హైటెక్‌‌ సిటీ అడ్డాగా ఆస్ట్రేలియన్ల అకౌంట్లకు కన్నం.. 42 మంది నుంచి రూ.10 కోట్లు కొల్లగొట్టిన ముఠా

• 42 మంది నుంచి రూ.10 కోట్లు కొల్లగొట్టిన ముఠా
• రిట్జ్‌‌ ఐటీ సొల్యూషన్స్‌‌ పేరుతో ఫేక్ కస్టమర్ సపోర్ట్‌‌ సెంటర్
• కంప్యూటర్ హ్యాక్‌‌ అయిందని ఆస్ట్రేలియన్లకు మెయిల్స్, పాప్‌‌ అప్స్‌‌
• ఇంటర్నెట్‌‌ బ్యాంకింగ్‌‌ ఐడీలు హ్యాక్, క్యాష్  ట్రాన్స్‌‌ఫర్‌‌‌‌ 
• మోసాలకు ఇండియన్ స్టూడెంట్స్‌‌ అకౌంట్లు
• 9 మంది అరెస్ట్‌‌..పరారీలో ఇద్దరు నిర్వాహకులు

హైదరాబాద్‌‌,వెలుగు: హైటెక్‌‌ సిటీ కేంద్రంగా ఆస్ట్రేలియా సిటిజన్ల కంప్యూటర్లు, బ్యాంక్ అకౌంట్లను కొల్లగొడుతున్న హైటెక్‌‌ ఫేక్‌‌ కాల్‌‌సెంటర్‌‌‌‌ గుట్టు రట్టయింది. 42 మంది ఆస్ట్రేలియన్ల నుంచి రూ.10 కోట్లు కొల్లగొట్టిన ముఠా పోలీసులకు చిక్కింది. ‘మీ కంప్యూటర్‌‌ హ్యాక్‌‌ అయింది.. ప్రాబ్లం సాల్వ్‌‌ చేస్తాం’  అంటూ ఫేక్ మెయిల్స్, పాప్‌‌ అప్స్‌‌ పంపిస్తున్న కాల్‌‌ సెంటర్‌‌‌‌పై బాలానగర్ ఎస్‌‌వోటీ పోలీసులు శనివారం దాడి చేశారు. బెంగాల్‌‌కు చెందిన ఏడుగురు టెలీకాలర్స్, ఖమ్మం జిల్లాకు చెందిన ఇద్దరు కాల్‌‌ సెంటర్ నిర్వాహకులుసహా 9 మందిని అరెస్ట్‌‌ చేశారు. 12 కంప్యూటర్లు, రెండు రూటర్లు, థార్‌‌‌‌ వెహికిల్‌‌, 45 ఆస్ట్రేలియా బ్యాంకు ఖాతాల వివరాలు స్వాధీనం చేసుకున్నారు. మాదాపూర్‌‌‌‌లోని అయ్యప్ప సొసైటీలో నిర్వహిస్తున్న ఫేక్ కాల్‌‌ సెంటర్ వివరాలను బాలానగర్ ఎస్‌‌వోటీ డీసీపీ శోభన్‌‌తో కలిసి సైబరాబాద్ సైబర్ క్రైమ్ డీసీపీ సుధీంద్ర వెల్లడించారు.

ఆస్ట్రేలియన్లే టార్గెట్‌‌గా.. ‌‌

మాదాపూర్‌‌లోని అయ్యప్ప సొసైటీలో ఖమ్మం జిల్లాకు చెందిన అన్నదమ్ములు ప్రవీణ్‌‌, ప్రకాశ్‌‌..  రిట్జ్‌‌ ఐటీ సొల్యూషన్స్‌‌ పేరుతో నిరుడు నకిలీ కస్టమర్‌‌‌‌ కేర్‌‌‌‌ కాల్‌‌ సెంటర్‌‌ ఏర్పాటు చేశారు. ఇంటర్నేషనల్ కాల్‌‌ సెంటర్‌‌‌‌ అని చెప్పి టెలీకాలర్స్‌‌ను నియమించారు. ఇదే కాల్ సెంటర్‌‌‌‌లో ఖమ్మం జిల్లా కల్లూరు మండలం లింగాల గ్రామానికి చెందిన యేపూరి గణేష్‌‌ (30), వెంసూర్‌‌‌‌ మండలం లింపాల్‌‌కు చెందిన మారంపాడు చెన్నకేశవ(26)కు టెలీకాలర్లు, కాల్‌‌ సెంటర్‌‌‌‌ ఆపరేటర్‌‌‌‌గా బాధ్యతలు అప్పగించారు. 

ఆస్ట్రేలియాలో చదువుకునే విద్యార్థులుసహా డార్క్‌‌వెబ్‌‌లో ఆస్ట్రేలియన్‌‌ సిటిజన్ల ఈ మెయిల్‌‌ ఐడీలు, ఇతర వ్యక్తిగత వివరాలను సేకరించారు. వారి యాస స్పష్టంగా మాట్లాడేందుకుగాను కోల్‌‌కతాకు చెందిన యువతులు మౌమిత మండల్‌‌(27), ఇజాజ్‌‌ అహ్మద్‌‌(42), సంబిత్‌‌రాయ్‌‌(27), శనిక్‌‌ బెనర్జీ(24), మౌమిత మల్లిక్‌‌(33), శిల్పి సమద్దర్‌‌(33), కునాల్‌‌సింగ్‌‌(37)ను టెలీకాలర్లుగా నియమించుకున్నారు.

మెయిల్స్, పాప్ అప్స్‌‌ పంపిస్తూ.. 

రిట్జ్‌‌ ఐటీ సొల్యూషన్స్‌‌ నుంచి ఆస్ట్రేలియన్​సిటిజన్లకు నకిలీ మెయిల్స్‌‌/ పాపప్స్‌‌ పంపించేవారు.‘మీ కంప్యూటర్‌‌ హ్యాక్‌‌ అయింది.. ప్రాబ్లం పరిష్కరించాలనుకుంటే వెంటనే కస్టమర్‌‌ కేర్‌‌ను సంప్రదించాలి’ అంటూ తమ ఫోన్‌‌ నెంబరు పంపిస్తున్నారు. ఇలా ఆస్టేలియన్లు చేసే కాల్స్‌‌ రూటింగ్‌‌ కోసం వీవోఐసీ (వాయిస్‌‌ ఓవర్‌‌ ఇంటర్నెట్‌‌ ప్రొటోకాల్‌‌) సర్వీస్‌‌ ఎక్స్‌‌లైట్‌‌ యాప్‌‌ను ఉపయోగించారు. కాల్‌‌సెంటర్‌‌ నుంచి మాట్లాడే టెలీకాలర్లు సాయం అందించాలంటే సమస్య ఏంటో తెలుసుకోవాలంటూ.. ఎనీడెస్క్‌‌ సాఫ్ట్‌‌వేర్‌‌ ద్వారా ఆస్ట్రేలియన్ల కంప్యూటర్లను తమ ఆధీనంలోకి తీసుకునేవారు. సమస్య పరిష్కరిస్తున్నట్లు నటించి.. ఆయా కంప్యూటర్లలో బ్యాంకు ఆన్‌‌లైన్‌‌ లాగిన్‌‌ ఐడీలు హ్యాక్‌‌ చేసి వెంటనే డబ్బు బదిలీ చేసుకునేవారు. ఇలా గత రెండేండ్ల వ్యవధిలో ఆస్ట్రేలియన్ల అకౌంట్ల నుంచి రూ.10 కోట్ల వరకూ కొల్లగొట్టారు.

ఆస్ట్రేలియాలో చదువుకునే స్టూడెంట్ల అకౌంట్లతో హవాలా

సాధారణంగా విదేశాల్లో చదువు పూర్తిచేసుకుని ఇండియాకు తిరిగొచ్చే విద్యార్థులు.. ఆయా దేశాల్లో ఓపెన్ చేసుకున్న బ్యాంకు అకౌంట్లను స్థానిక ఏజెంట్లకు కమీషన్ల కింద ఇస్తుంటారు. వీటినే ప్రకాశ్‌‌, ప్రవీణ్‌‌ గ్యాంగ్‌‌ వాడుకున్నది. ఆస్ట్రేలియన్ల నుంచి కొల్లగొట్టిన డబ్బును అక్కడే చదువుకుంటున్న భారతీయ విద్యార్థుల బ్యాంకు ఖాతాలకు మళ్లించి.. హవాలా, క్రిప్టో కరెన్సీ సహా ఇతర మార్గాల్లో ఇండియన్‌‌ కరెన్సీగా మార్చుకొని తీసుకునేవారు.

దాదాపు రెండేండ్లుగా నిర్వహిస్తున్న ఫేక్‌‌ కాల్‌‌ సెంటర్‌‌లో ఉద్యోగులంతా బెంగాలీలు మాత్రమే ఉండడంతో విషయం బయటకు రాలేదు. కాగా,  కార్యాలయ ఉద్యోగుల ప్రవర్తన అనుమానాస్పదంగా ఉందంటూ బాలానగర్‌‌ ఎస్‌‌వోటీ ఇన్‌‌స్పెక్టర్‌‌ శివకుమార్‌‌కు ఇటీవల సమాచారం అందింది. దీంతో పోలీసులు పక్కా సమాచారంతో శనివారం ఉదయం దాడి చేశారు. ప్రధాన నిందితులు ప్రవీణ్, ప్రకాశ్‌‌ మినహా  9 మందిని అదుపులోకి తీసుకున్నారు.