హైదరాబాద్ ఎర్రగడ్డకు చెందిన ఓ డాక్టర్ కు ఫేస్ బుక్ లో పరిచయమైన ఓ మహిళ రూ.14 కోట్లు కుచ్చు టోపీ పెట్టిన సంగతి తెలిసిందే. ఫేస్ బుక్ లో పరిచయమైన మహిళ తాను విడోనని చెప్పి డాక్టర్ కు పరిచయమైనట్టుగా హైదరాబాద్ సైబర్ సెక్యూరిటీ బ్యూరో డీఎస్పీ కేవీఎం ప్రసాద్ తెలిపారు.
పోలీసుల వివరాల ప్రకారం.. ఫేస్ బుక్ లో డాక్టర్ కు మహిళ నుంచి ఫ్రెండ్ రిక్వెస్ట్ వచ్చింది . ఫ్రెండ్ రిక్వెస్ట్ యాక్సెప్ట్ చేసిన అనంతరం తాను వీడో అని పరిచయం చేసుకుని మాటలు కలిపింది. తాను పనిచేస్తున్న సిఎన్సి కంపెనీలో పెట్టుబడులు పెడితే రెట్టింపు లాభాలు వస్తాయని నమ్మించింది. దీంతో డాక్టర్ ఆమె మాటలు నమ్మి సెప్టెంబర్ నుంచి పెట్టుబడులు పెట్టడం ప్రారంభించారు. ఒక్కసారి వచ్చిన లాభాల్లో 86 వేలు విత్ డ్రా చేసుకున్నారు. దాంతో నమ్మకం కుదరడంతో విడతలవారీగా తనకున్న ఆస్తులను కుదువ పెట్టి రూ.14 కోట్లు పెట్టుబడులు పెట్టారు.
అమౌంట్‌ విత్ డ్రా చేసుకోవాలంటే 30 శాతం ట్యాక్స్ కింద రూ.7.5 కోట్లు చెల్లించాలని సూచించారు. ఇందులోనూ తన తరుఫున 50 శాతం ట్యాక్స్ చెల్లించాలని మోనికా పేరుతో డాక్టర్‌‌‌‌ను ట్రాప్ చేసిన సైబర్ నేరగాళ్లు పట్టుబట్టారు. నవంబర్ 26 వరకు 60 రోజుల వ్యవధిలో మొత్తం రూ.14.61 కోట్లు ఆ డాక్టర్ నుంచి కొల్లగొట్టారు. దీంతో మోసపోయానని గుర్తించిన డాక్టర్.. నవంబర్ 27న సైబర్ సెక్యూరిటీ బ్యూరోను ఆశ్రయించాడు. చాటింగ్‌‌లకు సంబంధించి స్క్రీన్‌ షాట్స్, బ్యాంక్ ట్రాన్సాక్షన్స్, ఆన్‌‌లైన్ ట్రేడింగ్ ప్లాట్‌‌ఫామ్‌ వివరాలను వారికి అందించాడు.
14 కోట్ల రూపాయలను సైబర్ నేరగాళ్లు పలు మ్యూల్ అకౌంట్లోకి మళ్ళించారు. అయితే కేవలం కోటి 20 లక్షల రూపాయల మాత్రమే ఫ్రీజ్ చేయగలిగాం. అపరిచిత వ్యక్తుల నుంచి వచ్చే ఫ్రెండ్ రిక్వెస్ట్ లో మెసేజ్ ల విషయంలో అప్రమత్తంగా ఉండాలి. అత్యాశ వల్ల చాలామంది మోసపోతున్నారు.. సైబర్ నేరగాళ్ళ పట్ల అప్రమత్తంగా ఉండాలని హెచ్చరించారు.
