భద్రాద్రి కొత్తగూడెం, వెలుగు: నిధుల దుర్వినియోగానికి పాల్పడ్డారని ఆరోపణలు ఎదుర్కొంటున్న సింగరేణి సీఎండీ శ్రీధర్పై విచారణ చేపట్టాలని కొత్తగూడెం పోలీసులను హైకోర్టు ఆదేశించింది. గెస్ట్హౌస్ వినియోగానికి సంబంధించి సీఎండీ శ్రీధర్నిధుల దుర్వినియోగానికి పాల్పడ్డారని, దానిపై సమగ్ర విచారణ చేపట్టాలంటూ కొత్తగూడెంకు చెందిన టీబీజీకేఎస్ మాజీ నేత సంపత్కుమార్ గతంలో కోర్టులో కేసు వేశారు. నిధుల దుర్వినియోగంపై 2020లో కోర్టు ఆదేశాల మేరకు కొత్తగూడెం వన్టౌన్ కోర్టులో సీఎండీపై కేసు నమోదైందని ఆయన తెలిపారు. 2015 సంవత్సరంలో శ్రీధర్ సింగరేణి సీఎండీగా బాధ్యతలు చేపట్టిన తర్వాత హైదరాబాద్లో గెస్ట్హౌస్ను నిబంధనలకు విరుద్ధంగా తీసుకున్నారని ఆరోపించారు.
అందుకు సంబంధించి దాదాపు రూ.11లక్షల కంపెనీ నిధులను అక్రమంగా వాడుకున్నారని ఆయన ఆరోపించారు. నిధుల దుర్వినియోగంపై తాను ఆర్టీఐ ద్వారా సమాచారం అడగగా అప్పటికప్పుడు తప్పుడు తేదీలతో ఆ డబ్బులను కంపెనీకి తిరిగి సీఎండీ చెల్లించారని పేర్కొన్నారు. ఈ నిధుల దుర్వినియోగంపై తాను కోర్టును ఆశ్రయించానని తెలిపారు. 2020లో కోర్టు ఆదేశాల మేరకు కొత్తగూడెం వన్టౌన్ పీఎస్ లో కేసు నమోదైందన్నారు. ప్రస్తుతం ఆ కేసుకు సంబంధించి తన వద్ద ఏమైనా డాక్యుమెంటేషన్ ఆధారాలుంటే తమకు ఇవ్వాలని వన్ టౌన్ సీఐ సత్యనారాయణ తనను బుధవారం రాత్రి అడిగారని తెలిపారు. నిధుల దుర్వినియోగానికి సంబంధించి పోలీసులు సమగ్ర విచారణ చేపట్టాలని కోరారు.
