- శక్తి కేంద్రాల స్థాయిలో సమావేశాలు
- 15 రోజుల్లో 9వేల మీటింగ్స్ పెట్టాలని నిర్ణయం
- గ్రామ స్థాయిలో పార్టీ బలోపేతమే లక్ష్యం
- ఢిల్లీ డైరెక్షన్ లో స్టేట్ పార్టీ కసరత్తు
హైదరాబాద్, వెలుగు : గ్రామ స్థాయిలో పార్టీని బలోపేతం చేయడమే లక్ష్యంగా బీజేపీ కార్నర్ మీటింగ్స్ కు రెడీ అవుతున్నది. వాస్తవానికి ఈ నెల 20 నుంచి ఫిబ్రవరి 5 దాకా గ్రామ స్థాయిలో 9వేల కార్నర్ మీటింగ్స్ నిర్వహించాలని నిర్ణయించుకుంది. అయితే, ఇప్పుడు వీటిని గ్రామ స్థాయిలో కాకుండా శక్తి కేంద్రాల స్థాయిలోనే నిర్వహించాలనే నిర్ణయానికి వచ్చింది. దీంతో వీటిని వచ్చే నెల 5 నుంచి 20 దాకా కొనసాగించాలని బీజేపీ తాజాగా నిర్ణయించింది. ఈ నెల 24న మహబూబ్ నగర్ లో పార్టీ రాష్ట్ర కార్యవర్గ సమావేశం ఉండడం, 28న తెలంగాణలో అమిత్ షా టూర్ కారణంగా ఈ నిర్ణయం తీసుకుంది. మిషన్ 90లో భాగంగా పల్లెల్లో ప్రతీ గడపకు బీజేపీని తీసుకెళ్లాలనే ఉద్దేశంతో ఆ పార్టీ ఈ కార్నర్ మీటింగ్ లకు రెడీ అవుతున్నది. బీఆర్ఎస్ సర్కార్ కుటుంబ పాలన, అవినీతి, ప్రజలకు ఇచ్చిన హామీలను కేసీఆర్ విస్మరించడమే ప్రచార అస్త్రాలుగా ఈ కార్నర్ మీటింగ్స్ ఉండనున్నాయి. అదేవిధంగా కేంద్రంలో మోడీ సర్కార్ అమలు చేస్తున్న సంక్షేమ పథకాలు, తెలంగాణకు కేంద్రం ఇచ్చిన నిధుల వివరాలు కూడా కార్నర్ మీటింగ్ల ద్వారా జనాలకు వివరించాలనేది బీజేపీ హైకమాండ్ ప్లాన్. ఈ పద్ధతిని ఇప్పటికే గుజరాత్, పశ్చిమ బెంగాల్, యూపీలో అమలు చేసి సక్సెస్ అయ్యామనే భావన హైకమాండ్ లో ఉండడంతో.. దీన్ని తెలంగాణలోనూ ఇంప్లిమెంట్ చేయాలనేది బీజేపీ ఆలోచన.
చేరికలపై స్పెషల్ ఫోకస్
ఇదే టైంలో పార్టీలో చేరికలను కేవలం నియోజకవర్గ, జిల్లా, రాష్ట్ర స్థాయి నేతలకే పరిమితం కాకుండా బూత్ స్థాయి నేతలను, లోకల్ బాడీల ప్రజాప్రతినిధులను కూడా చేర్చుకోవాలని సెంట్రల్ పార్టీ సూచించింది. ఈ కార్నర్ మీటింగ్స్లో పెద్ద సంఖ్యలో సర్పంచ్ లు, ఎంపీటీసీలను పార్టీలో చేర్చుకునేందుకు బీజేపీ సిద్ధం అవుతున్నది. ఫస్ట్ సర్పంచ్ ల సమస్యలపై కార్నర్ మీటింగ్స్లో ప్రస్తావించి.. తర్వాత వారిని బీజేపీలోకి ఆహ్వానించాలనేది పార్టీ పెద్దల ప్లాన్. దీంతో ప్రతీ విలేజ్లో బూత్ స్థాయిలో పార్టీకి బలమైన నేత దొరుకుతారనేది బీజేపీ ఉద్దేశం. సర్పంచ్ ల అధికారాలను బీఆర్ఎస్ ఏవిధంగా హరిస్తున్నది.. జీపీలకు కేంద్రం ఇచ్చిన నిధులను ఏవిధంగా దారిమళ్లిస్తున్నది.. ఎంపీటీసీ వ్యవస్థను నిర్వీర్యం చేస్తున్న తీరును కార్నర్ మీటింగ్స్ ద్వారా ఎండగట్టాలని పార్టీ పెద్దలు ఆదేశించారు.
