టాలీవుడ్ యంగ్ హీరో సందీప్ కిషన్(Sandeep Kishan) ఇటీవలే ఊరు పేరు భైరవకోన(Ooru Peru Bhairavakona) సినిమాతో మంచి విజయాన్ని అందుకున్నాడు. దర్శకుడు వీఐ ఆనంద్(VI Anand) తెరకెక్కించిన ఈ ఫాంటసీ థ్రిల్లర్ మూవీ ఓవర్ ఆల్ గా రూ.27 కోట్ల గ్రాస్ కలెక్షన్స్ రాబట్టి నిర్మాతలకు మోస్తారు లాభాలు తెచ్చిపెటింది. ఇక చాలా కాలంగా హిట్ కోసం ఎదురుచూస్తున్న సందీప్ కు ఈ సినిమా మంచి కంబ్యాక్ ఇచ్చింది. ఈ విజయం అందించిన ఊపుతో మరో కొత్త సినిమాను మొదలుపెట్టేశాడు ఈ యంగ్ హీరో.
దర్శకుడు త్రినాధరావు నక్కినతో తన నెక్స్ట్ సినిమాను చేయబోతున్నాడు సందీప్. దీనికి సంబందించిన అధికారిక ప్రకటన కూడా వచ్చేసింది. #SK30 వర్కింగ్ టైటిల్ తో వస్తున్న ఈ సినిమాని ఏకే ఎంటర్‌టైన్‌మెంట్స్, హాస్య మూవీస్ బ్యానర్స్ సంయుక్తంగా నిర్మిస్తున్నారు. ఇక త్రినాధరావు ఇటీవలే మాస్ మహారాజ్ రవితేజతో ధమాకా లాంటి భారీ హిట్ అందించాడు. ఈ సినిమా బాక్సాఫీస్ దగ్గర రూ.100 కోట్ల గ్రాస్ రాబట్టిన విషయం తెలిసిందే. దీంతో సందీప్ కిషన్, త్రినాధరావు సినిమాపై ఇప్పటినుండే అంచనాలు ఏర్పడుతున్నాయి.
ఇక ఈ కొత్త సినిమాకు కూడా ధమాకా సినిమాకు కథ అందించిన ప్రసన్న కుమార్ బెజవాడ కథని అందిస్తున్నాడు. పక్కా కామెడీ అండ్ కమర్షియల్ ఎంటర్‌టైనర్‌గా రాబోతున్న ఈ సినిమా పూర్తి వివరాలు త్వరలోనే ప్రకటించనున్నారు మేకర్స్. మరి ఈ సినిమాతో సందీప్ కిషన్ ఎలాంటి విజయాన్ని అందుకుంటాడో చూడాలి.
