- ఇప్పటివరకు మహిళా సంఘాలకు 43.32 లక్షల చీరలు అందజేత
హైదరాబాద్, వెలుగు: రాష్ట్రంలో పంచాయతీ ఎన్నికల కోడ్ కారణంగా ఇందిరమ్మ చీరల పంపిణీకి తాత్కాలిక బ్రేక్ పడింది. ఇప్పటి వరకు మహిళా సంఘాల సభ్యులకు వారం రోజుల్లోనే 43,32,828 చీరల పంపిణీ పూర్తి చేశారు. ఈ నెల 19 నుంచి 25 వరకు ఇందిరమ్మ చీరలు అందజేశారు.
సెర్ప్ లో 46.22 లక్షల మంది మహిళా సభ్యులు ఉండగా.. 77.89 శాతం మంది సభ్యులకు చీరలు పంచారు. దాదాపు 2లక్షల వరకు మహిళలకు కొత్తగా ఎస్ హెచ్ జీ నూతన సభ్యత్వం ఇచ్చి చీరలను పంపిణీ చేశారు. అయితే, పంచాయతీ ఎన్నికల కోడ్ నేపథ్యంలో 25 నుంచి చీరల పంపిణీని తాత్కాలికంగా నిలిపివేయగా.. ప్రస్తుతం గోదాముల్లో 16 లక్షల చీరలు అందుబాటులో ఉన్నాయి.
కోడ్ ముగిసిన వెంటనే చీరల పంపిణీ పునః ప్రారంభం కానున్నది. అధికారులు 18 ఏండ్లు నిండిన ప్రతి మహిళకు సభ్యత్వం ఇచ్చి చీరలు పంచుతున్నారు. కోటి మంది మహిళలకు సభ్యత్వం ఇచ్చి కోటి చీరల పంపిణీ చేసేందుకు ప్రణాళిక ప్రకారం ముందుకెళ్తున్నారు.
