- ఎమ్మెల్యే సంజయ్ కుమార్
జగిత్యాల రూరల్, వెలుగు: రాష్ట్ర ప్రభుత్వం జగిత్యాల అభివృద్ధికి ప్రాధాన్యమిస్తోందని జగిత్యాల ఎమ్మెల్యే సంజయ్ కుమార్ అన్నారు. గురువారం జిల్లా కేంద్రంలోని కొత్త బస్టాండ్-–నర్సింగ్ కాలేజ్ రోడ్డులో, 20వ వార్డులో డ్రైనేజీ పనులకు శంకుస్థాపన చేశారు. ఈ సందర్భంగా ఆయన మాట్లాడుతూ భవిష్యత్ అవసరాల దృష్ట్యా యావర్ రోడ్డులో 900 మీటర్ల అండర్గ్రౌండ్ డ్రైనేజీ పనులు చేపట్టినట్లు తెలిపారు. మార్కండేయ నగర్– యావర్ రోడ్డులో డ్రైనేజీ, రోడ్డు వెడల్పు పనులకు కృషి చేస్తున్నట్టు చెప్పారు.
మాస్టర్ ప్లాన్ప్రకారం పట్టణంలో నిర్మాణాలు చేపట్టాలన్నారు. పట్టణ అభివృద్ధిలో ప్రజలు, అధికారుల భాగస్వాములు కావాలని సూచించారు. మోతే చెరువును రూ.3.5 కోట్లతో పునరుద్ధరిస్తామన్నారు. కార్యక్రమంలో మున్సిపల్ కమిషనర్ ఆనంద్, లీడర్లు రామచందర్ రావు, నాగభూషణం, శ్రీనివాస్, లక్ష్మణ్, తదితరులు పాల్గొన్నారు.
