కామారెడ్డి/భైంసా, వెలుగు: యూట్యూబ్ చూస్తూ దొంగ నోట్లను తయారు చేస్తున్న ఐదుగురు సభ్యుల ముఠాను కామారెడ్డి జిల్లా పోలీసులు శనివారం అరెస్టు చేశారు. వీరి నుంచి ఫేక్ రూ.500 నోట్లు, రెండు బైక్లు, టవేరా వెహికల్తో పాటు నోట్ల తయారీకి కావాల్సిన సామగ్రిని స్వాధీనం చేసుకున్నట్టు ఎస్పీ శ్రీనివాస్రెడ్డి మీడియా సమావేశంలో వెల్లడించారు. శుక్రవారం దేవునిపల్లి హైవేపై వెహికల్స్ చెక్ చేస్తుండగా, నిజామాబాద్ వైపు నుంచి ఏపీ 09 బీఏ 8339 టవేరా వెహికల్కామారెడ్డి వైపు వస్తున్నది. అందులో ఉన్న ఇద్దరు అనుమానితులు పోలీసులను చూసి పారిపోయేందుకు ట్రై చేశారు. పోలీసులు వెంబడించి పట్టుకుని ఎంక్వైరీ చేయగా.. వారు మతిన్ ఖాన్, షేక్ హుస్సేన్ అని తేలింది. ఫేక్ 500 రూపాయల నోట్లు తయారు చేసి దీపావళి హడావుడిలో మార్కెట్లో చెలామణి చేద్దామని ప్రయత్నించారు. దీనికి మరో ముగ్గురు సాయం చేశారు. నిర్మల్ జిల్లా భైంసా వెళ్లి ఆ ముగ్గురిని టాస్క్ఫోర్స్, దేవునిపల్లి పోలీసులు అదుపులోకి తీసుకున్నారు.
నిందితులను మహారాష్ట్ర నాందేడ్ జిల్లా ధర్మాబాద్కు చెందిన మహమ్మద్ ఉమర్, షేక్ హుస్సేన్, నిజామాబాద్ జిల్లా నాగారానికి చెందిన ఒబైద్ ఖాన్ పఠాన్, నిర్మల్ జిల్లా భైంసాకు చెందిన మతిన్ఖాన్, అబ్దుల్ మోయిజ్లుగా గుర్తించారు. వీరి నుంచి 330 ఫేక్ 500 రూపాయల నోట్లు (రూ.1.65లక్షలు), డెస్క్టాప్, కీ బోర్డు, ల్యామినేషన్ మిషన్, కలర్ ప్రింటర్, రంగుల డబ్బాలు, పేపర్లు, పేపర్ కటింగ్ మిషన్, రెండు బైక్లు, టవేరా వెహికల్, 7 సెల్ఫోన్లు స్వాధీనం చేసుకున్నారు. షేక్ హుస్సేన్, మతిన్ఖాన్లు వృత్తిరీత్యా డ్రైవర్లు. వీరికి కంప్యూటర్పై టెక్నికల్గా ఎక్స్పీరియన్స్ ఉంది. వీరు భైంసా మీ సేవలో పనిచేస్తూ జిరాక్స్ సెంటర్ నడిపిస్తున్నరు. దొంగనోట్లు ఎలా తయారు చేస్తారో ఐదుగురు కలిసి యూట్యూబ్లో చూసి నేర్చుకున్నారు. దానికి కావాల్సిన అన్ని వస్తువులు సమకూర్చుకుని నకిలీ 500 రూపాయల నోట్లను తయారు చేశారు. మీటింగ్లో ఏఎస్పీ అన్యోన్య, డీఎస్పీ సోమనాథం, కామారెడ్డి రూరల్ సీఐ శ్రీనివాస్, టాస్క్ఫోర్స్ ఎస్సైలు, సిబ్బంది పాల్గొన్నారు. ముఠాను పట్టుకోవడంలో కీలక పాత్ర పోషించిన ఆఫీసర్లను ఎస్పీ అభినందించారు. వారికి రివార్డులు ఇవ్వనున్నట్లు చెప్పారు. అయితే దొంగ నోట్ల ముఠా పట్టుబడడంతో భైంసా పట్టణవాసులు ఆందోళన వ్యక్తం చేస్తున్నారు.
