ఒకప్పుడు పొట్టకూటి కోసం ఇంటింటికీ తిరిగి న్యూస్ పేపర్లు వేశాడతను. కట్ చేస్తే ఇరవై ఏండ్లలో.. కోట్ల రూపాయల వ్యాపారాన్ని స్థాపించాడు. ది చాయ్ వాలాతో విదేశాల్లోనూ పాపులర్ అయ్యాడు. అది కూడా అనాథాశ్రమంలో పెరిగి, ఇంటర్మీడియెట్ చదివి. పేదరికం నేర్పిన పాఠాలే.. ఇక్కడి వరకు తీసుకొచ్చాయని చెప్తున్న అతని పేరు ఫైజల్ యూసఫ్. సొంతూరు కేరళలోని అలప్పుజ.
టెక్స్ట్బుక్స్లో లేని పాఠాలెన్నో జీవితం నేర్పిస్తుంది అంటున్న ఫైజల్ చిన్నప్పట్నించీ కష్టాలతోనే సావాసం చేశాడు. ఊహ తెలియక ముందే తండ్రి దూరమయ్యాడు అతనికి. పోషణకి డబ్బు లేక తల్లి అతన్ని అనాథాశ్రమంలో చేర్పించింది. అక్కడ గడిపిన ప్రతి క్షణం ఓ పాఠం నేర్పింది అతనికి. దాంతో టెక్స్ట్బుక్స్పై ఇంట్రెస్ట్ పెట్టలేకపోయాడు. ఇంటర్మీడియెట్ చదువు మధ్యలోనే ఆపేశాడు. ఆ తర్వాత మూడు పూటల కడుపు నింపుకోవడానికి పేపర్ బాయ్గా పనిచేశాడు. అలా రోజులు గడుస్తుండగా ఫైజల్ని పేపర్ బాయ్గా పెట్టించిన న్యూస్ ఏజెన్సీ యజమాని చనిపోయాడు. దాంతో మళ్లీ ఉద్యోగం వేటలో పడ్డాడు. కొన్ని మార్కెటింగ్ జాబ్స్ చేశాడు. ఆ తర్వాత ముంబైలో ఎస్టేట్ ఏజెంట్గా పనిచేశాడు. అక్కడ్నించి తెలిసిన వాళ్ల ద్వారా దుబాయ్ వెళ్లాడు. అక్కడ కొన్నాళ్లు పనిచేశాక.. ఇంగ్లండ్లోని కాఫీ పౌడర్ తయారు చేసే ఒక కంపెనీలో చేరాడు. అక్కడ వచ్చిందే ఈ టీ స్టాల్ ఐడియా.
ఆ రుచి కోసం..
కాఫీ తయారీ కంపెనీలో పనిచేస్తున్నప్పటికీ, ఫైజల్ మనసంతా మసాలా చాయ్ చుట్టూనే తిరుగుతుండేది. కానీ, ఇంగ్లండ్లో ఎంత వెతికినా మన ఇండియన్ స్టైల్ చాయ్ దొరకలేదు అతనికి. దాంతో తనే టీలతో ఎక్స్పరిమెంట్స్ చేసేవాడు. టీలలో డిఫరెంట్ ఫ్లేవర్స్ ట్రై చేశాడు. వాటిని ఇంగ్లండ్లోని కొన్ని స్ట్రీట్ మార్కెట్స్లో అమ్మాడు. అవి రుచి చూసినవాళ్లంతా టేస్టీగా ఉందని కాంప్లిమెంట్స్ ఇచ్చారు. దాంతో ఇండియాకి వచ్చి చాయ్ బిజినెస్ పెట్టాలనుకున్నాడు. ఇంగ్లండ్లో అందుకు సంబంధించిన కోర్సు ఒకటి చేశాడు. కానీ, తనతో పాటు అక్కడ పనిచేస్తున్న ఇండియన్స్ అంతా.. ‘ఇప్పటికే మనదగ్గర గల్లీకో టీ స్టాల్ ఉంది. నిలదొక్కుకోవడం కష్టం’ అన్నారు. అయినా వెనకడుగేయలేదు ఫైజల్. కేరళకి తిరిగొచ్చి మొదట ఆన్లైన్లో చాయ్ పౌడర్లు అమ్మాలనుకున్నాడు. కానీ, పెట్టుబడికి అంత డబ్బు లేకపోవడంతో.. టీ స్టాల్స్ పెట్టాలనుకున్నాడు. అందుకోసం మనదగ్గరున్న చాలా టీ స్టాల్స్ని గమనించాడు. తను ఇంగ్లండ్లో చూసిన డిఫరెంట్ టీ స్టాల్స్ని ఇన్స్పిరేషన్గా తీసుకొని ‘ ది చాయ్ వాలా’ ని తీసుకొచ్చాడు.
కుకీస్, కట్లెట్స్ కూడా..
ది చాయ్ వాలాలో పుదీనా, పాన్, కుంకుమ పువ్వు, కఢక్, తులసి.. ఇలా దాదాపుగా యాభై వెరైటీల టీ, కాఫీలు ఉంటాయి. ఇండియన్ మసాలా చాయ్ సేల్స్లో వాటకన్నింటికన్నా ఎప్పుడూ టాప్లో ఉంటుందని చెప్తున్నాడు ఫైజల్. ఈ చాయ్కి అవసరమయ్యే 12 రకాల ముడిసరుకుల్ని రైతుల నుంచి సేకరించి రకరకాల మసలాలు తయారుచేస్తున్నాడు. అలాగే అస్సాం, నీలగిరి బ్లాక్ టీ కూడా చాలా ఫేమస్. కుకీస్తో పాటు సమోసా, కట్లెట్ లాంటి శ్నాక్స్, జ్యూస్లు కూడా ఉంటాయి. ప్రస్తుతం కేరళ, కర్నాటకలో యాభైకి పైగా ఫ్రాంచైజీలు ఉన్నాయి ది చాయ్ వాలాకి. త్వరలో ముంబై, హైదరాబాద్కి దీన్ని తీసుకొచ్చే ఆలోచనలో ఉన్నాడట ఫైజల్.
వ్యాపారానికి నిజమైన పెట్టుబడి సాధించగలమన్న నమ్మకమే. దాని తర్వాతే డబ్బు వస్తుంది. నన్ను నేను నమ్మాను. కాబట్టి.. ఇక్కడి వరకు రాగలిగా. పాన్ ఇండియా వెంచర్గా ది చాయ్ వాలాని మార్చాలనుకుంటున్నా. రానున్న ఐదేండ్లలో దేశ వ్యాప్తంగా వెయ్యికి పైగా స్టాల్స్ లక్ష్యంగా పనిచేస్తున్నాం.
- ఫైజల్
