హైదరాబాద్సిటీ, వెలుగు: హైదరాబాద్ బ్రాండ్ ఇమేజీని పెంచడానికి, ఫ్యూచర్ సిటీలో భారీ పెట్టుబడులు రాబట్టేందుకు రంగారెడ్డి జిల్లా మీర్ఖాన్పేటలో రాష్ట్ర ప్రభుత్వం వచ్చే నెల 8, 9 తేదీల్లో తెలంగాణ రైజింగ్ గ్లోబల్ సమిట్ నిర్వహిస్తున్నది. ఈ క్రమంలో దేశ విదేశాల సంస్థల ప్రతినిధులను ఆకట్టుకునే విధగా హెచ్ఎండీఏ అర్బన్ ఫారెస్ట్రీ విభాగం ఈ ప్రాంతాన్ని పూర్తిగా గ్రీనరీగా మార్చుతోంది. రకరకాల పూల చెట్లు, ఆకట్టుకునే ల్యాండ్‌ స్కేపింగ్తో సమిట్ ప్రాంతం నుంచి 3 కి.మీ. పొడవునా సెంట్రల్ మీడియన్, అవెన్యూ ప్లాంటేషన్లు, జంక్షన్లను ఆకర్షణీయంగా రూపొందించబోతున్నట్లు అధికారులు తెలిపారు. 10 కి.మీ. పరిధిలో ఎటువైపు చూసినా గ్రీనరీ ఉట్టిపడేలా.. ప్రతినిధులకు ఆహ్లాదం కలిగేలా ఫ్యూచర్సిటీ రాబోయే అందాలను ఒక మోడల్గా అనేక కార్యక్రమాలు చేపడుతున్నట్లు హెచ్ఎండీఏ డైరెక్టర్ ప్రసాద్ తెలిపారు.
ఎలాంటి పొరపాట్లుకు తావివ్వొద్దు
రంగారెడ్డి కలెక్టరేట్: గ్లోబల్ సమిట్ ఏర్పాట్లలో ఎక్కడ ఎలాంటి పొరపాట్లుకు తావివ్వకుండా పనులు పూర్తి చేయాలని రంగారెడ్డి కలెక్టర్ సి. నారాయణ రెడ్డి సంబంధిత అధికారులను ఆదేశించారు. మీర్ఖాన్పేటలో సమిట్ ఏర్పాట్ల పనులను శనివారం ఆయన పరిశీలించారు.
దేశవిదేశాల నుంచి డెలిగేట్స్ వస్తున్న నేపథ్యంలో శంషాబాద్ విమానాశ్రయం నుంచి సమిట్ జరిగే ప్రాంతం వరకు రోడ్లపై ఎక్కడ ఎలాంటి చెత్త , గుంతలు లేకుండా, నీరు నిల్వ లేకుండా చర్యలు చేపట్టాలని ఆదేశించారు. కలెక్టర్ వెంట జిల్లా అదనపు కలెక్టర్ శ్రీనివాస్, కందుకూర్ ఆర్డీవో జగదీశ్వర్ రెడ్డి, మున్సిపల్ కమిషనర్లు, ఆర్ అండ్ బి అధికారులు, నేషనల్ హైవే అధికారులు, సంబంధిత ఇతర శాఖల అధికారులు తదితరులు పాల్గొన్నారు.
