పంట చేతికొచ్చినంకే కాదు.. భూమిలో విత్తనాలు పెట్టడాన్ని కూడా ఓ పండుగలా చేసుకుంటరు గోండులు. నేలతల్లిపై వాళ్లకున్న ప్రేమకి అద్దం పట్టే ఈ పండుగ పేరు విజంగ్ మొహుతుర్. విజంగ్ అంటే విత్తనాలు.. మొహుతుర్ అంటే ముహూర్తం అని అర్థం. ప్రకృతిని పూజిస్తూ ఆదివాసి గోండు గూడేలన్నీ ఈ పండుగని జరుపుకుంటయ్. భూమితల్లి చల్లని చూపు కోసం చేసుకునే ఈ పండుగలోని ప్రతి ఆచారానికి ఒక విశిష్ఠత ఉంది.
ఆదివాసిల్లో గోండుల కట్టు, బొట్టే కాదు.. పండుగలూ ప్రత్యేకమే. ముఖ్యంగా వ్యవసాయ పనులు మొదలుపెట్టేముందు గోండు గూడేలన్నీ కలిసి జరుపుకునే విజంగ్ మొహుతుర్కి చాలా ప్రాముఖ్యత ఉంది. మృగశిర కార్తె ముందు ఆకాశంలో వచ్చే ఉరుముల గర్జన..‘‘వర్షాలు దగ్గర పడుతున్నాయి. ఏరువాక పనులు వేగవంతం చేయమ’’ని ఆకాశమిచ్చే సంకేతం అని నమ్ముతారు గోండులు. అందుకే ఆకాశంలో ఉరుములు, మెరుపులు కనిపించగానే విజంగ్ మొహుతుర్కి మూహూర్తం పెట్టుకుంటారు. సాధారణంగా ఈ పండుగ మృగశిర కార్తెకి ముందు మూడు రోజులు, తర్వాత మూడు రోజులు జరుగుతుంది. కానీ, ఆదిలాబాద్ గోండు గూడేల్లో తమ వీలుని బట్టి ఒక్కో గూడెంలో ఒక్కో రోజు ఈ పండుగ చేసుకుంటారు. మొత్తంగా వారం పదిరోజులు పండుగ సంబరాలు ఉంటాయి.
పూజలు చేస్తారు
సాగు చేసే విత్తనాలను కుల దైవం ముందు ఉంచి పూజించడమే విజంగ్ మొహుతుర్ పండుగ. ఇందులో ఆదివాసులంతా పాలు పంచుకుంటారు. ముందుగా గూడెంలోని ప్రతి ఇంటి నుంచి కొన్ని ధాన్యాలు గ్రామ పెద్ద ఇంటికి వస్తాయి. ఆ తర్వాత తమ వీలును బట్టి గూడెంలోని జనాలంతా ఒక రోజుని నిర్ణయించుకుంటారు. ఆ రోజు తమ ప్రాంతంలోని ముఖ్యమైన ఆలయాల్లో జమ చేసిన విత్తనాలకి పూజలు చేస్తారు. ఏజెన్సీలోని ఆదివాసులు ముఖ్యంగా కెరమెరి సిర్పూర్ (యు )లోని సుంగాపూర్ అవ్వల్ పేన్, లింగాపూర్ మండలంలోని ఆవ్వాల్ పేన్, జంగుబాయి , తిర్యాణి మండలంలోని బీమల పేన్గుడిలోలో విత్తనాలకు పూజ చేస్తారు.
తిరిగి వచ్చి తమ గ్రామాల్లోని ఆకిపేన్ దగ్గర అందరూ కలిసి వేడుక జరుపుకుంటారు. భోజనాలు చేస్తారు. ఆదివాసి మహిళలంతా గ్రామపెద్ద ఇంటి దగ్గర చేరి మంచి, చెడు మాట్లాడుకుంటారు. వ్యవసాయం లాభసాటిగా ఉండాలని దేవుడ్ని మొక్కుకుంటారు. ఆ తర్వాత ఎవరికి వాళ్లు మొహుతుర్ చేస్తారు. పంట పొలానికి జొన్న గట్క, పొడికారం, కొబ్బరి కాయ, ఎల్లిపాయ, మోదుగాకులు, గులాల్లను ఒక గంపలో తీసుకెళ్తారు ఆదివాసిల మహిళలు. ఆ మోదుగాకుల్లో ఇంటిల్లిపాది భోజనం చేస్తారు. వ్యవసాయ పనిముట్లను, ఎద్దుల్ని పూజిస్తారు. మరుసటి రోజునుంచి మార్కెట్లో విత్తనాలు కొని.. వీలుని బట్టి పొలంలో వేస్తారు.
పూజ చేశాకే విత్తనాలు వేస్తాం
విత్తనాలకు పూజ చేశాకే భూమిలో నాటుతాం. ఆ తర్వాత నుంచి సాగు పనులన్నీ ప్రారంభిస్తాం. మా ముత్తాతల నుంచి వస్తున్న ఈ ఆచారాన్ని పాటించకపోతే... పంట సరిగా పండదనేది మా నమ్మకం. - కుమ్రం. సోనేరావు
ఇతర గ్రామాలకి వెళ్లరు
గ్రామంలో ముహూర్తం పెట్టిన రోజు పెద్దలే కాదు చిన్న పిల్లలు కూడా సంబురంగా వేడుకలు జరుపుకుంటారు. పిల్లలంతా ఒక చోటచేరి భోజనాలు చేస్తారు. తర్వాత గ్రామంలో బుర్రో తుప్పో ( బంతి ఆట) ఆడతారు. కొన్ని గ్రామాల్లో విల్లు దండ ఆటను కూడా ఆడతారు పిల్లలు. అలాగే విజంగ్ మొహుతుర్ వేడుకలు జరుపుకునేటప్పుడు ఆదివాసులు తమ ఇండ్లలో ఇతర శుభకార్యాలు పెట్టుకోరు. ఈ పండుగ సమయంలో పెండ్లి, గృహ ప్రవేశాలు, నామకరణం లాంటి వేడుకలు పెట్టుకోవడం అపచారంగా భావిస్తారు. అందుకే మొహుతుర్ ముహూర్తం పెట్టినప్పట్నించీ విత్తనాలు వేయడం పూర్తి చేసేంత వరకు ఇతర గ్రామాలకి వెళ్లరు. షేవింగ్, కటింగ్ కూడా చేయించుకోరు. ::: మసాదే. సంతోష్ కుమార్, ఆసిఫాబాద్, వెలుగు
