- ఇచ్చిన హామీ నిలబెట్టుకోనున్న రేవంత్ రెడ్డి
- ప్రమాణ స్వీకారానికి దివ్యాంగురాలికి ఆహ్వానం
హైదరాబాద్, వెలుగు : కాంగ్రెస్ సర్కార్లో తొలి ఉద్యోగం దివ్యాంగురాలు రజనీకి ఇవ్వనున్నట్టు తెలుస్తున్నది. రేవంత్ ప్రమాణ స్వీకారానికి రావాలంటూ రజనీకి ఇప్పటికే కాంగ్రెస్ పార్టీ ఆహ్వానం పంపింది. సీఎంగా రేవంత్ రెడ్డి బాధ్యతలు స్వీకరించిన తర్వాత.. రజనీకి ఉద్యోగం ఇచ్చే ఫైల్పైనే ఆయన తొలి సంతకం చేస్తారని సమాచారం.
ఎన్నికల ప్రచారంలో భాగంగా ఆరు గ్యారెంటీ కార్డుల పాంప్లెట్ను కాంగ్రెస్ లీడర్లు ఇంటింటికీ పంచారు. ఇది చదివిన రజనీ.. అక్టోబర్ 17న తన బాధ చెప్పుకోవడానికి గాంధీభవన్కు వచ్చింది. తాను పీజీ చేశానని, హైట్ తక్కువగా ఉండటంతో ఎవరూ ఉద్యోగం ఇవ్వడం లేదని రేవంత్ రెడ్డితో రజనీ ఆవేదన వ్యక్తం చేసింది. ఈ నేపథ్యంలోనే గ్యారెంటీ కార్డుపై రజనీ వివరాలను తీసుకున్న రేవంత్.. ప్రమాణ స్వీకారం చేసే రోజే ఉద్యోగం ఇస్తామని హామీ ఇచ్చారు.
కాగా, కొత్త ప్రభుత్వంలో తొలి ఉద్యోగం తనకే రావడం సంతోషంగా ఉందని ఆమె చెప్పింది. ఉద్యోగం కోసం కాంగ్రెస్తో పాటు బీఆర్ఎస్, బీజేపీ లీడర్లనూ కలిశానని రజనీ గుర్తు చేసింది. గతంలో కాంట్రాక్ట్, ఔట్సోర్సింగ్ జాబ్ కోసం సెక్రటేరియెట్ చుట్టూ తిరిగినా స్పందన రాలేదన్నారు. డబుల్ బెడ్రూం ఇల్లు, ఉద్యోగం కోసం ఎంతో ట్రై చేశానని చెప్పింది. ప్రైవేట్ ఉద్యోగం కోసం ప్రయత్నించినా దక్కలేదని తెలిపింది. తనకు ఏ ఉద్యోగం ఇచ్చినా చేస్తానని చెప్పింది. అమ్మాయిలను తక్కువ చేసి చూడొద్దని సూచించింది.
