చారెడేసి కళ్లు, నుదిటి మీద బొట్టు, ముక్కుకు ముక్కెర, అందమైన నవ్వు, ఆకట్టుకునే నటనతో మెస్మరైజ్ చేస్తోంది తాన్యా మణిక్తల. వీధి నాటకాల నుంచి, యూట్యూబ్, వెబ్ సిరీస్లు, ఇప్పుడు సినిమాల వరకు ఇంట్రెస్టింగ్ జర్నీ తనది. ఇంగ్లీష్ లిటరేచర్ చదివి, యాక్టింగ్ కెరీర్గా ఎంచుకుంది.
‘‘మాది ఢిల్లీ. శివాజీ కాలేజ్లో ఇంగ్లీష్ లిటరేచర్ డిగ్రీ చదివా. ఆ తర్వాత ‘ది సోషల్ రష్’ అనే మీడియా వెబ్సైట్లో కాపీ రైటర్గా చేరా. 2018లో నా పేరుతో ఒక యూట్యూబ్ ఛానెల్ పెట్టా. ఆ ఛానెల్ పెట్టడం వల్లే నాకు ‘ఫ్లేమ్స్’ సిరీస్లో నటించే అవకాశం వచ్చింది. అదే టైంలో ‘ది టైమ్లైనర్స్’ అనే యూట్యూబ్ ఛానెల్లోనూ ఆఫర్ వచ్చింది. ఈ రెండింటితో డిజిటల్ మీడియా ఆడియెన్స్కి దగ్గరయ్యా. ‘ఫ్లేమ్స్’ మొదటి సీజన్ అప్పుడు నేను చదువుకుంటున్నా. అందులో నా క్యారెక్టర్ ‘ఇషిత’ కూడా కాలేజీ స్టూడెంట్. ఆ క్యారెక్టర్ నా బెస్ట్ ఫ్రెండ్ అయిపోయింది. టీనేజీ అమ్మాయి నుంచి వయసు పెరిగేకొద్దీ క్యారెక్టర్లో మార్పు కనిపిస్తుంది. ఈ ఏడాది అక్టోబర్లో ‘ఫ్లేమ్స్’ సీజన్3 కూడా రిలీజ్ అయింది. ‘ఫ్లేమ్స్’తో సంపాదించుకున్న అభిమానమే ఆ సిరీస్ సీక్వెల్స్లోనూ నటించేందుకు ఛాన్స్ ఇచ్చింది.
నటనపై ఇష్టం.. అలా వచ్చింది
నిజానికి నాకంటే మా అక్కకి నాటకాలు, సినిమాలు చూడటమంటే చాలా ఇష్టం. తనతోపాటు నన్ను తీసుకెళ్లేది. అలా నాకు నాటకాల మీద ఇంట్రెస్ట్ పెరిగింది. చిన్నప్పుడు స్టేజీ మీద ఫ్యాషన్ షో, డాన్స్ పర్ఫార్మెన్స్ చేసేదాన్ని. కాలేజీలో ఉన్నప్పుడు ఒకసారి స్టేజీ మీద పర్ఫార్మ్ చేసే ఛాన్స్ వచ్చింది. కానీ, సీనియర్స్ గోల చేయడంతో ఆడిటోరియం నుంచి బయటికెళ్లాల్సి వచ్చింది. ఆ తర్వాత ఒక ఏడాదిపాటు వీధి నాటకాల్లో నటించా. అప్పుడు నాకు శివమ్ పరిచయం అయ్యాడు. అతనికి ‘ఫ్లేమ్స్’ డైరెక్షన్ టీంలో ఫ్రెండ్స్ ఉన్నారు. వాళ్లకు శివమ్ నా నెంబర్ ఇచ్చాడు. అలా నాకు ఆడిషన్ కాల్ రావడం, సెలక్ట్ అవ్వడం జరిగింది. అయితే, ఆ ఆడిషన్ కాల్ వచ్చినప్పుడు భయపడ్డా.. ‘ఎవరు అడిగారు? నా పేరు ఎందుకు చెప్పారు?’ అని సీరియస్ అయ్యా. వెళ్లడానికి అస్సలు ఇంట్రెస్ట్ చూపించలేదు. అప్పుడు కూడా మా అక్క నాకు నచ్చజెప్పి, ఆడిషన్కి ఒప్పించింది.
అటాచ్మెంట్ ఎక్కువ
మా ఫ్యామిలీతో, ముఖ్యంగా నా తోబుట్టువులతో నాకు అటాచ్మెంట్ చాలా ఎక్కువ. అక్క సాన్యా, అన్న అభిజిత్ హయ్యర్ స్టడీస్ కోసం ఫారిన్ వెళ్లడానికి రెడీ అవుతున్నారు. అప్పుడు నేను యాక్టింగ్ చేస్తున్నా. అప్పటికి నా డిగ్రీ కూడా పూర్తి కాలేదు. ఇండస్ట్రీలో ఎవరూ తెలియదు. ఒక ప్రాజెక్ట్ అయిపోతే.. రెండోది ఎప్పుడు వస్తుందో తెలియదు. అప్పటివరకు ఓపికగా ఎదురుచూడాలి. కానీ, నేనేమో ఒక క్లాస్ అయిపోగానే నెక్స్ట్ క్లాస్ ఎప్పుడు? అన్నట్టే నెక్స్ట్ ప్రాజెక్ట్ కోసం ఎదురుచూసేదాన్ని. ఆ టైంలో అక్కని, అన్నని చాలా మిస్సయ్యేదాన్ని. వాళ్లు లేకుండా నేను ఇదంతా ఎలా చేయగలుగుతున్నా? అనిపించేది ఒక్కోసారి.
ఫ్యూచర్ లేదనిపించి..
మొదట్లో ఒక సిరీస్ చేస్తే చాలు.. ఆ తర్వాత ఆఫర్లు అవే వస్తాయనుకునేదాన్ని. ‘ఫ్లేమ్స్’ మొదటి సీజన్ తర్వాత అదే ఉత్సాహంతో కొన్ని ఆడిషన్స్కి వెళ్లా. కానీ, వాటిలో రిజెక్ట్ అయ్యా. దాంతో ఇకపై నాకు యాక్టింగ్లో ఫ్యూచర్ లేదనిపించింది. అందుకని ఒక కంపెనీలో కాపీరైటర్గా జాబ్ చేయడం మొదలుపెట్టా. కాపీరైటింగ్ జాబ్ చేసేటప్పుడు మెట్రోలో వెళ్లేదాన్ని. ఢిల్లీ నుంచి గుర్గావ్కి జర్నీ అది. అప్పుడు పాటలు వింటూ ఎంజాయ్ చేసేదాన్ని. ఆ జాబ్ దాదాపు నాలుగు నెలలు చేశా.
టర్నింగ్ పాయింట్!
నేను నటించిన ‘ఎ సూటబుల్ బాయ్’ సిరీస్ను నవల ఆధారంగా తీశారు. నాకు పుస్తకాలు చదవడమంటే చాలా ఇష్టం. ఈ నవల రచయిత విక్రమ్ సేథ్ రాసిన బుక్స్ కొన్ని చదివా. ఇది మాత్రం చదవలేదు. ఒకరోజు మా యూనివర్సిటీ థియేటర్ గ్రూప్లో ఒక ఫ్రెండ్ ఫోన్ చేసి, ‘బీబీసీ వాళ్ల కోసం మీరా నాయర్ ఓ సిరీస్ తీస్తున్నారట. ఆడిషన్స్ ఉన్నాయి రా’ అని చెప్తే వెళ్లా. ఆడిషన్స్లో ఫస్ట్ రౌండ్లో సెలక్ట్ అయ్యా. నన్ను మీరా నాయర్ ఇంటర్వ్యూ చేసి, అందులో సెలెక్ట్ అయ్యాక మళ్లీ ఆడిషన్స్ తీసుకుంటారని చెప్పింది ఆ టీం.
ఆ తర్వాత ఆవిడ తీయబోయే సిరీస్ ‘ఎ సూటబుల్ బాయ్’ నవల అని తెలిసింది. అది వినగానే స్టన్ అయ్యా. ఎందుకంటే ఆ బుక్ చదవలేదు. మా ఫ్రెండ్తో చెప్తే ‘అయితేనేం? నేను చదివా’ అంటూ ఆ కథ మొత్తం నాకు చెప్పింది. ఆ తర్వాత నా ఇంటర్వ్యూ అయిపోయింది. నాకయితే ఈ ఆడిషన్స్లో సెలక్ట్ అవుతానని నమ్మకంలేదు. దాంతో నేను హయ్యర్ స్టడీస్ కోసం ఆస్ట్రేలియా వెళ్లాలనుకున్నా. అక్కడికి వెళ్లడానికి పదిహేను రోజుల ముందు ఫైనల్ ఆడిషన్ కోసం కాల్ వచ్చింది. అందులో కూడా సెలక్ట్ కావడంతో ‘లతా మెహ్రా’ పాత్రకు తీసుకున్నారు. అందుకని అప్పటి నుంచి నేను నా లైఫ్ని ప్లాన్ చేసుకోకూడదు అని డిసైడ్ అయ్యా. లైఫ్ ఇచ్చే అవకాశాలను అంకితభావంతో చేస్తూ వెళ్లాలనుకున్నా.
అదో కొత్త అనుభూతి
‘చుట్జ్పా’ డైరెక్టర్ సిమర్, నేను నాటకాల్లో కలిసి పనిచేశాం. అప్పుడు తను నా సీనియర్. ‘చుట్జ్పా’లో నా రోల్ తను చెప్పినప్పుడు ఎగ్జైట్ అవ్వలేదు. ఆ తర్వాత కాస్త కన్విన్స్ చేసి, ఒప్పించాడు. ఎందుకంటే సిమర్ క్యారెక్టర్స్ని ఎలా చూపిస్తాడో నాకు తెలుసు. చాలా సెన్సిటివ్గా ఉంటాయి క్యారెక్టర్స్. అందుకే కొంచెం ఆలోచించా. అలాగే ఇందులో కో– యాక్టర్స్ ఎవరూ ఉండరు. కెమెరా ముందుకెళ్లి నటించి వచ్చేయాలి. అది చాలా ఛాలెంజింగ్గా అనిపించింది. ఎందుకంటే కో–యాక్టర్స్ ఉంటే వాళ్ల రియాక్షన్ని బట్టి నటించొచ్చు. కానీ, ఇక్కడ అలా లేదు. వాళ్లు ఉన్నట్టు, ఏదో చెప్తున్నట్టు ఊహించుకుని నటించాలి.’’
నా గురించి...
మాది జాయింట్ ఫ్యామిలీ. హిందీ, ఇంగ్లీష్లాగే స్పానిష్ కూడా బాగా మాట్లాడతా. ఎక్కడున్నా రోజూ పొద్దున్నే మెడిటేషన్ చేస్తా. రాత్రి పడుకునే ముందు మ్యూజిక్ వింటా. నేను ఎప్పుడూ ఒక్కదాన్నే ఎక్కడికీ వెళ్లలేదు. ఒకసారి మాత్రం హరిద్వార్కి సోలో ట్రిప్ వెళ్లా. అది అనుకోకుండా జరిగింది. అది నేను చేసిన ఏకైక అడ్వెంచర్. విజయ్ సేతుపతి నటించిన ‘ముంబైకర్’లో ఒక రోల్లో కనిపించా. వెబ్ సిరీస్ల విషయానికొస్తే.. 2018లో స్కూల్ డేస్ చేస్తున్నప్పుడు ‘ఫ్లేమ్స్’ ఆఫర్ వచ్చింది. తర్వాత ‘ఎ సూటబుల్ బాయ్’, ‘ఫీల్స్ లైక్ ఇష్క్’, ‘చుట్జ్పా’ చేశా. ప్రజెంట్ ‘హౌ టు ఫాల్ ఇన్ లవ్’, ‘మీనా’ వెబ్ సిరీస్లలో యాక్ట్ చేస్తున్నా. ఫీచర్స్ కూడా రాస్తున్నా.
‘‘ఒక నటిగా ఎదగాలంటే నా సత్తాని నిరూపించుకోవాలి. కెరీర్లో ముందుకు వెళ్లేకొద్దీ కచ్చితంగా ఒత్తిడి ఉంటుంది. ఆ ఒత్తిడి ఉండటమే మంచిది. దానివల్లే ఇంకాస్త ఎక్కువ కష్టపడాలి అనిపిస్తుంది. కరోనా టైంలో ‘ఎ సూటబుల్ బాయ్’ రిలీజ్ అయింది. అప్పుడు దేశం మొత్తం లాక్డౌన్లో ఉంది. దాంతో అందరూ ఇండ్లలోనే ఉన్నారు. సినిమాలు, సిరీస్లు చూస్తూ ప్యాండెమిక్ ఆలోచన నుంచి మైండ్ని రిలాక్స్ చేసుకునే ప్రయత్నం చేశారు. అలా మా సిరీస్ కూడా ఆడియెన్స్కి బాగా రీచ్ అయింది. అప్పుడు నాకు 24 ఏండ్లు. ఆ వయసులో ఒక కొత్త నటికి అది చాలా పెద్ద సక్సెస్.’’