ఇండియన్ ఐడల్… పాటల పోటీలకు వెళ్లే ప్రతి అమెచ్యూర్ సింగర్కి ఒక కల. నిరంతర సాధన, పట్టుదల, సంగీతంలో మెళకువలు, స్టేజీ భయం, సీనియర్ల ముందు జంకుగొంకు లేనితనం లాంటివెన్నో ఉండాలి. ఒక సాదాసీదా బెలూన్లు అమ్ముకునే ఆమె కొడుకు..అందులోనూ బూట్ పాలిష్ చేసుకునే స్కూల్ డ్రాపవుట్ కుర్రాడికి ఊహకైనా అందనంత కల. సుప్రసిద్ధ పాకిస్థానీ సూఫీ గాయకుడు నుస్రత్ ఫతే అలీ ఖాన్ గొంతుకి దగ్గరగా ఉండడమే ఆ కుర్రాడికి కలిసొచ్చే విషయం. ఆ ఒక్క ప్లస్ పాయింట్తోనే ఇండియన్ ఐడల్ 11వ సీజన్లో విజేతగా నిలిచాడు.
టాలెంట్ని తొక్కేయడం ఎవరి తరం కాదంటారు. ఈ మాట నమ్మనివాళ్లెవరైనా ఉంటే… మొన్ననే హెవీ కాంపిటీషన్ మధ్య ‘ఇండియన్ ఐడల్’గా గెలిచిన సన్నీ హిందూస్థానీ గురించి తెలుసుకోవచ్చు. బిలో పావర్టీ లైన్ (బీపీఎల్) అనడానికైనా వీల్లేని ఫ్యామిలీ నుంచి వచ్చాడతను. చదువు లేదు. తండ్రి మానక్ రామ్ చనిపోతూ వదిలేసిన హార్మోనియం, తబలాలు, వారసత్వంగా వచ్చిన గొంతు తప్ప అతనికంటూ ఎలాంటి మ్యూజిక్ నాలెడ్జి లేదు. ముగ్గురు అక్కచెల్లెళ్ల మధ్య ఒక్కగానొక్క మగ నలుసు. ఇంట్లో ముద్దుగా ‘లడ్డూ’ అని పిలుచుకునేవారు. 15 ఏళ్ల వయసులోనే తండ్రి చనిపోతే కుటుంబాన్ని పోషించడానికి తల్లి సోమా బెలూన్లు అమ్మేది. ఆమెకు సాయంగా సన్నీ బూట్ పాలిష్ చేసేవాడు. అయితే, తనలోని మ్యూజిక్ హాబీని మాత్రం వదులుకోలేదు. ఏ పని చేస్తున్నా ఫోన్లో పాటలు వింటూ ప్రాక్టీస్ చేసుకునేవాడు. ఈ రోజున దేశంలోని అమెచ్యూర్ సింగర్స్ అందరూ కలలు కనే ‘ఇండియన్ ఐడల్’ పొజిషన్ని సొంతం చేసుకున్నాడు లడ్డూ.
పోయినేడాది దీపావళి సీజన్లో ఓ వండర్ జరిగింది. నుస్రత్ ఫతే అలీ ఖాన్ పాడిన ‘అఫ్రీన్ అఫ్రీన్…’ పాటతో సన్నీ ఇండియన్ ఐడల్ ఆడిషన్ రౌండ్లోనే జడ్జీలందరినీ మంత్రముగ్ధుల్ని చేసే శాడు. ఫతే అలీ ఖాన్ పాకిస్థాన్కి చెందిన గాయకుడు. ఆయనను సూఫీ సాహిత్య గాయకుడిగా ప్రపంచమంతా గౌరవిస్తుంది. సన్నీ హిందూస్థానీ ఫస్ట్ రౌండ్లో తన గురించి పరిచయం చేసుకుంటూ చెప్పిన మాటల్ని బిజినెస్ టైకూన్ ఆనంద్ మహీంద్రకు ఆయన ఫ్రెండ్ పంపించాడు. వాటిని విన్నాక… స్పందించకుండా ఉండలేకపోయారు మహీంద్ర. ‘ఎదుగుతున్నవాళ్ల గురించి తెలుసుకోవడానికి దీపావళి రోజే సరైనది. నా ఫ్రెండ్ ఒకరు ఈ క్లిప్పింగ్ చూసి కన్నీళ్లతో తడిసిపోయాడు. ఇది చూస్తే మీకుకూడా కళ్లలో నీళ్లు ఇంకిపోవడం ఖాయం. మరుగునపడిన మాణిక్యాల్ని వెలికితీయడంలో టీవి, సోషల్ మీడియాలు చేస్తున్న సర్వీసు చాలా గొప్పది’ అని ట్వీట్ చేశారు మహీంద్ర.
సన్నీ హిందూస్థానీ భటిండా (పంజాబ్)లోని అమర్పుర బస్తీకి చెందిన కుర్రాడు. 2014లో తండ్రి చనిపోయే సమయానికి అతను ఆరో క్లాస్ చదువుతున్నాడు. స్కూలులో చదువుతున్నప్పుడు భటిండాలో జరిగే మ్యూజిక్ షోల్లో తన గొంతు విప్పేవాడు. రియాల్టీ షో ‘ఎంటర్టైన్మెంట్ కే లియే కుచ్ భీ కరెగా’లో పార్టిసిపేట్ కావడానికి తయారవుతున్న దశలో తండ్రి wమానక్ రామ్ చనిపోతే, ఆ బాధలోనే రియాల్టీ షోకి హాజరయ్యాడు. ఒక పక్క ఫ్యామిలీకోసం కష్టపడుతూనే ఇండియన్ ఐడల్ 11వ సీజన్లో ఎంటరయ్యాడు. ఈ కాంపిటీషన్లో ప్రతి రౌండ్లోనూ లైవ్లో చూస్తున్న ప్రతి ఒక్క ప్రేక్షకుడిని తనకు ఫ్యాన్గా మార్చుకున్నాడు. షూ పాలిష్ చేసే కుర్రాడిగా జనం గుర్తించినా, అతనిని చిన్నచూపు చూడలేదు. లడ్డూ టాలెంట్కి ఫుల్ ఫిదా అయిపోయారు. దాదాపు మూడు నెలల పాటు సాగిన ఆడిషన్ రౌండ్లలోనే రెండుసార్లు గోల్డెన్ మైక్లు అందుకున్నాడు. అంటే, ఆ రౌండ్లో అతనే టాప్ అయ్యాడు. ఫైనల్ రౌండ్లో రోహిత్ రావత్, అద్రిజ్ ఘోష్, అంకోనా ముఖర్జీ, రిధమ్ కల్యాణ్లతో గట్టి పోటీ ఎదురైంది. భర్ దో జోలీ మేరి, హల్క హల్క సురూర్ లాంటి పాటలతో సన్నీ హిందూస్థానీ ఫైనల్లో ముందడుగేశాడు. చివరకు ప్రేక్షకుల ఓట్లు ఎక్కువ మొత్తం అతనికే పడ్డాయి. ఆ షోకి స్పెషల్ గెస్ట్లుగా వచ్చిన ఆయుష్మాన్ ఖురానా, నీనా గుప్తాల చేతుల మీదుగా ‘ఇండియన్ ఐడల్–11’ ట్రోఫీతోపాటుగా 25 లక్షల రూపాయల క్యాష్ ప్రైజ్కూడా సన్నీ అందుకున్నాడు. రోహిత్ రావత్ ఫస్ట్ రన్నరప్గా ఎంపిక కాగా, అంకోనా ముఖర్జీ థర్డ్ ప్లేస్లో నిలిచింది. అంకోనాకి 5 లక్షల ప్రైజ్ మనీ వస్తే, నాలుగు అయిదు స్థానాలు పొందిన రిథమ్ కల్యాణ్, అద్రిజ్ ఘోష్లకు చెరి మూడు లక్షలు బహుమతి దక్కింది.
విజేతగా ప్రకటించాక…. నిజమైన కాంపిటీషన్ తనకు ఇంటిలోనే ఎక్కువగా ఉందన్నాడు. తన హాబీని అమ్మ ఎంకరేజ్ చేసేదని, అయితే ఇంత పెద్ద ఆడిషన్కి వెళ్లడానికి మాత్రం ఇష్టపడేది కాదని లడ్డూ చెప్పాడు. ‘మా అమ్మతోనే ఎక్కువగా ఫైట్ చేయాల్సి వచ్చేది. అన్నీ వదిలేసి ఈ కాపింటీషన్కోసం వెళ్లడం ఆమెకిష్టముండేది కాదు. ఎందుకంటే, ఇంట్లో ఆర్థిక ఇబ్బందులు అలాంటివి’ అని కన్నీళ్లు పెట్టుకున్నాడు. అక్కడక్కడ చేబదుళ్లు తెచ్చుకుని ఇండియన్ ఐడల్ కాంపిటీషన్కి వచ్చాడు. ఇంత కష్టపడ్డాడు కాబట్టే, ఇండియన్ ఐడల్–11 విజేత కాగలిగాడు. టీ–సిరీస్ వాళ్ల ప్రాజెక్ట్లో పాడడానికి ఛాన్స్ కూడా కొట్టేశాడు.
ఆనందంలో ఉబ్బితబ్బిబయిన లడ్డూ… ‘నేనసలు ఈ కాంపిటీషన్ గెలవడం సంగతి అటుంచి, ఫస్ట్ రౌండ్ దాటగలనా అనుకున్నాను. ఇలాంటి పెద్ద వేదికపైన పాడే అవకాశం రావడం మొదలుకొని, ఇండియన్ ఐడల్గా గెలవడం వరకు అన్నీ నాకు కలగానే కనిపిస్తున్నాయి. నన్ను గైడ్ చేసిన జడ్జీలకు, మ్యూజిక్ ఇండస్ట్రీలో లెజెండ్స్ ఎదుట పాడడానికి అవకాశమిచ్చిన చానెల్వారికి ఎంతో రుణపడి ఉంటాను. నా గొంతును దేశం మొత్తం విన్నదని, నన్ను దేశ్ కి ఆవాజ్గా ఓటేసి గెలిపించారని తెలిసి ఇప్పటికీ నమ్మలేకపోతున్నా’ అన్నాడు. నిజమే.. అసాధ్యమని అనుకుంటున్నది నిజమైతే ఓ పట్టాన నమ్మలేరెవరు!
నుస్రత్ ‘ఆత్మ’ సన్నీ!
నుస్రత్ ఫతే అలీ ఖాన్ గొంతు ఒక్కసారిగా మొన్న ఇండియన్ ఐడల్–11లో మారుమోగిపోయిందనుకున్నారు. ఎప్పుడో 23 ఏళ్ల క్రితం చనిపోయిన ఈ పాకిస్థానీ సూఫీ గాయకుడి స్వరం ఎలా వినిపించిందనుకోకండి. సోనీ టీవీ నిర్వహించిన ఆ కాంపిటీషన్లో పాల్గొన్న సన్నీ హిందూస్థానీ మొదటి రౌండ్ నుంచి ఫైనల్ రౌండ్ వరకు ఫతే అలీ పాడిన పాటలతో జడ్జీల్ని, ప్రేక్షకుల్ని తన వశం చేసుకున్నాడు. జ్యూరీలోని విశాల్ దడ్లానీ, నేహా కక్కర్, అను మాలిక్ ఇంప్రెసయిపోయారు. అను మాలిక్ ఏకంగా సన్నీని ఈ సాబ్ రూహ్ (ఆత్మ)’ అన్నాడు. ఒక ఎపిసోడ్కి చీఫ్ గెస్ట్గా వచ్చిన కునాల్ కెమ్ తన మెడలోని లక్మీదేవి లాకెట్ను తీసి లడ్డూ మెడలో వేసేశాడు. మరో రౌండ్లో సన్నీ పాట విని అజయ్ దేవ్గన్, అతని భార్య కాజల్ ఫిదా అయ్యారు.
ఇండియన్ ఐడల్లో తెలుగువాళ్లు
శ్రీ రామచంద్ర ఫస్ట్ ఐడల్
ఫస్ట్ టైమ్ ఇండియన్ ఐడల్ అయిన తెలుగువాడిగా మైనంపాటి శ్రీరామచంద్ర రికార్డుకెక్కాడు. ప్రకాశం జిల్లా అద్దంకికి చెందిన శ్రీరామచంద్రకు చిన్నప్పట్నుంచే వెస్ట్రన్ క్లాసికల్, ఇండియన్ క్లాసికల్ సంగీతంతో పరిచయముంది. 2010లో ఇండియన్ ఐడల్ సీజన్–5కి శ్రీరామచంద్ర విన్నర్ అయ్యాడు. ప్రస్తుతం తెలుగు, తమిళ, హిందీ భాషల్లో అనేక పాటలు పాడుతున్నాడు. శ్రీరామచంద్ర ‘అకపెల్లా స్టయిల్’లో స్పెషల్ ఈవెంట్లు నిర్వహిస్తుంటాడు. పక్కన ఏ వాయిద్యాలు లేకుండా నోటితోనే పెర్క్యుషన్, స్ట్రింగ్ వంటివన్నీ పలికించడం ‘అకపెల్లా’ పద్ధతి.
ఉత్తరాంధ్ర సింగర్ రేవంత్
లొల్ల వెంకట రేవంత్ కుమార్ శర్మ (ఎల్వీ రేవంత్) ‘ఇండియన్ ఐడల్’గా నిలిచిన రెండో తెలుగు సింగర్. ఉత్తరాంధ్రలోని శ్రీకాకుళం జిల్లాకి చెందిన ఫ్యామిలీ వీళ్లది. 2017లో జరిగిన ఇండియన్ ఐడల్ సీజన్–9లో ‘సబ్సే బడా కళాకార్’ టైటిల్ ట్రాక్తో ఫస్ట్ రౌండ్లోనే జడ్జీలను కట్టిపారేశాడు. ప్రస్తుతం సినీ సింగర్గా సెటిలయ్యాడు. అర్జున్ రెడ్డి, బాహుబలి లాంటి సూపర్ హిట్ సినిమాల్లో రేవంత్ పాడిన పాటలుకూడా మంచి హిట్టయ్యాయి.
సెకండ్ ప్లేస్లో కారుణ్య
దేశవ్యాప్తంగా ఆసక్తి పుట్టించిన ఇండియన్ ఐడల్ కాంపిటీషన్లో తెలుగువాళ్లుకూడా సత్తా చాటుకున్నారు. సీజన్–2లోనే ఎన్.సి.కారుణ్య కొంచెంలో వెనకబడి, సెకండ్ ప్లేస్తో సరిపుచ్చుకున్నాడు. కారుణ్య అప్పటికే ‘పాడుతా తీయగా’ లాంటి పోటీల్లో విజేతగా నిలిచాడు. ప్రస్తుతం చాలా సినిమాల్లో ప్లేబ్యాక్ సింగర్గా రాణిస్తున్నాడు.
