- మాజీ ఎమ్మెల్యే గుమ్మడి నర్సయ్య
కామారెడ్డిటౌన్, వెలుగు : విద్యారంగ సమస్యలు పరిష్కరించటంలో కేంద్ర, రాష్ర్ట పభుత్వాలు విఫలమయ్యాయని ఇల్లెందు మాజీ ఎమ్మెల్యే గుమ్మడి నర్సయ్య విమర్శించారు. శుక్రవారం కామారెడ్డి జిల్లా కేంద్రంలో పీడీఎస్యూ జిల్లా మహాసభలు నిర్వహించారు. గుమ్మడి నర్పయ్య ముఖ్య అతిథిగా హాజరై మాట్లాడారు. దేశంలో విద్యారంగం పూర్తిగా కనుమరుగయ్యే పరిస్థితి నెలకొందన్నారు. కేంద్ర ప్రభుత్వ నూతన విద్యా విధానం పేరిట కాషాయికరణ చేస్తోందన్నారు. సైంటిఫిక్ విధానాలను తొలగించి మూఢత్వం, మత చాందస విధానాల స్థానంలో దేశ ప్రజలను అజ్ఞానులుగా చేసేందుకు ప్రయత్నిస్తున్నారన్నారు.
రాష్ర్ట ప్రభుత్వం కూడా విద్యారంగానికి నిధులు తగ్గిస్తుందన్నారు. ఫీజు రియింబర్స్మెంట్స్ బకాయిలను చెల్లించాలన్నారు. హాస్టళ్ల పరిస్థితి అధ్వానంగా మారిందన్నారు. పీడీఎస్యూ జిల్లా ప్రెసిడెంట్ నరేందర్ అధ్యక్షత వహించారు. సీపీఐ( ఎంఎల్) మాస్లైన్ నాయకులు వి.ప్రభాకర్, నాయకులు రామకృష్ణ, పద్మారావు, కొంగర శ్రీనివాస్ పాల్గొన్నారు.
విద్యను కార్పొరేటికరించింది పాలకులే..
ఆర్మూర్ : విద్యను కార్పొరేట్ ఉత్పత్తి సాధనంగా మార్చిన పాపం పాలకులదేనని పీఓడబ్ల్యూ జాతీయ నాయకురాలు సంధ్య ఆరోపించారు. శుక్రవారం పీడీఎస్యూ జిల్లా 23వ మహాసభల సందర్భంగా ఆర్మూర్లో విద్యార్థులతో భారీ ర్యాలీ నిర్వహించిన అనంతరం సభ జరిగింది. ఈ సందర్భంగా ఆమె మాట్లాడుతూ రాజ్యాంగం కల్పించిన స్వేచ్ఛ, చదువుకునే హక్కులను కేంద్ర, రాష్ట్ర ప్రభుత్వాలు నిర్వీర్యం చేశాయని విమర్శించారు. దేశ సంపదను కార్పొరేట్ కంపెనీలకు అప్పగించడానికి హిడ్మా లాంటి పోరాట యోధులను హత మారుస్తున్నారన్నారు.
పీడీఎస్యూ రాష్ట్ర ప్రధాన కార్యదర్శి పి. నాగరాజు మాట్లాడుతూ దేశంలో కేంద్ర ప్రభుత్వం కార్పొరేట్ సంస్థలకు ప్రజా ధనాన్ని దోచిపెడుతుందని ఆరోపించారు. పీడీఎస్యూ జిల్లా అధ్యక్షుడు ఆర్.గౌతమ్ కుమార్ అధ్యక్షతన జరిగిన ఈసభలో మాజీ ఎంపీపీ పస్క నరసయ్య, ఇఫ్టూ జిల్లా ప్రధాన కార్యదర్శి ఎన్. దాసు, పీడీఎస్యూ జిల్లా ప్రధాన కార్యదర్శి జన్నారపు రాజేశ్వర్, జిల్లా సహాయ కార్యదర్శి ప్రిన్స్, జిల్లా ఉపాధ్యక్షుడు కార్తీక్ తదితరులు పాల్గొన్నారు.
మహాసభకు తరలిన ఆర్మూర్ నాయకులు
కామారెడ్డి లో రెండు రోజుల పాటు జరగనున్న పీడీఎస్యూ 23వ మహాసభలకు శుక్రవారం ఆర్మూర్ నుంచి పీడీఎస్యూ నాయకులు, కార్యకర్తలు తరలివెళ్లారు. సీపీఐఎంఎల్ ప్రజాపంథా ఆర్మూర్ సబ్ డివిజన్ కార్యదర్శి కిషన్, ఏరియా అధ్యక్షుడు డి.నిఖిల్ మాట్లాడుతూ కేంద్ర, రాష్ట్ర ప్రభుత్వాలు అవలంబిస్తున్న విద్యా వ్యతిరేక విధానాలపై చర్చించి భవిష్య కార్యచరణ రూపొందిస్తామని తెలిపారు. ఆర్మూర్ ఏరియా ప్రధాన కార్యదర్శి రాజు, సహాయ కార్యదర్శి సిద్ధార్థ, కోశాధికారి నిహారిక, నాయకులు రోజా, వివేక్, వెంకట్, వినయ్ పాల్గొన్నారు.
