టూరిస్టుల్ని ఆకర్షించడానికి చాలా దేశాల్లోని హోటళ్లు, టూరిజం కంపెనీలు స్పెషల్ ఆఫర్స్ ఇస్తుంటాయి. అలాంటి ఆఫరే ఇస్తోంది ఐస్లాండ్లోని ‘రంగా హోటల్’. ఫొటోగ్రాఫర్లు అక్కడ నెల రోజులు ఫ్రీగా ఉండాలంటే నార్తర్న్ లైట్స్ ఫొటోలు, వీడియోలు తీస్తే చాలు. ఐస్లాండ్లోని అందమైన టౌన్ హెల్లాలో ఉంది ఈ హోటల్. రాత్రిపూట ఇక్కడి ఆకాశం పలు రంగుల్లో వెలిగిపోతూ కనులవిందుగా కనిపిస్తుంది. ఈ వెలుగుల్ని ‘నార్తర్న్ లైట్స్’ అంటారు. ‘అరోరా బొరియాలిస్’ లేదా ‘పోలార్ లైట్స్’ అని పిలిచే ఇవి ఎలా ఏర్పడతాయంటే... సోలార్ విండ్ కారణంగా మాగ్నెటోస్పియర్లో వచ్చే అంతరాయాల వల్ల ఆకాశం రంగులు పులుముకుంటుంది. అప్పుడు ఆకాశం అంతా ఆకుపచ్చ, పసుపు, నీలం, ఊదా రంగుల్లో, అప్పుడప్పుడు ఆరెంజ్, తెల్లని రంగుల్లో మెరిసిపోతుంది. ఈ దృశ్యాన్ని చూసేందుకు రెండు కళ్లు చాలవు.
విమాన టికెట్లు ఉచితం
‘రంగా హోటల్’ ఎందుకు ఈ ఆఫర్ చేస్తుందో తెలుసా... నార్తర్న్ లైట్స్ని బాగా దగ్గరి నుంచి చూడాలన్నా, ఫొటో తీయాలన్నా ఈ హోటలే సరైన్ ప్లేస్. అందుకే వాటిని ఫొటో తీసిన ఫొటోగ్రాఫర్లకి నెలంతా ఉచితంగా బసచేసే ఆఫర్ ఇస్తోంది. అలాగే, వాళ్లకి ఐస్లాండ్ నుంచి సొంత దేశానికి వెళ్లేందుకు విమాన టిక్కెట్లు కూడా ఇస్తారు. అయితే, ఒక కండిషన్ ఉంది. ఆ ఫొటోగ్రాఫర్ సెప్టెంబర్, అక్టోబర్ మధ్య కాలంలో అందుబాటులో ఉండాలి. ఆకాశంలో నార్తర్న్ లైట్స్ ఎప్పుడు వస్తాయో ఊహించడం కష్టం. ఆ అద్భుతాన్ని కెమెరాలో బంధించడం ఎంతో థ్రిల్లింగ్గా ఉంటుంది. ఇక్కడి అబ్జర్వేటరీలో రెండు పెద్ద టెలిస్కోప్స్ ఉంటాయి. నార్తర్న్ లైట్స్ని పర్ఫెక్ట్గా ఫొటో తీయడంలో లోకల్ సైంటిస్టులు గైడ్ చేస్తారు. అందుకే, ప్రొఫెషనల్ ఫొటోగ్రాఫర్స్ ఈ అవకాశాన్ని అందిపుచ్చుకునేందుకు పోటీపడుతున్నారు.
ఇలా అప్లై చేయాలి
ఆసక్తి ఉన్న ఫొటోగ్రాఫర్లు ‘హోటల్ రంగా’ వెబ్సైట్లో అప్లికేషన్ నింపాలి. తమకున్న సోషల్మీడియా పాపులారిటీ, ఫొటోగ్రఫీ అనుభవం, గతంలో ఐస్లాండ్లో పర్యటించి ఉంటే, ఆ వివరాలు, వ్యాక్సిన్ వేసుకున్నారా? లేదా? వంటి ప్రశ్నలకు జవాబు చెప్పాలి. అప్లై చేసేవాళ్లు తాము ఎందుకు ఆ హోటల్ ఫొటోగ్రాఫర్ అవ్వాలనుకుంటున్నారో వివరించాలి కూడా.
