- తారాబాయి కుటుంబానికి అందించిన స్పీకర్ ప్రసాద్కుమార్
వికారాబాద్, వెలుగు: చేవెళ్ల మండలం మీర్జాగూడ వద్ద జరిగిన బస్సు ప్రమాదంలో మృతిచెందిన వికారాబాద్ మున్సిపాలిటీ పరిధిలోని ధన్నారం తాండాకు చెందిన తారాబాయి కుటుంబానికి రాష్ట్ర ప్రభుత్వం తరఫున రూ.7 లక్షల చెక్కును అందజేశారు. మంగళవారం అసెంబ్లీ స్పీకర్ గడ్డం ప్రసాద్కుమార్ ఈ చెక్కు అందించడంతో పాటు తన సొంతంగా రూ.లక్ష ఆర్థిక సాయం చేశారు. కార్యక్రమంలో కలెక్టర్ ప్రతీక్ జైన్, అడిషనల్ కలెక్టర్ సుధీర్, ఆర్డీవో వాసుచంద్ర, డీసీసీబీ డైరెక్టర్ కిషన్నాయక్ పాల్గొన్నారు.
పత్తి రైతులను కేంద్ర ప్రభుత్వం ఆదుకోవాలి
పత్తి రైతులను కేంద్ర ప్రభుత్వం ఆదుకోవాలని అసెంబ్లీ స్పీకర్ గడ్డం ప్రసాద్కుమార్ డిమాండ్ చేశారు. మంగళవారం వికారాబాద్లోని ఎమ్మెల్యే క్యాంపు కార్యాలయంలో మీడియా సమావేశంలో ఆయన మాట్లాడారు. సీసీఐ ఆధ్వర్యంలో జరుగుతున్న పత్తి కొనుగోళ్లలో రాష్ట్ర ప్రభుత్వం మధ్యవర్తిగా మాత్రమే ఉంటుందన్నారు.
గతేడాది ఎకరాకు 11 క్వింటాల వరకు పత్తిని కొనుగోలు చేశారని, ఈసారి 7 క్వింటాళ్లకు తగ్గించారని తెలిపారు. ఈ నిర్ణయం వల్ల పత్తి పండించే రైతులకు నష్టం జరుగుతుందని, కాబట్టి కేంద్ర ప్రభుత్వం తన నిర్ణయాన్ని ఉపసంహరించుకోవాలని కోరారు.
