- కాంగ్రెస్ ప్రధాన కార్యదర్శి జైరాం రమేశ్ సెటైర్
న్యూఢిల్లీ : మాజీ ఎంపీ, బిజినెస్మ్యాన్ నవీన్ జిందాల్ బీజేపీలో చేరడంపై కాంగ్రెస్ ప్రధాన కార్యదర్శి జైరాం రమేశ్ స్పందించారు. అవినీతి లీడర్లకు పట్టిన మురికిని వదిలించాలంటే బీజేపీకి పెద్ద సైజ్ వాషింగ్ మెషీన్ అవసరమని సెటైర్ వేశారు. పదేండ్లుగా కాంగ్రెస్కు ఎలాంటి సేవలు అందించని జిందాల్.. ఇప్పుడు రాజీనామా చేస్తున్నట్లు ప్రకటించడం పెద్ద జోక్ అని కామెంట్ చేశారు. జార్ఖండ్లోని బొగ్గు బ్లాక్ల కేటాయింపులో అక్రమాలకు సంబంధించిన కేసులో జిందాల్ను సీబీఐ విచారిస్తోంది. ఇదే కేసులో మనీలాండరింగ్ అభియోగాలు మోపి ఈడీ దర్యాప్తు చేపట్టింది. వీటికి సంబంధించిన క్లిప్స్ను జైరాం రమేశ్ ట్విట్టర్లో షేర్ చేశారు. ‘‘అవినీతిపరులందరినీ సీబీఐ, ఈడీల ద్వారా భయపెడతారు. రకరకాల ఆరోపణలు చేస్తరు. అదే కళంకితులు బీజేపీలో చేరాక ఏ అవినీతి గురించి మాట్లాడరు” అని జైరాం కామెంట్ చేశారు. కాంగ్రెస్ లేని భారత్ను బీజేపీ కోరుకుంటోందని, కానీ ఆ పార్టీ అవినీతిపరులు లేని కాంగ్రెస్ను తయారుచేస్తోందని అన్నారు. 2004 నుంచి 2014 దాకా హర్యానాలోని కురుక్షేత్ర సెగ్మెంట్ నుంచి జిందాల్ ఎంపీగా ఉన్నారు. ఆపై జరిగిన ఎన్నికల్లో ఓడిపోయారు. 2019లో పోటీ చేయలేదు. ఈ క్రమంలో జిందాల్ కాంగ్రెస్కు రిజైన్ చేసి ఆదివారం బీజేపీలో చేరారు. ఆ పార్టీ అదే సెగ్మెంట్ నుంచి జిందాల్కు ఎంపీ టికెట్ కేటాయించింది.
