భైంసా, వెలుగు: 24 గంటలకు పైగా వ్యవసాయానికి కరెంటు రావడం లేదని.. కరెంటు ఇవ్వాలని కోరిన రైతులపై ఆ శాఖ భైంసా రూరల్ఏఈ రాంబాబు చిందులు తొక్కారు. ‘కరెంటు రాకపోతే నేనేం చేయాలి.. పంటకు అగ్గి పెట్టుకోండి’ అంటూ మండిపడ్డారు. దీన్ని నిరసిస్తూ.. మంగళవారం భైంసా 132/11 కేవీ సబ్స్టేషన్ ముందు జాతీయ రహదారిపై ఆందోళనలకు దిగారు. రైతులు మాట్లాడుతూ.. కథ్గాం గ్రామంలో 90 శాతం మంది వ్యవసాయంపైనే ఆధారపడి జీవిస్తున్నారని, ఈ యాసంగిలో మొక్కజొన్న పంటలు సాగు చేశామని, కరెంటు 10 గంటలకు పోయి సరఫరా లేక పంట ఎండిపోయే స్థితిలో ఉందన్నారు.
కరెంటు సరఫరా చేయాలని ఏఈ రాంబాబుకు ఫోన్ చేస్తే.. ఇష్టం వచ్చినట్లు మాట్లాడుతున్నారని ఆవేదన వ్యక్తం చేశారు. కరెంటు లేకపోతే తానేమి చేయలేనని, ఏదైనా ఉంటే లైన్మెన్ను అడగాలని.. లేదంటే పంటను అగ్గి పెట్టుకోవాలని చెప్పారన్నారు. సదరు ఏఈపై వెంటనే చర్యలు తీసుకొని వ్యవసాయానికి కరెంటు సరఫరాను పునరుద్ధరించాలని డిమాడ్ చేశారు. విషయం తెలుసుకున్న పోలీసులు ఘటనా స్థలానికి చేరుకోని రైతులను సముదాయించారు. ఎస్ఈ జైవంత్ చౌహాన్తో ఫోన్ మాట్లాడి సమస్య పరిష్కరిస్తామని హామీవ్వడంతో రైతులు శాంతించారు. సుమారు రెండు గంటలకుపైగా ధర్నా చేయడంతో ఇరువైపులా భారీగా వాహనాల రాకపోకలు నిలిచిపోయాయి.
