హైదరాబాద్ సిటీలో భారీ వర్షం కురుస్తోంది. గురువారం (సెప్టెంబర్ 25) అర్ధరాత్రి నుంచి ఎడతెరిపి లేకుండా వర్షం పడుతోంది. నగరంలోని జూబ్లీహిల్స్, బంజారాహిల్స్, ఖైరతాబాద్, లక్డీకపూల్, ఎర్రమంజిల్, నాంపల్లి, దిల్ సుఖ్ నగర్, ఫిలింనగర్, పంజాగుట్ట, సోమాజిగూడ, అమీర్పేట, ఎస్సార్ నగర్, సనత్ నగర్, ఎర్రగడ్డ, చాంద్రాయణగుట్ట, ఫలక్ నుమా, సంతోష్ నగర్, కాంచన్ బాగ్, బండ్ల గూడ, ఛత్రినాక, శాలిబండ, బేగంపేట్, రాణిగంజ్, ప్యారాడైజ్, సికింద్రాబాద్ రైల్వే స్టేషన్, జేబీఎస్, బోయిన్ పల్లి, మారేడు పల్లి, అడ్డగుట్ట, మెట్టుగూడ, సీతాఫల్ మండి.. బన్సీలాల్ పేట్, మోండా మార్కెట్, ఎల్బీ నగర్, వనస్థలిపురం, ఉప్పల్, హబ్సిగూడ, తార్నాక తదితర ప్రాంతాల్లో వర్షం కురుస్తోంది.
అర్ధరాత్రి నుంచి కంటిన్యూగా వర్షం పడుతుండటంతో నగరవాసులు తీవ్ర ఇబ్బందులకు గురవుతున్నారు. ఉదయాన్ని ఆఫీసులకు వెళ్లే వారు అవస్థలు పడుతున్నారు. వర్షపు నీరు రోడ్లపైకి చేరడంతో పలు ప్రాంతాల్లో ట్రాఫిక్ జామ్ అయ్యింది. దీంతో వాహనదారులు, ప్రయాణికులు ఇబ్బందులు ఎదుర్కొంటున్నారు. వాతావరణ, ప్రభుత్వ హెచ్చరికల నేపథ్యంలో ఇప్పటికే జీహెచ్ఎంసీ, హైడ్రా, మాన్ సూన్ ఎమర్జెన్సీ టీములు అప్రమత్తమయ్యాయి. వరద ప్రభావిత ప్రాంతాలు, లోతట్టు ప్రాంతాల్లో సహయక చర్యలు చేపట్టాయి. రాబోయే రెండు గంటల పాటు హైదరాబాద్ లో మోస్తారు నుంచి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది.
వచ్చే 23 గంటల్లో ఈ జిల్లాల్లో భారీ వర్షాలు:
వచ్చే 23 గంటల్లో తెలంగాణ వ్యాప్తంగా తేలికపాటి జల్లులతో పాటు భారీ వర్షాలు కురుస్తాయని వాతావరణ కేంద్రం ప్రకటించింది. ఆదిలాబాద్, జగిత్యాల, కొమరం భీమ్ ఆసిఫాబాద్, మహబూబ్ నగర్, నారాయణపేట, నిర్మల్, నిజామాబాద్, జిల్లాలలో తదుపరి 2-3 గంటల్లో తేలికపాటి వర్షం కురుస్తుందని తెలిపింది. గరిష్ట ఉపరితల గాలి వేగం గంటకు 40 కి.మీ కంటే తక్కువ (గాలులలో) తేలికపాటి ఉరుములతో కూడిన వర్షాలు వచ్చే అవకాశం వుందని పేర్కొంది.
హైదరాబాద్, జనగాం, కామారెడ్డి, కరీంనగర్, మెదక్, మేడ్చల్ మల్కాజిగిరి, పెద్దపల్లి, రాజన్న సిరిసిల్ల, రంగారెడ్డి, సంగారెడ్డి, సిద్దిపేట, వికారాబాద్, వరంగల్, హన్మకొండ, యాదాద్రి భువనగిరి, జిల్లాలలో తదుపరి 2-3 గంటల్లో మోస్తరు వర్షం తో పాటు గంటకు 41 - 61 కి.మీ.ల మధ్య గరిష్ట ఉపరితల గాలి వేగంతో మోస్తరు ఉరుములతో కూడిన వర్షాలు వచ్చే అవకాశం వుందని అధికారులు తెలిపారు.
