వాషింగ్టన్: అగ్రరాజ్యం అమెరికాలో సామాన్యులకే కాదు చట్ట సభల సభ్యులకూ రేసిస్టు కామెంట్లు, బెదిరింపులు తప్పట్లేదు. ప్రతినిధుల సభ మెంబర్, మన దేశ మూలాలున్న ప్రమీలా జయపాల్కు కూడా గుర్తు తెలియని వ్యక్తి నుంచి ఇలాంటి బెదిరింపులు వచ్చాయి. ఈ విషయాన్ని జయపాల్ స్వయంగా వెల్లడించారు. తనకు వచ్చిన ఫోన్ కాల్ సంభాషణలకు సంబంధించిన వాయిస్ మెసేజ్లను ఆమె సోషల్ మీడియాలో పోస్ట్ చేశారు. అందులో జయపాల్ను ఉద్దేశించి ఆగంతుకుడు జాత్యంహకార వ్యాఖ్యలు చేశాడు. ముందు ముందు ఆమె జీవితం దుర్భరం చేస్తానని బెదిరించాడు. మీ ఇండియాకు వెళ్లిపోవాలని హెచ్చరించాడు. అభ్యంతరకర భాషలో తిడుతూ తిరిగి వెళ్లిపొమ్మన్నాడు.
దీనిపై జయపాల్ స్పందించారు. దేశంలో రేసిజంను, హింసను ఎట్టి పరిస్థితుల్లోనూ సహించేది లేదంటూ ట్వీట్ చేశారు. చెన్నైలో పుట్టిన ప్రమీలా జయపాల్ తన పదహారేండ్ల వయసులో కుటుంబంతో అమెరికాకు వలస వెళ్లారు. చదువు పూర్తయ్యాక డెమోక్రాటిక్ పార్టీలో చేరారు. ఇప్పుడు సియాటెల్ నుంచి హౌస్ ఆఫ్ రిప్రంజెటేటివ్స్కు సియాటెల్ నుంచి ప్రాతినిథ్యం వహిస్తున్నారు. కాగా, పోయిన వేసవిలో సియాటెల్లోని జయపాల్ ఇంటిముందు ఓ అపరిచితుడు రివాల్వర్తో పట్టుబడ్డాడు. పోలీసులు అరెస్టు చేసి విచారించగా.. నిందితుడి పేరు బ్రెట్ ఫోర్సెల్గా తేలింది.
మరోవైపు, ఈ నెల మొదట్లోనూ కాలిఫోర్నియాలో ఇండియన్ అమెరికన్ఒకాయన జాతి వివక్షకు గురయ్యాడు. కిందటి నెలలో నలుగురు ఇండియన్ అమెరికన్ మహిళలు టెక్సస్లో ఇలాగే అవమానపడ్డారు. మెక్సికన్ అమెరికన్ మహిళ వీళ్లపై అసభ్యకరమైన భాషలో విరుచుకుపడింది. డాలస్లోని ఓ పార్కింగ్ ప్లేస్లో ఈ ఘటన చోటుచేసుకుంది.
