![బీసీలకు 60 శాతం సీట్లియ్యకుంటే బుద్ధి చెప్తం: జాజుల శ్రీనివాస్ గౌడ్](https://static.v6velugu.com/uploads/2023/10/Jajula-Srinivas-If-60-percent-of-BCs-dont-get-seats-we-will-tell-Buddhi-Jajula_kWpUwb3SCm.jpg)
బీసీ మేనిఫెస్టో విడుదల చేసిన జాజుల
హైదరాబాద్, వెలుగు: బీసీలకు 60 శాతం సీట్లు ఇవ్వకుంటే ఆ పార్టీలకు తగిన బుద్ధి చెప్తామని బీసీ సంక్షేమ సంఘం అధ్యక్షుడు జాజుల శ్రీనివాస్ గౌడ్ హెచ్చరించారు. ‘పార్టీలు మా దగ్గరకు వచ్చి.. మా సమస్యలు తెలుకోవాలి. ఏసీ రూముల్లో కూర్చొని మమ్మల్ని వినతిపత్రాలు ఇవ్వమంటే కుదరదు’ అని ఆయన పేర్కొన్నారు. హైదరాబాద్లోని సోమాజిగూడ ప్రెస్క్లబ్లో శనివారం బీసీ మేనిఫెస్టో–2023ను శ్రీనివాస్ గౌడ్ విడుదల చేశారు.
అనంతరం ఆయన మాట్లాడుతూ.. బీసీ మేనిఫెస్టోను ప్రతి రాజకీయ పార్టీ అమలు చేయాలని డిమాండ్ చేశారు. ఉద్యోగాల్లో బీసీలకు రిజర్వేషన్లు, ప్రమోషన్లు ఇవ్వాలని, ఎస్సీ, ఎస్టీల తరహాలోనే బీసీలకూ ఓ చట్టాన్ని తీసుకురావాలన్నారు. బీసీలకు సీఎం పదవి ఇచ్చే పార్టీకే తమ మద్దతు ఉంటుందని ఆయన తెలిపారు. ఈ కార్యక్రమంలో బీసీ సంక్షేమ సంఘం వర్కింగ్ ప్రెసిడెంట్ కుల్కచర్ల శ్రీనివాస్, తాటికొండ విక్రమ్ గౌడ్, లింగం గౌడ్, మహేశ్ యాదవ్ తదితరులు పాల్గొన్నారు.