ఆసియా క్రీడల్లో భారత్ స్వర్ణ గర్జన.. పతకాల పంటలో నాలుగో స్థానం.. హాకీ, క్రికెట్లో మనోళ్లకు స్వర్ణాలు

• హాకీ జట్టుకు లాస్‌‌‌‌‌‌‌‌ ఏంజిల్స్‌‌‌‌‌‌‌‌ ఒలింపిక్‌‌‌‌‌‌‌‌ బెర్త్‌‌‌‌‌‌‌‌ కూడా..
• ఆర్చరీ, గోల్ఫ్‌‌‌‌‌‌‌‌, రెజ్లింగ్‌‌‌‌‌‌‌‌లో స్వర్ణ చరిత్ర

ఆసియా క్రీడల్లో ఇండియా హాకీ, క్రికెట్‌‌ జట్లు దుమ్మురేపాయి. గత చరిత్రను కొనసాగిస్తూ.. అద్భుతమైన ఆటతీరుతో ఈసారి కూడా స్వర్ణ పతకాలతో మెరిశాయి. హాకీలో ఐదోసారి స్వర్ణోదయమైతే.. క్రికెట్‌‌లో చిరకాల ప్రత్యర్థి పాకిస్తాన్‌‌ పని పట్టిన మనోళ్లు పసిడి కాంతులు పూయించారు. మొత్తానికి దేశంలో అత్యంత ఆసక్తిగా తిలకించే ఈ రెండు క్రీడల్లో బంగారు మోత మోగడంతో ఫ్యాన్స్‌‌ సంబురాల్లో మునిగిపోయారు. ఆర్చరీ, రెజ్లింగ్, గోల్ఫ్‌‌లోనూ గోల్డ్‌‌ మెడల్స్‌‌ రావడం మరింత విశేషం..!

ఆసియా క్రీడల్లో మనోళ్లు బంగారు పంట పండించారు. శనివారం (అక్టోబర్ 04) ఒక్క రోజే మరో ఐదు స్వర్ణాలతో మెరిసి మురిపించారు. భారీ అంచనాలతో బరిలోకి దిగిన హాకీ జట్టు గోల్డ్‌‌‌‌‌‌‌‌ మెడల్‌‌‌‌‌‌‌‌తో పాటు లాస్‌‌‌‌‌‌‌‌ ఏంజిల్స్‌‌‌‌‌‌‌‌ ఒలింపిక్ బెర్త్‌‌‌‌‌‌‌‌ను దక్కించుకోగా.. మెన్స్‌‌‌‌‌‌‌‌ క్రికెట్‌‌‌‌‌‌‌‌ టీమ్‌‌‌‌‌‌‌‌.. చిరకాల ప్రత్యర్థి పాకిస్తాన్‌‌‌‌‌‌‌‌ను పడగొట్టి స్వర్ణ గర్జన చేసింది. ఆర్చరీలో కుంకుమ్‌‌‌‌‌‌‌‌ మోహద్‌‌‌‌‌‌‌‌ చరిత్రాత్మక స్వర్ణంతో కొత్త అధ్యాయాన్ని సృష్టించగా, నీరజ్‌‌‌‌‌‌‌‌ చౌహాన్‌‌‌‌‌‌‌‌ బ్రాంజ్‌‌‌‌‌‌‌‌తో ఆకట్టుకున్నాడు. గోల్ఫ్‌‌‌‌‌‌‌‌లో ఇండియాకు డబుల్‌‌‌‌‌‌‌‌ బొనాంజా లభించింది. వ్యక్తిగత విభాగంలో ప్రణవి బంగారు పతకం గెలవగా, టీమ్‌‌‌‌‌‌‌‌ రజతపు మెరుపులు చూపెట్టింది. రెజ్లింగ్‌‌‌‌‌‌‌‌లో అమన్‌‌‌‌‌‌‌‌ సెహ్రావత్‌‌‌‌‌‌‌‌ పసిడి పట్టు పట్టగా, ఆంటిమ్‌‌‌‌‌‌‌‌ పంగల్‌‌‌‌‌‌‌‌ రజతం, దీపక్‌‌‌‌‌‌‌‌ పూనియా కాంస్యంతో మెరిశారు.

కాకమిగహర: ఆసియా క్రీడల్లో ఇండియా మెన్స్‌‌ హాకీ జట్టు అదరగొట్టింది. డిఫెండింగ్‌‌ చాంపియన్‌‌గా బరిలోకి దిగి వరుసగా రెండోసారి గోల్డ్‌‌ మెడల్‌‌ను సొంతం చేసుకుంది. శనివారం జరిగిన ఫైనల్లో ఇండియా 5-1తో మలేసియాను చిత్తుగా ఓడించింది. ఫలితంగా 2028 లాస్‌‌ ఏంజిల్స్ ఒలింపిక్స్‌‌ బెర్త్‌‌నూ ఖాయం చేసుకుంది. 44 ఏళ్ల తర్వాత ఏషియాడ్‌‌లో గోల్డ్‌‌ మెడల్‌‌ గెలిచిన విమెన్స్‌‌ జట్టు కూడా ఒలింపిక్స్‌‌కు క్వాలిఫై అయ్యింది. దాంతో ప్రతిష్టాత్మక ఆసియా క్రీడల్లో  మెన్స్‌‌, విమెన్స్‌‌ జట్లు ఒకే ఎడిషన్‌‌లో టాప్‌‌ ప్లేస్‌‌లో నిలవడం ఇదే తొలిసారి. ఇండియా తరఫున  కెప్టెన్‌‌ హర్మన్‌‌ప్రీత్‌‌ (11, 57వ నిమిషాలు) డబుల్ గోల్స్‌‌ కొట్టగా, జుగ్రాజ్‌‌ సింగ్‌‌ (23వ ని), హార్దిక్‌‌ సింగ్‌‌ (42వ ని), శీలానంద్‌‌ లక్రా (54వ ని) తలా ఓ గోల్‌‌ చేశారు.

షెల్లో సిల్వేరియస్‌‌ (14వ ని) మలేసియాకు ఏకైక గోల్‌‌ అందించాడు. ఈ టోర్నీలో 12 గోల్స్‌‌తో హర్మన్‌‌ప్రీత్‌‌  అగ్రస్థానంలో నిలిచాడు. ఇండియా తరఫున అత్యధిక మ్యాచ్‌‌లు ఆడిన మన్‌‌ప్రీత్‌‌ సింగ్‌‌కు ఇది మూడో ఏషియాడ్‌‌ స్వర్ణం కావడం విశేషం. 2014, 2022 చాంపియన్‌‌ జట్టులోనూ సభ్యుడిగా ఉన్న అతను ఒక ఇండియన్‌‌ సాధించిన అత్యధిక స్వర్ణాల రికార్డును ఖాతాలో వేసుకున్నాడు. ఓవరాల్‌‌గా ఆసియా క్రీడల్లో ఇండియా హాకీ జట్టుకు ఇది ఐదో స్వర్ణం. 1966, 1998, 2014, 2022లోనూ బంగారు పతకంతో మెరిసింది. అలాగే ఏషియాడ్‌‌లో వరుసగా రెండు గోల్డ్‌‌ మెడల్స్‌‌ నెగ్గిన రెండో జట్టుగా ఇండియా రికార్డులకెక్కింది. పాకిస్తాన్‌‌ ముందున్నది. రెండు ఆసియా క్రీడల్లో స్వర్ణాలు గెలిచిన తొలి ఇండియన్‌‌ కెప్టెన్‌‌గా హర్మన్‌‌ప్రీత్‌‌ రికార్డు సృష్టించాడు. 

 నిషిన్‌‌: ఆసియా క్రీడల క్రికెట్‌‌లో ఇండియా మెన్స్‌‌ జట్టు స్వర్ణాన్ని నిలబెట్టుకుంది. అభిషేక్‌‌ శర్మ (28 బాల్స్‌‌లో 3 ఫోర్లు, 7 సిక్స్‌‌లతో 61), తిలక్‌‌ వర్మ (22 బాల్స్‌‌లో 3 ఫోర్లు, 4 సిక్స్‌‌లతో 51 నాటౌట్‌‌) దంచికొట్టడంతో.. శనివారం జరిగిన ఫైనల్లో ఇండియా 19 రన్స్‌‌ తేడాతో దాయాది పాకిస్తాన్‌‌పై చిరస్మరణీయ విజయాన్ని సొంతం చేసుకుంది. అలాగే 2024 టీ20 వరల్డ్‌‌ కప్‌‌ సన్నాహక దశ నుంచి పాక్‌‌తో జరిగిన మ్యాచ్‌‌ల్లో 6–0 విజయాల రికార్డును నమోదు చేసింది. టాస్‌‌ గెలిచిన ఇండియా 20 ఓవర్లలో 211/6 స్కోరు చేసింది.

తర్వాత పాకిస్తాన్‌‌ 20 ఓవర్లలో 192/6 స్కోరుకే పరిమితమైంది. హసన్‌‌ నవాజ్‌‌ (51 బాల్స్‌‌లో 5 ఫోర్లు, 7 సిక్స్‌‌లతో 96) సెంచరీ మిస్‌‌ చేసుకున్నాడు. భారీ లక్ష్య ఛేదనలో ఇండియా బౌలర్లు పాక్‌‌ను కట్టడి చేశారు. 4 రన్స్‌‌ వద్ద వైభవ్‌‌ క్యాచ్‌‌ వదిలేయడంతో ఊపిరి పీల్చుకున్న హసన్‌‌ నవాజ్‌‌ స్పిన్నర్లపై ఎదురుదాడికి దిగినా.. బుమ్రా తన అనుభవంతో మిగతా బ్యాటర్లను కట్టడి చేశాడు. వాషింగ్టన్‌‌ సుందర్‌‌ (2/29) కూడా మెరుగ్గా బౌలింగ్‌‌ చేశాడు. ముఖ్యంగా 18వ ఓవర్‌‌లో కేవలం 8 రన్స్‌‌ ఇచ్చి మ్యాచ్‌‌ను ఇండియా వైపు తిప్పాడు. షాహిబ్జాద్‌‌ ఫర్హాన్‌‌ (10), మాజ్‌‌ సదాకట్‌‌ (23), ఉస్మాన్‌‌ ఖాన్‌‌ (3), సయీమ్‌‌ అయూబ్‌‌ (29), అబ్దుల్‌‌ సమద్‌‌ (9), సాద్‌‌ మసూద్‌‌ (12 నాటౌట్‌‌) పెద్దగా బ్యాట్లు ఝుళిపించలేకపోయారు. అక్షర్‌‌ పటేల్‌‌, శివమ్‌‌ దూబే చెరో రెండు వికెట్లు తీశారు. 

అభిషేక్‌‌ అదరహో..

బ్యాటింగ్‌‌కు ఇబ్బందిగా ఉన్న పిచ్‌‌పై అభిషేక్‌‌ శివాలెత్తినా.. రెండో ఎండ్‌‌లో పాక్‌‌ బౌలర్లు పైచేయి సాధించారు. మూడు, నాలుగో ఓవర్‌‌లో వైభవ్‌‌ సూర్యవంశీ (15), సంజూ శాంసన్‌‌ (2)ను ఔట్‌‌ చేశారు. అయితే శ్రేయస్‌‌ అయ్యర్‌‌ (21)తో కలిసి ఇన్నింగ్స్‌‌ను ముందుకు తీసుకెళ్లిన అభిషేక్‌‌ పవర్‌‌ప్లేలో 81/2 స్కోరు చేశారు. ఈ క్రమంలో అభిషేక్‌‌ 20 బాల్స్‌‌లోనే హాఫ్‌‌ సెంచరీ పూర్తి చేశాడు. కానీ అరాఫత్‌‌ మిన్హాస్‌‌ (2/25) వేసిన 8వ ఓవర్‌‌లో అభిషేక్‌‌ స్టంపౌట్ కావడంతో మూడో వికెట్‌‌కు 42 రన్స్‌‌ భాగస్వామ్యం ముగిసింది. ఈ దశలో వచ్చిన ఇషాన్‌‌ కిషన్‌‌ (20) నిలకడగా ఆడాడు.

అయితే 11 నుంచి 15 ఓవర్ల మధ్య రన్‌‌రేట్ తగ్గడంతో నాలుగో వికెట్‌‌కు 35 రన్స్‌‌ మాత్రమే జతయ్యాయి. ఆరు బాల్స్‌‌ తేడాలో ఇషాన్‌‌, శ్రేయస్‌‌ ఔట్‌‌ కావడంతో ఇండియా 133/5తో కష్టాల్లో పడింది. అయితే చివర్లో తిలక్‌‌ వర్మ సూపర్‌‌ ఇన్నింగ్స్‌‌తో ఆకట్టుకున్నాడు. శివమ్‌‌ దూబే (27)తో కలిసి పాక్‌‌ స్పిన్నర్లపై ఎదురుదాడి చేశాడు. భారీ షాట్లతో ఈ ఇద్దరు ఆరో వికెట్‌‌కు కేవలం ఐదు ఓవర్లలోనే 62 రన్స్‌‌ జోడించారు. ఈ క్రమంలో తిలక్‌‌ 21 బాల్స్‌‌లోనే హాఫ్‌‌ సెంచరీ పూర్తి చేయడంతో ఇండియా స్కోరు రెండు వందలు దాటింది. అహ్మద్‌‌ డానియెల్‌‌ 2 వికెట్లు పడగొట్టాడు. 

 సంక్షిప్త స్కోర్లు

ఇండియా: 20 ఓవర్లలో 211/6 (అభిషేక్‌‌ 61, తిలక్‌‌ 51*, అరాఫత్‌‌ మిన్హాస్‌‌ 2/25). పాకిస్తాన్‌‌: 20 ఓవర్లలో 192/6 (హసన్‌‌ నవాజ్‌‌ 96, అక్షర్‌‌ పటేల్‌‌ 2/29).