప్రచారం జరిగింది. కానీ కేటీఆర్ చేస్తున్న వ్యాఖ్యలతో రాజయ్యకు సంకట స్థితి నెలకొంది. ఇన్నాళ్లు స్టేషన్ ఘన్పూర్ నియోజకవర్గంలో కాంగ్రెస్ నుంచి రాజయ్య, టీడీపీ నుంచి కడియం శ్రీహరి ఇద్దరు ప్రధాన ప్రత్యర్థులుగా ఉండేవారు. తెలంగాణ ఉద్యమ టైంలో తన ఎమ్మెల్యే పదవికి రాజీనామా చేసిన రాజయ్య కాంగ్రెస్ నుంచి బీఆర్ఎస్ గూటికి చేరారు. అప్పుడు వచ్చిన ఉప ఎన్నికల్లో గెలుపొందారు. తర్వాత కడియం శ్రీహరి కూడా గులాబీ గూటికి చేరగా ఈ ఇద్దరి మధ్య నిత్యం పచ్చగడ్డి వేస్తే భగ్గు మనే పరిస్థితి ఉండేది. వరుసగా నాలుగు సార్లు రాజయ్య ఎమ్మెల్యేగా ఎన్నిక కాగా, కడియం శ్రీహరి నుంచి ఇంటిపోరు ఎదుర్కొన్నారు. కేసీఆర్ తొలి కేబినెట్లో రాజయ్య డిప్యూటీ సీఎం కాగా ఆ పదవి ఆర్నెళ్లకే పోయింది. అదే పదవి కడియంకు దక్కింది. ఇప్పుడు గులాబీ పార్టీని వదిలి కడియం బాధ తప్పించుకుందామని బయటకు వస్తే తిరిగి అదే కడియం రూపంలో అడ్డంకులు కలుగుతున్నాయి. కాంగ్రెస్ ఎంపీ టికెట్ కోసం ప్రయత్నిస్తే ఈయన్ని కాదని కాంగ్రెస్ పార్టీ కడియం కూతురు కావ్యకు టికెట్ ఇవ్వడం రాజయ్యకు కంటిమీద కునుకు లేకుండా చేస్తోంది. నేటికీ కడియం రూపంలో రాజయ్యకు రాజకీయ గ్రహణం వీడడం లేదనే చర్చ జరుగుతోంది.
బీఆర్ఎస్ డోర్లు క్లోజ్
స్టేషన్ఘన్పూర్ ఎమ్మెల్యే కడియం శ్రీహరి ఇచ్చిన భారీ షాక్ నుంచి బీఆర్ఎస్ తేరుకోలేక పోతోంది. గెలుపోటములు ఎలా ఉన్నా పార్టీ మారినోళ్లను తిరిగి తీసుకునే ప్రసక్తే లేదని వర్కింగ్ ప్రెసిడెంట్ కేటీఆర్ పదే పదే చెప్తున్నారు. కాళ్లు మొక్కినా తిరిగి రానియ్యమని, కొత్తనాయకులను తయారుచేస్తామని క్యాడర్ కు భరోసా ఇస్తున్నారు. ఈ నేపథ్యంలో కడియం తన కూతురు కావ్యతో కలిసి బీఆర్ఎస్ కు గుడ్ బై చెప్పిన రోజు తాటికొండ రాజయ్య తిరిగి బీఆర్ఎస్ లో చేరుతారనే ప్రచారం పెద్ద ఎత్తున జరిగింది. కానీ కేటీఆర్ మాటలు రాజయ్యను, ఆయన అనుచరులను డైలమాలో పడేస్తున్నాయి. బీఆర్ఎస్ లో రీ ఎంట్రీకి డోర్లు క్లోజ్ అయినట్లేనని భావిస్తున్నారు.
