ప్లీజ్ సార్ మాకు ఒక్క అడ్మిషన్ ఇవ్వండి..ఇది ఏదో ప్రైవేట్ పాఠశాలలో వినిపిస్తున్న మాట కాదు..ప్రభుత్వ పాఠశాలలోనే. అవును సిద్ధిపేట జిల్లా కేంద్రంలోని ఇందిరానగర్ స్కూల్లో వినిపిస్తున్న మాట ఇది. ఎంతోమంది విద్యార్థులు ఈ పాఠశాలలో అడ్మిషన్ కోసం క్యూ కడుతున్నారు. ఒక్క సీటు ఇవ్వాలంటూ స్కూల్ హెడ్ మాస్టర్ ను కోరుతున్నారు. అయితే 6వ తరగతిలో ఉన్న 160 సీట్ల కోసమే అడ్మిషన్లు తీసుకుంటున్నామని..మొదట ప్రభుత్వ పాఠశాలలో చదివిన విద్యార్థులకు అవకాశం కల్పిస్తున్నట్లు హెచ్ఎం తెలిపారు. ఆ తర్వాతే ప్రైవేట్ పాఠశాలల విద్యార్థులకు అవకాశం కల్పిస్తామన్నారు. టీచర్లు సరిపడా లేకపోవడంతో అందరికీ అడ్మిషన్స్ ఇవ్వలేమని హెచ్ఎం స్పష్టం చేశారు. కాగా ప్రస్తుతం ఈ స్కూల్లో 1230మంది ఉన్నారు.
ఈ బడికి ఎందుకు అంత డిమాండ్
సకల హంగులతో ప్రైవేట్ పాఠశాలలకు దీటుగా ఆదర్శంగా నిలుస్తోంది ఈ పాఠశాల. విద్యార్థులకు ఎటువంటి ఇబ్బందులు తలెత్తకుండా అన్ని సౌకర్యాలు ఉన్నాయి. ఇంగ్లీష్ బోధన కూడా ఉండడంతో విద్యార్థులు ఈ పాఠశాలకు క్యూ కడుతున్నారు. ఈ సారే కాదు ప్రతి సారి ఈ స్కూల్లో ఇదే పరిస్థితి. నో అడ్మిషన్స్ అని బోర్డు పెట్టే సన్నివేశం ఈ పాఠశాలలోనే ప్రత్యేకంగా కన్పిస్తుంటుంది. సాధారణంగా సర్కార్ బడి అంటే సదువు సరిగ్గా ఉండదనే అనే భావన ప్రజల్లో ఉంటుంది. దానిని ఈ పాఠశాల బ్రేక్ చేస్తోంది. అడ్మిషన్ల కోసం టీచర్లు తిరిగే రోజుల నుండి విద్యార్థుల తల్లిదండ్రులే అడ్మిషన్ కోసం పడిగాపులు కాయాల్సిన పరిస్థితిని ఈ స్కూల్ తీసుకొచ్చింది. ఇక ఈ పాఠశాలలో అడ్మిషన్ కోసం కొందరు తల్లిదండ్రులు ప్రజాప్రతినిధులు,అధికారులతో రికమండేషన్లు చేయిస్తున్నారని కూడా సమాచారం.
