యాదాద్రి, వెలుగు : మంత్రి గుంటకండ్ల జగదీశ్ రెడ్డిని అడ్డుకునే ప్రయత్నం చేసినందుకు యాదాద్రి జిల్లాకు చెందిన నలుగురు రైతులను పోలీసులు అరెస్టు చేశారు. వారిపై నాన్బెయిలబుల్ కేసులు నమోదు చేశారు. మంగళవారం అర్ధరాత్రి వారిని కోర్టులో ప్రవేశపెట్టగా రిమాండ్కు తరలించారు. ఇదంతా గంటల వ్యవధిలోనే జరిగిపోయింది. ట్రిపుల్ ఆర్ కారణంగా యాదాద్రి జిల్లాలోని ఆలేరు, భువనగిరి, మునుగోడు నియోజవర్గాల్లోని ఐదు మండలాలకు చెందిన రైతులు తమ భూములను కోల్పోతున్నారు. దీంతో అలైన్మెంట్ మార్చాలని డిమాండ్ చేస్తూ రైతులు ఆందోళన చేస్తున్నారు. ఆందోళనల్లో భాగంగా యాదాద్రి కలెక్టరేట్ వద్ద రెండు రోజుల పాటు ధర్నా నిర్వహించారు. తెలంగాణ దశాబ్ది ఉత్సవాల ఏర్పాట్లపై రివ్యూ చేయడానికి మంత్రి జగదీశ్ రెడ్డి మంగళవారం యాదాద్రి కలెక్టరేట్ కువచ్చారు. తిరిగివెళ్లే సమయంలో మంత్రి కాన్వాయ్ను అడ్డుకునేందుకు రైతులు ప్రయత్నించారు. భూములు పోతున్నాయన్న ఆగ్రహంతో ఉన్న రైతులు తమ వెంట తెచ్చిన ఎండుగడ్డి మోపుకు నిప్పు పెట్టిన సంగతి తెలిసిందే.
పోలీస్ ఎస్కార్ట్ వాహనం డ్యామేజ్ అంట
మంత్రిని రైతులు అడ్డుకునే ప్రయత్నం చేయడాన్ని పోలీసులు సీరియస్గా తీసుకున్నారు. సంఘటన జరిగిన వెంటనే ఆందోళనకారులను అదుపులోకి తీసుకొని వివిధ పోలీస్ స్టేషన్లకు తరలించారు. ఆ తర్వాత ఎలాంటి పరిణమాలూ జరిగాయో తెలియదు గానీ భువనగిరి రూరల్ పీఎస్ హెడ్ కానిస్టేబుల్ ఎస్ నారాయణ రెడ్డి ఫిర్యాదు చేయడంతో కేసు నమోదు చేశారు. మరో నలుగురు కానిస్టేబుళ్లను సాక్షులుగా పేర్కొన్నారు. ట్రిపుల్ ఆర్ పేరుతో రాష్ట్ర ప్రభుత్వానికి వ్యతిరేకంగా వ్యవహరించారని ఎఫ్ఐఆర్లో పేర్కొన్నారు. వెంట తెచ్చిన ఎండుగడ్డికి నిప్పు పెట్టడంతో పాటు కలెక్టరేట్ పోలీస్ సెంట్రీ పోస్ట్ను కాల్చే ప్రయత్నం చేశారంటూ పేర్కొన్నారు. దీంతో పోలీస్ ఎస్కార్ట్ వెహికల్ డ్యామెజీ అయిందని ఆరోపించారు. బాధితుల్లో గడ్డమీది మల్లేశ్, పల్లెర్ల యాదగిరి, అవిశెట్టి నిఖిల్, మల్లెబోయిన బాలును మంగళవారం సాయంత్రమే అరెస్టుచేశారు. వారిపై పలు సెక్షన్ల కింద కేసు నమోదు చేశారు. అనంతరం అర్ధరాత్రి రిమాండ్కు తరలించారు. ఈ ఆందోళనలో పాల్గొన్న బీజేపీ స్టేట్ లీడర్ గూడూరు నారాయణరెడ్డి, కాంగ్రెస్ లీడర్ తంగెళ్లపల్లి రవికుమార్ పైనా కేసు నమోదు చేశారు.
