- ఫిబ్రవరి 10 వరకు కొనసాగిస్తాం
- హెల్త్ డైరెక్టర్ రవీందర్ నాయక్
ములుగు/తాడ్వాయి, వెలుగు: మేడారం మహాజాతరకు తరలివచ్చే భక్తులకు మెరుగైన వైద్య సేవలందించేందుకు పకడ్బందీ ఏర్పాట్లు చేస్తామని పబ్లిక్ హెల్త్, ఫ్యామిలీ వెల్ఫేర్ డైరెక్టర్ రవీందర్ నాయక్ తెలిపారు. శనివారం మహా జాతరలో మెయిన్ హాస్పిట్ ఏర్పాటు చేసే టీటీడీ కల్యాణ మండపాన్ని, వైద్య శిబిరాలు ఏర్పాటు చేసే స్థలాలను పరిశీలించారు. అనంతరం ములుగు కలెక్టరేట్లో ఉమ్మడి వరంగల్, భద్రాద్రి కొత్తగూడెం జిల్లా వైద్యాధికారులతో వివిధ అంశాలపై రివ్యూ చేశారు.
ఈ సందర్భంగా ఆయన మాట్లాడుతూ జాతరకు వచ్చే భక్తులకు మెరుగైన వైద్య సేవలు అందించేందుకు డిసెంబర్ 25 నుంచి ఫిబ్రవరి 10 వరకు వైద్య శిబిరాలు ఏర్పాటు చేస్తామని తెలిపారు. జాతరలో వైద్యాధికారులు, సిబ్బంది ఒత్తిడికి లోనుకాకుండా విధులు నిర్వర్తించాలని, బాధ్యతగా భక్తులకు సేవలు అందించాలని సూచించారు. వరంగల్ ఎంజీఎం, భూపాలపల్లి, ములుగు జిల్లా ఆసుపత్రుల నుంచి వైద్యులు, సిబ్బందిని సమకూర్చుతామని చెప్పారు.
340 రకాల మందులు, సర్జికల్ పరికరాలు, 19 అంబులెన్స్ లు, 19 బైక్ అంబులెన్స్లను అందుబాటులో ఉంచుతామని తెలిపారు. ఫస్ట్ రిఫెరల్ సర్వీస్ కోసం తాడ్వాయి పీహెచ్సీ, సెకండ్ రిఫరల్ సేవలకు ఏటూరునాగారం, ములుగు ప్రభుత్వ వైద్యశాలలు, మెరుగైన వైద్య సేవలకు వరంగల్ ఎంజీఎంను ఉపయోగించుకుంటామని చెప్పారు. ఉమ్మడి వరంగల్ డీఎంహెచ్వోలు గోపాల్ రావు, అల్లెం అప్పయ్య, సాంబశివరావు, మధుసూదన్, మల్లికార్జున్, రవి రాథోడ్, ప్రసాద్, డిప్యూటీ డీఎంహెచ్వోలు విపిన్ కుమార్, క్రాంతి కుమార్, ప్రోగ్రాం ఆఫీసర్లు పవన్ కుమార్, శ్రీకాంత్ పాల్గొన్నారు.
మేడారం జాతరలో కరెంట్ పనులు స్పీడప్..
హనుమకొండ: మేడారం జాతరకు సంబంధించిన విద్యుత్ సప్లై పనులు స్పీడప్ చేశామని ఎన్పీడీసీఎల్ సీఎండీ కర్నాటి వరుణ్ రెడ్డి తెలిపారు. హనుమకొండ విద్యుత్ భవన్ నుంచి ఎస్ఈలు, డీఈలు, ఎస్ఏవోలతో శనివారం వీడియో కాన్ఫరెన్స్ నిర్వహించారు. ఈ సందర్భంగా సీఎండీ మాట్లాడుతూ మేడారం జాతరలో ఇప్పటివరకు 7. 5 కిలోమీటర్ల మేర కవర్డ్ కండక్టర్ పనులు జరిగాయని, కొత్తగా 50 ట్రాన్స్ఫార్మర్లు ఏర్పాటు చేశామని, 20 కిలోమీటర్ల లైన్ల పనులు పూర్తి చేశామని చెప్పారు.
మిగిలిన పెండింగ్ పనులను యుద్ధప్రాతిపదికన పూర్తి చేయాలని ఆదేశించారు. అదనంగా 5 ఎంవీఏ పవర్ ట్రాన్స్ఫార్మర్ ను సమ్మక్క సబ్ స్టేషన్లో పెడుతున్నామని, జంపన్న వాగు వద్ద కొత్తగా మూడు టవర్ పోల్స్ ఏర్పాటు చేస్తున్నామని తెలిపారు. డైరెక్టర్లు వి.మోహన్ రావు, వి.తిరుపతి రెడ్డి, సి.ప్రభాకర్, సీఈలు టి.సదర్ లాల్, కె.తిరుమల్ రావు, కె.రాజు చౌహన్, అశోక్, అన్నపూర్ణ, సురేందర్, శ్రవణ్ కుమార్, జయవంత్ రావు చౌహాన్, సీజీఎంలు చరణ్ దాస్, కిషన్ తదితరులు పాల్గొన్నారు.
