- గ్రోత్కు అవకాశాలు ఉండటమే కారణం
- ఆఫీస్ప్రాపర్టీలపై ఎక్కువ ఇంట్రెస్ట్
న్యూఢిల్లీ: భారతదేశం రియల్ ఎస్టేట్లోకి ఫారిన్ నుంచి దండిగా డబ్బులు వస్తున్నాయి. ఈ సెక్టార్కు వచ్చిన క్యూములేటివ్ ఇన్స్టిట్యూషనల్ ఇన్ఫ్లో విలువ 26.6 బిలియన్ డాలర్లకు చేరింది. 2017 నుండి 2022 మధ్య ఈ పెట్టుబడులు మూడు రెట్లు పెరిగాయి. కోలియర్స్ ఇండియా హై ఆన్ ఇన్వెస్టర్స్ ఎజెండా రిపోర్ట్ ప్రకారం, ఇండియాలో రియల్టీ బిజినెస్లో అనేక సానుకూల మార్పులు వచ్చాయి. కేంద్రం తెచ్చిన కొత్త విధానాల కారణంగా పారదర్శకత పెరిగింది. వ్యాపారం చేయడం సులువుగా మారడం, గ్రోత్కు చాలా అవకాశాలు ఉండటంతో భారతదేశంలోకి విదేశీ ఇన్వెస్ట్మెంట్లు గత కొన్ని సంవత్సరాలుగా పెరుగుతున్నాయి. అంతేగాక బలమైన ఆర్థిక, వ్యాపార ఫండమెంటల్స్ ఇన్స్టిట్యూషనల్ పెట్టుబడిదారుల సెంటిమెంట్ను బలోపేతం చేస్తున్నాయి. వారి పోర్ట్ఫోలియోలను విస్తరించడానికి ఒప్పందాలను కుదుర్చుకుంటున్నారు.
2017–22లో ఆఫీస్ సెక్టార్కు అత్యధికంగా ఇన్వెస్ట్మెంట్లు వచ్చాయి. మొత్తం విదేశీ ఇన్ఫ్లోలలో దీని వాటా 45శాతం వరకు ఉంది. పెట్టుబడిదారులు ఆఫీస్ ప్రాపర్టీల విషయంలో ఉత్సాహంగా ఉన్నప్పటికీ, ప్రత్యామ్నాయ ఆస్తులపైనా వారి ఆసక్తి పెరుగుతోందని కొలియర్స్ ఇండియా ఛైర్మన్ & మేనేజింగ్ డైరెక్టర్ సంకీ ప్రసాద్ చెప్పారు. 2017–22లో రియల్ ఎస్టేట్లో వచ్చిన మొత్తం పెట్టుబడులలో విదేశీ ఇన్వెస్ట్మెంట్లు 81శాతం ఉన్నాయి. పెట్టుబడిదారులకు అనుకూలమైన ఎఫ్డీఐ విధానాలు, ఒప్పందాలు కుదుర్చుకోవడంలో పెరిగిన పారదర్శకత, డైరెక్ట్ రూట్ ద్వారా అధిక పెట్టుబడి పరిమితులు భారతదేశ రియల్ ఎస్టేట్ రంగంలో ఇన్వెస్ట్మెంట్లు పెట్టేలా ఇంటర్నేషనల్ పెట్టుబడిదారులను ప్రోత్సహించాయి. రియల్టీలో ఇన్స్టిట్యూషనల్ ఇన్వెస్ట్మెంట్లు 2023 మొదటి క్వార్టర్లో పుంజుకున్నాయి. ఆఫీస్ సెక్టార్ కేటగిరీ వార్షికంగా 37 శాతం వృద్ధి చెందింది. ఈ విభాగంలోకి 1.7 బిలియన్ డాలర్ల ఇన్వెస్ట్మెంట్లు వచ్చాయి.
భవిష్యత్ భేష్..
“భారతదేశ రియల్టీ రాబోయే కొద్ది సంవత్సరాల్లో మరింతగా ఎదిగే అవకాశాలు ఉన్నాయి. రియల్ ఎస్టేట్లోని అన్ని అసెట్ క్లాస్లలో అవకాశాలు పుష్కలంగా ఉన్నాయి. అందుకే గత కొన్ని సంవత్సరాలుగా ఈ సెక్టార్కు ఇన్వెస్ట్మెంట్లు విపరీతంగా పెరుగుతున్నాయి. తయారీదారులు, కొనుగోలుదారులు, పెట్టుబడిదారులు ఇండియావైపు ఆసక్తి చూపిస్తున్నారు ” అని కొలియర్స్ ఇండియాలో క్యాపిటల్ మార్కెట్స్ & ఇన్వెస్ట్మెంట్ సర్వీసెస్ మేనేజింగ్ డైరెక్టర్ పీయూష్ గుప్తా అన్నారు. ఇండియా ప్రాపర్టీ మార్కెట్ ప్రస్తుతం ఆకర్షణీయమైన ధరలను, అధిక రాబడులను అందిస్తోందని గ్లోబల్ ఏపీఏసీ (ఆసియా–పసిఫిక్ రీజియన్) ఇన్వెస్టర్లు భావిస్తున్నారు.
ఆసియాలోని ఇతర నగరాలతో పోల్చితే భారతీయ నగరాలు అధిక రాబడిని అందిస్తున్నాయి కాబట్టి మనదేశం ఇన్వెస్టర్లకు ఫేవరెట్గా మారింది. ఏపీఏసీ ప్రాంతంలో బెంగళూరు, ముంబై వంటి భారతీయ మెట్రో నగరాలు వరుసగా 2వ, 3వ స్థానాలను ఆక్రమించాయి. ఈ ప్రాంతంలో బెంగళూరులో లీడ్ఆఫీస్ రాబడులు భారీగా ఉండగా, పారిశ్రామిక ఆస్తుల రాబడిలో ముంబై ముందంజలో ఉంది. ఆర్బీఐ వడ్డీరేట్ల పెంపును ఆపేయడం వల్ల రియల్టర్లకు మరింత మేలు జరిగే అవకాశాలు ఉన్నాయి. పెట్టుబడిదారులకు రియల్ ఎస్టేట్ ఆకర్షణీయమైన ఇన్వెస్ట్మెంట్గా మారుతుంది.
