కీవ్/మాస్కో: సౌత్ ఉక్రెయిన్లోని కీలకమైన పోర్ట్ సిటీ మరియుపోల్లో ఇంకా భీకర పోరాటం కొనసాగుతోంది. ఇప్పటికే నగరాన్ని చాలావరకూ నేలమట్టం చేసిన రష్యన్ బలగాలకు సిటీలోని అజోవ్స్టల్ స్టీల్ ప్లాంటును స్వాధీనం చేసుకోవడం మాత్రం సాధ్యం కావట్లేదు. ప్లాంటులోని అండర్ గ్రౌండ్ టన్నెళ్లనే బంకర్లుగా వాడుకుంటూ, ప్లాంటును కంచుకోటగా మార్చుకుని ఉక్రెయిన్ బలగాలు దీటుగా పోరాడుతున్నాయి. సోవియెట్ కాలం నాటి ఈ అతిపెద్ద స్టీల్ ప్లాంటులోని భూగర్భ టన్నెల్స్, కొన్ని బిల్డింగులు పెద్ద పెద్ద బాంబులను సైతం తట్టుకునేలా ఉండటం ఉక్రెయిన్కు కలిసివస్తోంది. స్టీల్ ప్లాంటులో సుమారు 3 వేల వరకూ ఉక్రెయిన్ సోల్జర్లు ఉన్నారని, వారికి తోడుగా మరో వెయ్యి మంది జనం ఉన్నారని చెప్తున్నారు. ఈ ప్లాంటును స్వాధీనం చేసుకుంటే మరియుపోల్ అంతా కంట్రోల్లోకి రానుండటంతో రష్యన్ బలగాలు దాడులు తీవ్రం చేస్తున్నాయి. ప్లాంటులోని సోల్జర్లు ఇప్పటికైనా లొంగిపోతే ప్రాణభిక్ష పెడతామని రష్యా బుధవారం మళ్లీ హెచ్చరించింది. మరోవైపు ప్లాంటుపై, అక్కడికి దగ్గర్లోని ఆస్పత్రిపైనా రష్యా బాంబులు వేసింది. ఆ టైమ్లో ఆస్పత్రిలో మొత్తం 300 మంది ఉన్నట్లు అధికారులు చెప్తున్నారు.
రష్యాకు 25% పవర్ లాస్
రష్యా ఇప్పటివరకు 25% కంబాట్ పవర్ను నష్టపోయి ఉంటుందని అమెరికా అధికారులు అంచనా వేశారు. ఉక్రెయిన్లోకి పంపిన సోల్జర్లు, ట్యాంకులు, హెలికాప్టర్లు, యుద్ధవిమానాలు, బాంబులలో 25% కోల్పోయి ఉంటుందని వెల్లడించారు
