లంచం విషయంలో పోలీసులు పొట్టు పొట్టు కొట్టుకున్నారు

దేశం

September 18, 2023

బిహార్‌ రాష్ట్రం నలంద జిల్లాలో ఇద్దరు పోలీసులు నడిరోడ్డుపై అందరూ చూస్తుండగానే కొట్టుకున్నారు. లంచం విషయంలో తలెత్తిన వివాదం... ఇద్దరి మధ్య గొడవకు దారి తీసింది. లంచంగా వచ్చిన మొత్తాన్ని పంచుకునే విషయంలో ఇద్దరు పోలీసుల మధ్య విభేదం తలెత్తింది. ఈ వీడియోను కొందరు సోషల్‌ మీడియాలో షేర్‌ చేయడంతో అది వైరల్‌గా మారింది.

నలందలోని ఓ రహదారిపై పోలీసులు తమ వాహనం ఆపారు. రోడ్డు పక్కన ఇద్దరు పోలీసులు గొడవ పడ్డారు. ఇద్దరూ ఖాకీ చొక్కాలు పట్టుకొని మరీ ఒకరినొకరు తోసుకున్నారు. ఈ విషయాన్ని గమనించిన స్థానికులు వారి చుట్టూ గుమిగూడారు.

ఉన్నతాధికారులకు విషయం తెలిస్తే మిమ్మల్ని సస్పెండ్ చేస్తారని స్థానికులు హెచ్చరించినా ఆ ఇద్దరు పోలీసులు పట్టించుకోలేదు. ఈ ఘటనను అక్కడే ఉన్న కొంతమంది.. వాటిని సోషల్‌ మీడియాలో పోస్టు చేయడంతో అవి వైరల్‌గా మారాయి.

ఈ ఘటనపై నలంద జిల్లా పోలీస్‌ శాఖ స్పందించింది. ఇద్దరు పోలీసులను పోలీస్‌ సెంటర్‌కు పిలిపించినట్లు తెలిపింది. ఈ ఘటనపై దర్యాప్తు చేస్తున్నామని.. ఇద్దరు పోలీసులపై క్రమ శిక్షణ చర్యలు తీసుకుంటామని వెల్లడించింది.