- అధికారుల పర్యవేక్షణ లోపంతో మూసీ పాలవుతున్న తాగునీరు
- హిమాయత్ సాగర్ నిర్వహణ లోపంతో గేట్ల నుంచి లీకేజీ
- గండిపేట్ కాండ్యూట్ కాలువలో లీకేజీలు
హైదరాబాద్ సిటీ, వెలుగు: ఎల్‌‌‌‌నినో, వర్షాభావ పరిస్థితుల ప్రభావంతో నీటి ఎద్దడి ముంచుకొచ్చే ప్రమాదం కనిపిస్తుంటే.. మరోవైపు హైదరాబాద్కు కీలకమైన జంట జలాశయాల నుంచి రోజూ 10 లక్షల లీటర్లకు పైగా తాగునీరు వృథాగా పోతున్నది. ప్రతి చుక్కనూ పొదుపుగా వాడాలని, నీటి వృథాను అరికట్టాలని ప్రచారం చేస్తున్న జలమండలే.. లీకేజీలను అరికట్టడంలో విఫలమవుతున్నదనే విమర్శలు వస్తున్నాయి. హిమాయత్ సాగర్ గేట్ల నుంచి, గండిపేట్ కాండ్యూట్ కాలువలో పలుచోట్ల లీకేజీలతో విలువైన తాగునీరు మూసీలో కలుస్తున్నది. 24 గంటలూ నీరు లీకవుతున్నా అధికారులు పట్టించుకోవడం లేదని స్థానికులు ఆరోపిస్తున్నారు.
హిమాయత్ సాగర్ గేట్ల నిర్వహణ సరిగా లేకపోవడంతో నట్స్, బోల్టుల నుంచి నీరు కారుతున్నది. భవిష్యత్తులో నగర తాగునీటి అవసరాలకు ఈ జలాశయాలే కీలకం కానున్న నేపథ్యంలో లీకేజీలను వెంటనే అరికట్టాల్సిన అవసరం ఉంది. ప్రస్తుతం జలమండలి రోజుకు 585 ఎంజీడీల (2,214.64 లక్షల లీటర్లు) నీటిని సరఫరా చేస్తున్నది. హిమాయత్ సాగర్, ఉస్మాన్ సాగర్ కాండ్యూట్‌‌‌‌ల ద్వారా రోజుకు 10 లక్షల నుంచి 12 లక్షల లీటర్ల నీరు వృథా అవుతున్నదని, ఈ నీరు వెయ్యికి పైగా ఇళ్ల అవసరాలకు సరిపోతుందని నిపుణులు చెబుతున్నారు.
వందేళ్ల కాలువకు లీకేజీల బెడద
గండిపేట్ నుంచి ఆసిఫ్‌‌‌‌నగర్ వరకు నీటిని తరలించే కాండ్యూట్ కాలువకు వందేళ్లకు పైగా చరిత్ర ఉంది. ఈ కాలువ ద్వారా ఆసిఫ్‌‌‌‌నగర్ ఫిల్టర్ కేంద్రానికి చేరిన నీటిని శుద్ధి చేసి నగరానికి సరఫరా చేస్తారు. ఇంతటి ప్రాధాన్యమున్న కాలువలో కోకాపేట, పుప్పాలగూడ, మణికొండ, షేక్‌‌‌‌పేట తదితర ప్రాంతాల్లో లీకేజీలు ఏర్పడ్డాయి. దీంతో నగరానికి చేరాల్సిన నీరు మార్గమధ్యంలోనే వృథా అవుతున్నది. లీకేజీలపై పలుమార్లు ఫిర్యాదు చేసినా అధికారులు తాత్కాలిక మరమ్మతులతోనే సరిపెడుతున్నారని స్థానికులు ఆరోపిస్తున్నారు. కొంతకాలానికే మళ్లీ లీకేజీలు మొదలవుతున్నాయని, శాశ్వత పరిష్కారం చూపడం లేదని వాపోతున్నారు.
అధికారులు స్పందించి వృథా అరికట్టాలి
ఎల్‌‌‌‌నినో ప్రభావం, వర్షాభావ పరిస్థితుల నేపథ్యంలో రానున్న రోజుల్లో నీటి అవసరాలు పెరిగే అవకాశం ఉంది. ఇలాంటి పరిస్థితుల్లో జంట జలాశయాల్లోని నీటిని పొదుపుగా వినియోగించుకోవడం అత్యవసరం. లీకేజీల వల్ల రోజుకు నాలుగైదు వేల ఇళ్లకు సరిపడా నీరు వృథా అవుతున్నట్లు అంచనా వేస్తున్నారు. ప్రజలకు పొదుపు సూచనలు చేయడానికే పరిమితం కాకుండా.. జలాశయాల గేట్లు, కాండ్యూట్ కాలువల నిర్వహణపై కూడా జలమండలి ప్రత్యేక దృష్టి పెట్టాలని నగరవాసులు కోరుతున్నారు. లీకేజీలను గుర్తించి శాశ్వతంగా అరికట్టేందుకు కార్యాచరణ రూపొందించాలని, నిపుణులతో కాలువ పరిస్థితిని పరిశీలించి అవసరమైన మరమ్మతులు వెంటనే చేపట్టాలని విజ్ఞప్తి చేస్తున్నారు.
