- వెస్ట్ బెంగాల్, కేరళ వంటి రాష్ట్రాల్లో ఇబ్బందులు
- ఒక్కో రాష్ట్రంలో వేర్వేరు రాజకీయ పరిస్థితులు
- కేరళలో సీపీఐ(ఎం)తో కాంగ్రెస్కు విభేదాలు
- వెస్ట్ బెంగాల్లో మాత్రం కూటమిగా ముందుకు
న్యూఢిల్లీ : ‘ఇండియా’ కూటమి ఇక సీట్ల షేరింగ్పై దృష్టి పెట్టింది. 28 పార్టీల సభ్యులు లోక్సభ సీట్ల పంపకాలపై చర్చించుకుని.. ఈ నెల చివరికల్లా తుది నిర్ణయానికి వచ్చే అవకాశాలు ఉన్నట్లు తెలుస్తున్నది. అయితే, సీట్ల షేరింగ్మాత్రం కూటమికి సవాల్గా మారింది. ఒక్కో రాష్ట్రంలో.. ఒక్కో పరిస్థితి ఉంది. అయినా.. వీలైనంత త్వరగా సీట్ల షేరింగ్ ప్రక్రియ ముగించుకుని.. క్యాంపెయిన్ ప్రారంభించాలనే ఆలోచనలో ఇండియా కూటమి నేతలు ఉన్నట్లు సమాచారం. ప్రతీ లోక్సభ నియోజకవర్గం నుంచి కూటమి తరఫున ఒకే అభ్యర్థి బరిలో ఉండేలా ప్లాన్ చేస్తున్నారు. అన్ని పార్టీలు ఒకే అభ్యర్థిని బలపరిస్తే.. బీజేపీని ఓడించడం చాలా సులభం అవుతుందని కూటమి లీడర్లు అభిప్రాయపడుతున్నారు. దీనికితోడు ఓట్ల చీలిక కూడా ఉండదని ఆలోచిస్తున్నారు. అయితే, మహారాష్ట్ర వంటి రాష్ట్రాల్లో కూటమిగా ఏర్పడటంలో ఇబ్బందుల్లేకున్నా.. బెంగాల్ లాంటి స్టేట్లో మాత్రం మళ్లీ విభేదాలు తలెత్తే అవకాశాలుంటాయని రాజకీయ విశ్లేషకులు అభిప్రాయపడుతున్నారు. మహారాష్ట్రలో ఇప్పటికే ఎన్సీపీ, శివసేన (యూబీటీ) కలిసే ఉన్నాయి. ఇక వెస్ట్ బెంగాల్లో చూసుకుంటే.. రూలింగ్ పార్టీ తృణమూల్ కాంగ్రెస్ ఓ వైపు ఉంటే.. కాంగ్రెస్, సీపీఎం కలిసి మరోవైపు ఉన్నాయి. ఇలాంటి రాష్ట్రాల్లో ఇండియా కూటమి అభ్యర్థిని ఎంపిక చేయడం అంత ఈజీ కాదన్న వాదనలు వినిపిస్తున్నాయి.
వెస్ట్బెంగాల్లో కలవని కాంగ్రెస్, టీఎంసీ
వెస్ట్ బెంగాల్లో కొన్ని రోజుల కింద ధూప్గురి బై ఎలక్షన్ జరిగింది. కాంగ్రెస్, సీపీఐ(ఎం) కలిసి పోటీ చేస్తే.. తృణమూల్ కాంగ్రెస్ ఒంటరిగా బరిలో దిగింది. టీఎంసీ సిట్టింగ్ నియోజకవర్గమైన ధూప్గురిని బీజేపీ అభ్యర్థి నిర్మల్ చంద రాయ్ 4,300 ఓట్ల మెజార్టీతో విజయం సాధించాడు. దేశవ్యాప్తంగా 100 లోక్సభ స్థానాల్లో మాత్రం బీజేపీ, కాంగ్రెస్ మధ్యే పోటీ ఉంటుంది. వీటిని సీట్ల షేరింగ్లో కలపరని తెలుస్తున్నది. ఇక మిగిలిన 443 లోక్సభ స్థానాలను మాత్రం ఇండియా కూటమి పంచుకోవాల్సి ఉంటుంది. వీటిలో జమ్మూ కాశ్మీర్లోని నేషనల్ కాన్ఫరెన్స్ అండ్ పీపుల్స్ డెమొక్రటిక్ పార్టీ, కాంగ్రెస్ మధ్య ఐదు సీట్ల ఒప్పందం దాదాపు ఖరారైనట్లు తెలుస్తున్నది. ఇక మహారాష్ట్రలోని మొత్తం 48 లోక్సభ స్థానాల్లో ఎన్సీపీ, కాంగ్రెస్, శివసేన (యూబీటీ) చెరో 16 సీట్లు పంచుకోవాలని భావిస్తున్నాయి.
ALSO READ: మళ్లీ హస్తం గూటికి.. నల్లాల ఓదెలు దంపతులు
బీహార్లో ఆర్జేడీ అతిపెద్ద పార్టీ అయినా...
బీహార్లో అధికారంలో ఉన్న జేడీ(యూ), ఆర్జేడీ.. 40 లోక్సభ స్థానాలను కాంగ్రెస్, లెఫ్ట్ పార్టీలతో కలిసి ఎలా షేర్ చేయాలన్న దానిపై క్లారిటీ లేదు. స్టేట్లో ఆర్జేడీ అతిపెద్ద పార్టీ అయినప్పటికీ.. లోక్సభ నుంచి ఎవరూ ప్రాతినిథ్యం వహించడం లేదు. ఢిల్లీలోని ఏడు, పంజాబ్లోని 13 స్థానాలను కాంగ్రెస్, ఆమ్ ఆద్మీ పార్టీలు షేర్ చేసుకోవాల్సి ఉంది. పంజాబ్లో ఆప్, కాంగ్రెస్ పొత్తు పెట్టుకోవడంపై ఆసక్తి చూడం లేవు. వెస్ట్ బెంగాల్ సీఎం మమతా బెనర్జీ స్పెయిన్లో ఉన్నారు. ఆమె తిరిగి వచ్చాక బెంగాల్లోని 42 సీట్ల పంపకాలపై తుది నిర్ణయం తీసుకునే అవకాశం ఉంది. సోనియా గాంధీ రిక్వెస్ట్ చేస్తే.. కాంగ్రెస్తో కలిసేందుకు మమతా బెనర్జీ ఒప్పుకునే అవకాశాలు ఉన్నా.. సీపీఐ(ఎం)తో మాత్రం డీల్ కుదరడం కష్టమే అని పలువురు భావిస్తున్నారు. కేరళలో కాంగ్రెస్ వర్సెస్ సీపీఎం ఉంటే.. బెంగాల్లో మాత్రం ఈ రెండు కలిసి పని చేస్తున్నాయి.
