- నాగార్జున సాగర్ క్వార్టర్స్ను సొంతం చేసుకుంటున్న నేతలు
- 1,091 మంది జాబితాలో పొలిటీషియన్లు, ఇతర ప్రముఖులు
- లక్షల విలువజేసే జాగలు గజం వెయ్యి రూపాయలకే
నల్గొండ, వెలుగు: నాగార్జున సాగర్ ప్రాజెక్టు పరిధిలో కోట్లు పలికే ఎన్ఎస్పీ క్వార్టర్స్ను బీఆర్ఎస్లీడర్లు కారుచౌకగా కొట్టేస్తున్నారు. ఇక్కడ బహిరంగ మార్కెట్లో గజానికి రూ.10 వేల నుంచి రూ.15వేలు పలుకుతుండగా, కేవలం వెయ్యి చొప్పున చెల్లించి సొంతం చేసుకుంటున్నారు. వీరిలో బీఆర్ఎస్ ఎంపీలు, ఎమ్మెల్యేలు, ఎమ్మెల్సీలు, మాజీ ప్రజాప్రతినిధులు ఉన్నారు. ప్రభుత్వ స్థలాలను రెగ్యులరైజ్ చేసేందుకు సర్కారు తెచ్చిన జీఓ నెం. 59ని ఇందుకు ఉపయోగించుకుంటున్నారు. నాగార్జునసాగర్ప్రముఖ పర్యాటక ప్రాంతం కావడం, ప్రపంచస్థాయి ప్రమాణాలతో నిర్మించిన బుద్ధవనం అందుబాటులోకి రావడంతో నందికొండ మున్సిపాలిటీ పరిధిలోని భూములకు డిమాండ్ అమాంతం పెరిగింది. మొదట తెచ్చిన జీఓలో 2014, జూన్ 2 వరకే కటాఫ్ పెట్టిన ప్రభుత్వం ఇటీవల దానిని 2020 జూన్ 2 వరకు పొడిగించింది. దీంతో తెలంగాణ వచ్చాక ఆక్రమించుకున్న సర్కారు జాగలను సైతం లీడర్లు ఈజీగా తమ ఖాతాలో వేసుకుంటున్నారు.
నాగార్జున సాగర్లో 1091 క్వార్టర్లు..
నాగార్జున సాగర్ ప్రాజెక్టు నిర్మాణ సమయంలో వివిధ ప్రాంతాల నుంచి వచ్చిన ఇంజినీర్లు, ఉద్యోగులు ఉండేందుకు వీలుగా ప్రభుత్వం 1,091 క్వార్టర్లను నిర్మించింది. కాలక్రమంలో ఈ క్వార్టర్లు అనేక మంది చేతులు మారుతూ వచ్చాయి. నాగార్జున సాగర్ ప్రముఖ టూరిస్ట్ ప్లేస్కావడం, ఇక్కడి ల్యాండ్కు ఫుల్ డిమాండ్ఉండడంతో పొలిటికల్ లీడర్లు, పోలీస్ ఆఫీసర్లు, రిటైర్డ్ జడ్జీలు.. ఇలా ఎంతో మంది ప్రముఖులు క్వార్టర్లను ఆక్రమించారు. మొదట్లో గెస్ట్హౌస్ పేరుతో అలాట్మెంట్ చేయించుకుని అక్కడే ఏళ్ల తరబడి తిష్ట వేశారు. ఇక్కడ గెస్ట్హౌస్ ఉండడం ప్రెస్టేజ్సింబల్గా మారడంతో ఉమ్మడి నల్గొండ జిల్లా నేతలతో పాటు రాష్ట్రంలోని పలువురు ప్రముఖులు కూడా పైరవీ చేసుకొని కొందరు సొంత పేర్లతో, ఇంకొందరు బినామీ పేర్లతో క్వార్టర్స్ సంపాదించారు. తెలంగాణ వచ్చాక క్వార్టర్లను జాగాతో సహా రెగ్యులరైజ్ చేయాలనే డిమాండ్లు తెరపైకి తెచ్చారు. ఈ క్రమంలో సాగర్బై ఎలక్షన్స్ రావడంతో ఎన్నికల ప్రచారానికి వచ్చిన సీఎం కేసీఆర్.. నందికొండలోని క్వార్టర్లలో నివాసముంటున్న వారందరికీ పర్మినెంట్హక్కులు కల్పిస్తామని హామీ ఇచ్చారు. ఈ మేరకు కలెక్టర్ అధ్యక్షతన ఇరిగేషన్ ఆఫీసర్లతో ఓ కమిటీ కూడా వేశారు. పలుదఫాలుగా సర్వే చేసిన కమిటీ.. ఫైనల్గా హిల్ కాలనీలోని 6 61, పైలాన్ కాలనీలోని 430 క్వార్టర్స్ మొత్తంగా1,091 క్వార్టర్లకు శాశ్వత హక్కు కల్పించాలని సూచించింది.
మొదటి నుంచీ లీడర్ల మకాం
తెలంగాణ ఏర్పాటుకు ముందు ఈ క్వార్టర్లలో సీనియర్ లీడర్జానారెడ్డితో పాటు అప్పటి ఎమ్మెల్యేలు, కాంగ్రెస్ లీడర్లు మకాం పెట్టారు. 2014లోనే ఎంపీ హోదాలో గుత్తా సుఖేందర్రెడ్డి ఓ క్వార్టర్ఆక్రమించారు. తెలంగాణ వచ్చాక ఈ క్వార్టర్స్ పై బీఆర్ఎస్ నేతల కన్ను పడింది. పాత ఠాణాగా కొనసాగిన క్వార్టర్లో ఎంపీ కేశవరావుకు, పాత పోలీస్ స్టేషన్ గెస్ట్హౌజ్గా కొనసాగిన క్వార్టర్లో మంత్రి జగదీశ్రెడ్డి పాగా వేశారు. ఉప ఎన్నికల టైంలో ఎమ్మెల్సీ, నల్గొండ జిల్లా పార్టీ వ్యవహారాల ఇన్చార్జి తక్కెళ్లపల్లి రవీందర్రావు ఓ క్వార్ట ర్ ఆక్రమించారు. తర్వాత టీఆర్ఎస్ రాష్ట్ర నాయకుడు గడ్డంపల్లి రవీందర్ రెడ్డి క్వార్టర్ పొందారు. ఆ తర్వాత మంత్రి జగదీశ్రెడ్డి, మండలి చైర్మన్ సుఖేందర్ రెడ్డి ముఖ్య అనుచరులకు కూడా క్వార్టర్స్ అలాట్ చేయడంతో ఈ వ్యవహారం కాస్తా రచ్చకెక్కింది. దీనిపై కొందరు కోర్టు మెట్లు ఎక్కడంతో కేటాయింపుల ప్రక్రియను అర్ధంతరంగా ఆపేశారు. కానీ ప్రభుత్వ పెద్దల ఒత్తిళ్లతో ఇరిగేషన్ ఆఫీసర్లు గుట్టుచప్పుడు కాకుండా మరో 150 మందికి అలాట్మెంట్ ఆర్డర్లు ఇచ్చేశారు. ఈ క్రమంలో ఒక్కొక్కరి నుంచి రూ.2 లక్షల వరకు వసూలు చేసినట్లు అప్పట్లో ఆరోపణలు వచ్చాయి.
కటాఫ్ తేదీ పొడిగింపుతో..
ప్రభుత్వ భూముల్లో ఉన్న ఇండ్లను, ఇండ్ల స్థలాలను రెగ్యులరైజ్ చేసేందుకు తెలంగాణ వచ్చిన కొత్తలో సర్కారు జీఓ నెం. 59 తెచ్చింది. కాకపోతే 2014 జూన్12కు ముందు ఆక్రమణలో ఉన్న వాటినే రెగ్యులరైజ్ చేస్తామని అప్పట్లో నిబంధన పెట్టింది. దీంతో తెలంగాణ వచ్చేనాటికి సాగర్క్వార్టర్లలో ఉంటున్న ప్రముఖులు అప్లై చేసుకొని, రిజిస్ట్రేషన్ కూడా చేసుకుంటున్నారు. 2014 జూన్ వరకు 630 మందికి డిమాండ్ నోటీసులు జారీ చేయగా, వీరిలో ఇప్పటికే 500 మంది రిజిస్ట్రేషన్ చేయించుకున్నారు. ఇటీవల మండలి చైర్మన్ గుత్తా సుఖేందర్రెడ్డి, ఎమ్మెల్సీ కోటి రెడ్డి, మాజీ ఎమ్మెల్సీ తెర చిన్నపరెడ్డి, వాళ్ల అనుచరులకు పట్టాలు పొందారు. ఇక్కడ బహిరంగ మార్కెట్లో గజానికి రూ.10 వేల నుంచి రూ.15 వేలు పలుకుతుండగా, కేవలం వెయ్యి చొప్పున చెల్లించి సొంతం చేసుకుంటున్నారు. తాజాగా కటాఫ్ తేదీని 2020 జూన్ 2 వరకు పొడిగించడంతో ఎంపీలు కె.కేశవరావు, ఎమ్మెల్యే నోముల భగత్, పలువురు ప్రజాప్రతినిధులతో పాటు సీనియర్ పోలీస్ ఆఫీసర్లు, ఇంటెలిజెన్స్ అధికారులు, హైకోర్టు మాజీ జడ్జిలు కూడా అప్లికేషన్లు పెట్టుకుంటున్నారు. కొత్త అప్లికేషన్లు సుమారు 200 దాకా వచ్చే అవకాశముందని, ఆ మేరకు పట్టాల పంపిణీకి ఏర్పాట్లు చేస్తున్నామని ఆఫీసర్లు చెప్పారు.
