“వర్సిటీ గైడ్లైన్స్ బాగున్నా, కాలేజీల్లో పనిచేసే ఫ్యాకల్టీకి సంబంధించి సెలవులు, ఇన్సూరెన్స్ పైనా వర్సిటీ మేనేజ్మెంట్లకు స్పష్టమైన ఆదేశాలిస్తే బాగుండు” – బాలకృష్ణారెడ్డి, టీటీఐఈఏ ప్రెసిడెంట్
హైదరాబాద్, వెలుగు: రాష్ట్రంలోని ప్రైవేటు ప్రొఫెషనల్ కాలేజీల నిబంధనలను జేఎన్టీయూ మరింత కఠినం చేసింది. వర్సిటీ ఆదేశాలను పాటించని కాలేజీల గుర్తింపు రద్దుచేస్తామని హెచ్చరించింది. 2020–21 విద్యాసంవత్సరానికి సంబంధించి వర్సిటీ విడుదలచేసిన రూల్స్ అండ్ రెగ్యులేషన్స్ లో ఈ వివరాలు వెల్లడించింది. వర్సిటీ అధికారుల తనిఖీల్లో ఏ తప్పు బయటపడ్డా మేనేజ్మెంట్లదే బాధ్యతని స్పష్టంచేసింది. జేఎన్టీయూ పరిధిలో 300లకు పైగా ఇంజనీరింగ్, ఫార్మసీ, ఎంబీఏ, ఎంసీఏ కాలేజీలున్నాయి. వీటిలో పలు కాలేజీలు ఏఐసీటీఈ, పీసీఐ, ప్రభుత్వం ఇచ్చిన ఆదేశాలను పట్టించుకోవడంలేదు. ఫ్యాకల్టీతో పాటు విద్యార్థులందరికీ బయోమెట్రిక్ అటెండెన్స్ తప్పనిసరిచేసినా కాలేజీలు అమలు చేయడంలేదు. దీంతో ఈ ఏడాది విధిగా బయోమెట్రిక్ అటెండెన్స్మెయింటెన్ చేసిన కాలేజీలకు మాత్రమే గుర్తింపును కొనసాగించాలని నిర్ణయించింది. ఫ్యాకల్టీ సర్టిఫికెట్లను చెక్ చేసుకోవాల్సిన బాధ్యత మేనేజ్మెంట్లదేనని పేర్కొంది. వర్సిటీ అధికారుల తనిఖీలలో ఫ్యాకల్టీ సర్టిఫికెట్లు ఫేక్అని తేలితే ఆయా కోర్సులను రద్దు చేస్తామని తెలిపింది. ఎకడమిక్ ఇయర్ మధ్యలో ఫ్యాకల్టీ మానేస్తే.. 15 రోజుల్లోగా కొత్తవారిని తీసుకుని, ఆ వివరాలను వర్సిటీ వెబ్సైట్లో అప్లోడ్ చేయాలని ఆదేశించింది. ఫ్యాకల్టీకి రెగ్యులర్గా జీతాలివ్వాలని, యూజీసీ సూచించిన సర్టిఫికెట్లు మినహా ఇతర సర్టిఫికెట్లను దగ్గర పెట్టుకోవద్దని తెలిపింది. ఆన్లైన్ ఫిర్యాదులను వారంలో పరిష్కరించాలని, గవర్నింగ్ బాడీల సమావేశం రెగ్యులర్గా నిర్వహించాలని పేర్కొంది.
బీటెక్లో ఆర్టిఫిషియల్ ఇంటిలిజెన్స్..
ఈ విద్యాసంవత్సరం కొన్ని ఇంజనీరింగ్ కాలేజీలకే అనుమతించిన ఆర్టిఫిషియల్ ఇంటలిజెన్స్(ఏఐ) కోర్సు.. వచ్చే విద్యాసంవత్సరం నుంచి అన్ని కాలేజీలకూ అనుమతివ్వనున్నట్లు వర్సిటీ తెలిపింది. వచ్చే ఏడాది ఏఐతో పాటు కంప్యూటర్ సైన్స్అండ్ ఇన్ఫర్మేషన్ టెక్నాలజీ, కంప్యూటర్ సైన్స్ అండ్ బిజినెస్ సిస్టమ్స్, ఇన్ఫర్మెషన్ టెక్నాలజీ అండ్ఇంజనీరింగ్ కోర్సులను కొత్తగా ప్రవేశపెట్టింది. దీంతో యూజీ కోర్సుల సంఖ్య 22 నుంచి 26కు పెరిగింది. ఎంఫార్మసీలోనూ ఫార్మసీ ప్రాక్టిస్, ఫార్మాసూటికల్ అనాలిసిస్, ఫార్మాసూటికల్ రెగ్యులేటరీ అఫైర్స్, ఫార్మాసూటికల్ క్వాలిటీ అస్యూరెన్స్ కోర్సులను ప్రవేశపెట్టారు.
