పూలను పేర్చి.. పాటలను అల్లి.. ఆటపాటలతో ఆడపడుచులు ఒక్కచోట చేరితే అదే బతుకమ్మ సంబరం! తెలంగాణ మట్టి వాసనను, సంస్కృతీ సంప్రదాయాలను ఖండాంతరాలకు చేర్చుతున్న ఈ పూల పండుగ విదేశీ గడ్డపైనా ఘనంగా జరుగుతోంది.
అమెరికా నుంచి ఆస్ట్రేలియా వరకు.. గల్ఫ్ దేశాల నుంచి యూరప్‌ దాకా తెలంగాణ ఎన్నారైలు బతుకమ్మ వేడుకలను అంగరంగ వైభవంగా నిర్వహిస్తున్నారు. ఎక్కడున్నా తమ మూలాలను మరువకుండా సంప్రదాయాలకు పట్టం కడుతున్నారు.
ప్రపంచవ్యాప్తంగా ఉన్న తెలంగాణ ఎన్నారైలు, తెలుగు సంఘాలు ఏటా బతుకమ్మ పండుగను ఘనంగా నిర్వహిస్తున్నాయి. అమెరికా, కెనడాలోని పలు నగరాల్లో బతుకమ్మను ‘ఫెస్టివల్ ఆఫ్ లైఫ్‌’గా గుర్తించారు. ఇండియానాపాలిస్‌‌‌‌లో తెలంగాణ అమెరికన్ తెలుగు అసోసియేషన్ ఆధ్వర్యంలో అక్టోబర్‌11న నోబుల్స్‌‌‌‌విల్లేలోని హ్యామిల్టన్ కౌంటీ ఫెయిర్‌‌‌‌గ్రౌండ్స్‌‌‌‌లో వేడుకలు జరిగాయి.
నార్త్ కరోలినాలో ట్రయాంగిల్ తెలంగాణ అసోసియేషన్ ఆధ్వర్యంలో అక్టోబర్‌10న ఎంగిలిపూల బతుకమ్మ, 18న సద్దుల బతుకమ్మ వేడుకలు నిర్వహించనున్నారు. సియాటెల్‌‌‌‌లో వాషింగ్టన్ తెలంగాణ అసోసియేషన్‌‌‌‌తోపాటు కాలిఫోర్నియా, హ్యూస్టన్, చికాగో, డల్లాస్, అట్లాంటా నగరాల్లోనూ ఉత్సవాలు జరుగుతున్నాయి.
మలేషియాలోని కౌలాలంపూర్‌‌‌‌లో తెలంగాణ అసోసియేషన్ ఆధ్వర్యంలో బతుకమ్మ సంబరాలు నిర్వహిస్తున్నారు. చికాగోలో తెలంగాణ డెవలప్‌‌‌‌మెంట్ ఫోరం ఆధ్వర్యంలో అక్టోబర్‌10న బతుకమ్మ ఆటపాటలు, కోలాటంతోపాటు గౌరీ, జమ్మి పూజలు చేశారు. దక్షిణాఫ్రికాలో తెలంగాణ అసోసియేషన్ నిర్వహించే వేడుకలకు రాష్ట్ర మంత్రి సీతక్క ముఖ్య అతిథిగా హాజరుకానున్నారు.
గల్ఫ్ దేశాల్లో ఘనంగా..
దుబాయ్, సౌదీ అరేబియా, ఒమన్‌ సహా గల్ఫ్ దేశాల్లోనూ బతుకమ్మ సందడి నెలకొంది. జెడ్డాలోని భారత రాయబార కార్యాలయ ప్రాంగణంలో తొలిసారిగా అధికారికంగా బహిరంగ బతుకమ్మ వేడుకలు నిర్వహించడం విశేషం. ఎమిరేట్స్ తెలంగాణ కల్చరల్ అసోసియేషన్ ఆధ్వర్యంలో దుబాయ్‌‌లోనూ ఉత్సవాలు జరిగాయి.
మలేషియాలో ఫెడరేషన్ ఆఫ్ ఎన్నారై కమ్యూనిటీ అసోసియేషన్స్ ఆధ్వర్యంలో అక్టోబర్‌17న కౌలాలంపూర్‌‌లోని కండయ్య హాల్‌‌లో ‘బతుకమ్మ సెలబ్రేషన్స్ 2026’ నిర్వహించనున్నారు. ఆస్ట్రేలియా, న్యూజిలాండ్‌‌లోని సిడ్నీ, మెల్‌‌బోర్న్, బ్రిస్బేన్ నగరాల్లో మహిళలు పార్కుల్లో బతుకమ్మ ఆడుతున్నారు. యూకే, నెదర్లాండ్స్‌‌లోనూ తెలుగు సంఘాలు బతుకమ్మ, దసరా వేడుకలను నిర్వహిస్తూ తెలంగాణ సంస్కృతి, సంప్రదాయాలను విదేశాల్లోనూ చాటుతున్నాయి.
