కమీషన్లపై ఉన్న శ్రద్ధ.. పాలసీలపై లేదు : హరీశ్రావు

కమీషన్లపై ఉన్న శ్రద్ధ.. పాలసీలపై లేదు : హరీశ్రావు
  • విద్యుత్ పాలసీ పీపీటీపై హరీశ్​రావు విమర్శలు
  • శ్వేతపత్రంలో ఒకలా, భట్టి చెప్పేది మరోలా ఉందని ఫైర్​ 

హైదరాబాద్, వెలుగు: విద్యుత్​ రంగంపై అసెంబ్లీలో విడుదల చేసిన శ్వేతపత్రం, క్లీన్​ అండ్​ గ్రీన్​ ఎనర్జీ పాలసీపై డిప్యూటీ సీఎం భట్టి విక్రమార్క పీపీటీల్లో చెప్పిన అంశాలకు పొంతన లేదని బీఆర్​ఎస్​ ఎమ్మెల్యే హరీశ్​రావు అన్నారు. డిప్యూటీ సీఎంగా, విద్యుత్​ మంత్రిగా రెండేండ్లు పూర్తి చేసుకున్నా.. సొంత శాఖపైనే ఆయనకు అవగాహన లేదన్నారు. 

భట్టి విక్రమార్క విద్యుత్​ పాలసీ పీపీటీపై హరీశ్​రావు శనివారం కౌంటర్​ ఇచ్చారు. ప్రభుత్వానికి కమీషన్లపై ఉన్న శ్రద్ధ.. పాలసీలపై ఉండి ఉంటే ఇలాంటి పొరపాట్లు జరగవన్నారు. 2023లోనే 6,123 మెగావాట్ల సోలార్​ పవర్​ కెపాసిటీ ఉన్నట్టు శ్వేతపత్రంలో చెప్పారని, ఇప్పుడు క్లీన్​ ఎనర్జీ పాలసీలో 5,415 మెగావాట్లుగా పేర్కొన్నారని గుర్తు చేశారు. అప్పటికి, ఇప్పటికి సోలార్​ పవర్​ కెపాసిటీ ఎలా తగ్గిందని ప్రశ్నించారు. 2,400 మెగావాట్ల థర్మల్​ పవర్​ ప్లాంట్లను నిర్మిస్తామంటూ కేబినెట్​లో లక్ష్యంగా నిర్దేశించుకున్నారని, కానీ, క్లీన్​ ఎనర్జీ పాలసీలో 1,729 మెగావాట్లుగానే చూపించారని విమర్శించారు. 

ఏపీ విభజనచట్టం ప్రకారం 1,600 మెగావాట్ల ఎన్టీపీసీ పవర్​ అందుబాటులో ఉండగా.. ఎన్టీపీసీతో ఒప్పందం చేసుకోకుండా ఎందుకు హడావుడిగా 2,400 మెగావాట్ల థర్మల్​ పవర్​ ప్లాంట్ల నిర్మాణానికి వెళ్తున్నారని ఆయన ప్రశ్నించారు. ఇది అక్షరాలా రూ.50 వేల కోట్ల కుంభకోణమని మండిపడ్డారు. 

2030 నాటికి 20 వేల మెగావాట్ల రెన్యువబుల్​ ఎనర్జీని తీసుకొస్తామని పాలసీలో పేర్కొన్నారని, రాబోయే ఐదేండ్లలో 13 వేల మెగావాట్ల సోలార్​ ఎనర్జీని తీసుకురావాల్సి ఉండగా.. థర్మల్​ ప్లాంట్లను ఎందుకు కడుతున్నారని ప్రశ్నించారు. 

రామగుండం పవర్​ ప్లాంట్​కు ఒక్క మెగావాట్​ విద్యుత్​ తయారీకి రూ.14 కోట్లు ఖర్చవుతుందని మంత్రులే ప్రెస్​ కాన్ఫరెన్స్​లో చెప్పారని, ఎన్టీపీసీ ద్వారా అయితే రూ.12.3 కోట్లే అవుతుందని అన్నారు. ఒక్క మెగావాట్​కు రూ.2 కోట్లు ఎందుకు పెరిగిందనే విషయం చెప్పకుండా.. డీపీఆర్​ ఇంకా సిద్ధం చేయలేదని ఎందుకు బుకాయిస్తున్నారని ప్రశ్నించారు.