జూబ్లీహిల్స్, వెలుగు: విదేశాల్లో ఉద్యోగాలు ఇప్పిస్తామంటూ ఇద్దరు వ్యక్తులు ఏడుగురిని నమ్మించి రూ.లక్షలు దోచుకున్నారు. వారిపై హైదరాబాద్మధురానగర్ పోలీస్ స్టేషన్లో కేసు నమోదైంది. పోలీసులు తెలిపిన వివరాల ప్రకారం.. ఎల్లారెడ్డిగూడలో ఉండే నవీన్ అనే వ్యక్తికి వీరమాచినేని మన్సూరత్ చౌదరి, అతడి ఫ్రెండ్ రాఘవ పరిచయమయ్యారు. విదేశాల్లో ఉద్యోగాలు ఇప్పిస్తామని వారు నవీన్‌‌‌‌తో పాటు మరో ఆరుగురిని నమ్మించారు
ఆన్‌‌‌‌లైన్ లావాదేవీల ద్వారా ఆ ఏడుగురి నుంచి మొత్తం రూ.27.60 లక్షలు పలు దఫాల్లో తీసుకున్నారు. ఆ తర్వాత ఉద్యోగాల గురించి అడిగితే తప్పించుకుంటూ వస్తున్నారు. డబ్బులు తిరిగి ఇవ్వాలని పలుమార్లు కోరడంతో దూషించి, బెదిరించారు. దీంతో మోసపోయినట్లు భావించిన నవీన్ పోలీసులను ఆశ్రయించారు. ఆయన ఫిర్యాదు మేరకు నిందితులపై కేసు నమోదు చేసి దర్యాప్తు చేస్తున్నట్లు పేర్కొన్నారు.
