హైదరాబాద్, వెలుగు: మాజీ సీఎం, బీఆర్ఎస్ అధినేత కేసీఆర్తో మాజీ మంత్రి, ఆ పార్టీ ఎమ్మెల్యే హరీశ్ రావు మరోసారి భేటీ అయ్యారు. బుధవారం ఎర్రవల్లి ఫాంహౌస్లో కేసీఆర్తో సమావేశమైన హరీశ్.. కాళేశ్వరం కమిషన్ ఇచ్చిన నోటీసులపై చర్చించినట్టు తెలిసింది. ఇప్పటికే ఈ వారంలో రెండు సార్లు భేటీ అయిన ఇద్దరు నేతలు.. ఇప్పుడు మరోసారి సమావేశం కావడం ప్రాధాన్యం సంతరించుకున్నది.
కమిషన్ విచారణకు హాజరవ్వాలని కేసీఆర్ నిర్ణయించారన్న చర్చ జరుగుతున్న నేపథ్యంలో.. కమిషన్ అడిగే ప్రశ్నలకు ఎలా స్పందించాలన్న దానిపై ఇద్దరు నేతల మధ్య డిస్కషన్ జరిగినట్టు తెలిసింది. తమ హయాంలో తీసుకున్న విధాన, ఆర్థికపరమైన నిర్ణయాలపైనా చర్చకు వచ్చినట్టు తెలిసింది. ఇప్పటికే విచారణకు హాజరైన పలువురు ఇంజినీర్ల ద్వారా.. కమిషన్ అడుగుతున్న ప్రశ్నలు, స్పందిస్తున్న తీరు గురించి ఇద్దరు నేతలు ఆరా తీసినట్టు సమాచారం. అందుకు అనుగుణంగానే కమిషన్ విచారణలో ఇచ్చే స్టేట్మెంట్లపై చర్చించినట్టు తెలుస్తున్నది.
వేల కోట్లు దండుకునే నాటకం: హరీశ్
యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ పేరిట వేల కోట్లు దండుకునేందుకు కాంగ్రెస్ ఆడుతున్న మరో నాటకం బయటపడిందని హరీశ్రావు అన్నారు. ‘‘నిరుడు జులై 24న ఆదిలాబాద్లో మాట్లాడిన డిప్యూటీ సీఎం భట్టి విక్రమార్క.. యంగ్ ఇండియా స్కూళ్లను రూ.80 కోట్ల నుంచి రూ.100 కోట్ల వ్యయంతో నిర్మిస్తామని చెప్పారు. కానీ, అదే ఏడాది అక్టోబర్ 11న రూ.125 కోట్ల వ్యయంతో నిర్మిస్తామని రంగారెడ్డి జిల్లా షాద్నగర్ నియోజకవర్గంలో స్కూల్ నిర్మాణానికి శంకుస్థాపన చేసిన సందర్భంగా సీఎం రేవంత్ తెలిపారు”అని హరీశ్రావు గుర్తు చేశారు.
వివిధ జిల్లాల్లో ఏర్పాటు చేసే ఇంటిగ్రేటెడ్ రెసిడెన్షియల్ స్కూల్స్ కు 2025 మే రెండో వారంలో రూ.135- కోట్ల నుంచి రూ.150 కోట్లతో టెండర్లనూ ఖరారు చేశారని తెలిపారు. తాజాగా, ఈ నెల 27న 20 స్కూళ్ల నిర్మాణానికి సంబంధించి రూ.4 వేల కోట్లతో పరిపాలన అనుమతులు మంజూరు చేశారన్నారు. అంటే స్కూళ్ల పనులు మొదలు కాకుండానే ఒక్కో స్కూల్ నిర్మాణ వ్యయాన్ని రూ.200 కోట్లకు పెంచారని ఆరోపించారు.
