బషీర్బాగ్, వెలుగు: సర్పంచ్ ఎన్నికల రిజర్వేషన్లలో బీసీలకు అన్యాయం జరగలేదని డిప్యూటీ సీఎం భట్టి విక్రమార్క, మంత్రులు సీతక్క , పొన్నం ప్రభాకర్ మాట్లాడటం హాస్యాస్పదంగా ఉందని బీసీ జేఏసీ చైర్మన్ ఆర్ కృష్ణయ్య అన్నారు. బీసీలకు జరిగిన అన్యాయంపై చర్చకు సిద్ధంగా ఉన్నానని , అఖిలపక్ష సమావేశం ఏర్పాటు చేస్తే ఆధారాలతో సహా బయటపెడతానన్నారు.
జేఏసీ ఆధ్వర్యంలో శనివారం బషీర్బాగ్ అమ్మవారి ఆలయం నుంచి బాబూ జగ్జీవన్రామ్‌ విగ్రహం వరకు బీసీ తిరుగుబాటు ర్యాలీ నిర్వహించారు. ఈ సందర్భంగా ఆయన మాట్లాడుతూ.. రాష్ట్ర ప్రభుత్వానికి నిజంగా చిత్తశుద్ధి ఉంటే వెంటనే ఎన్నికలను వాయిదా వేసి, 42 శాతం రిజర్వేషన్ల ఖరారు దిశగా చర్యలు చేపట్టాలని డిమాండ్‌ చేశారు. మున్నూరుకాపు మహాసభ అధ్యక్షుడు కొండ దేవయ్య, ఆనంద్‌ గౌడ్‌, అంజి, మోదీ రాందేవ్‌ పాల్గొన్నారు.
