- ఎమ్మెల్సీ ఎన్నికల కోడ్ ఉల్లంఘనే అంటున్న ఎనలిస్టులు
- వీళ్లందరికీ ఎమ్మెల్సీ ఎన్నికల్లో ఓటు హక్కు
హైదరాబాద్, వెలుగు: మున్సిపల్ కార్పొరేషన్లు, మున్సిపాలిటీల ప్రజాప్రతినిధుల గౌరవ వేతనాలను 30% పెంచుతూ రాష్ట్ర ప్రభుత్వం గురువారం ఉత్తర్వులు ఇచ్చింది. ఎమ్మెల్సీ ఎన్నికల్లో కార్పొరేటర్లు, కౌన్సిలర్లు ఓటర్లుగా ఉన్నారు. స్థానిక సంస్థల ఎమ్మెల్సీ ఎన్నికల కోడ్ అమలులో ఉన్న టైమ్లో ఈ ఉత్తర్వులు ఇవ్వడం గమనార్హం. ఇది కోడ్ ఉల్లంఘనే అని పొలిటికల్ ఎనలిస్టులు అంటున్నారు. గతంలో జడ్పీటీసీలు, ఎంపీటీసీలు, ఎంపీపీలు, జడ్పీ చైర్మన్లకు జీతాలు పెంచిన సర్కార్.. అప్పుడు మేయర్లు, మున్సిపల్ చైర్మన్లు, కార్పొరేటర్లు, కౌన్సిలర్లకు పెంచలేదు. ఈ నేపథ్యంలో వారి నుంచి విమర్శలు రావడంతో.. ఎన్నికల కోడ్ ను ఉల్లంఘించి, జీతాల పెంపు ఉత్తర్వులిచ్చింది.
ఇవీ పెరగనున్న జీతాలు..
మున్సిపల్ కార్పొరేషన్ల మేయర్జీతం రూ.50 వేల నుంచి రూ.65 వేలకు, డిప్యూటీ మేయర్కు రూ.25 వేల నుంచి రూ.32,500, వార్డు మెంబర్లకు రూ.6 వేల నుంచి రూ.7,800లకు పెరగనుంది. 50 వేల కంటే ఎక్కువ జనాభా ఉన్న మున్సిపాలిటీల్లో చైర్ పర్సన్కు రూ.15 వేల నుంచి రూ.19,500లకు, వైస్ చైర్ పర్సన్ కు రూ.7,500 నుంచి రూ.9,750, వార్డు మెంబర్లకు రూ.3,500 నుంచి రూ.4,550కి పెరగనుంది. 50 వేల కంటే తక్కువ జనాభా ఉన్న మున్సిపాలిటీల్లో చైర్ పర్సన్కు రూ.12 వేల నుంచి రూ.15,600, వైస్ చైర్ పర్సన్కు రూ.5 వేల నుంచి రూ.6,500, వార్డు మెంబర్కు రూ.2,500 నుంచి రూ.3,250కి పెరగనుంది.
