-
ఫోన్లో ఇద్దరి మధ్య మాటల వార్
-
ఎఫ్ఆర్ఓపై కలెక్టర్కు, డీఎఫ్ఓకు ఎమ్మెల్యే ఫిర్యాదు
జనగామ/ బచ్చన్నపేట, వెలుగు : ‘ఏయ్ సక్కగ మాట్లడవయా.. ఎట్లున్నది నీకు’ అంటూ జనగామ ఎమ్మెల్యే ముత్తిరెడ్డి యాదగిరి రెడ్డి ఫారెస్ట్ రేంజ్ఆఫీసర్పై ఆగ్రహం వ్యక్తం చేశారు. ఒకానొకదశలో ‘నువ్వెంత అంటే నువ్వెంత’ అనే రేంజ్లో ఎమ్మెల్యే, రేంజ్ఆఫీసర్లు వాదులాడుకున్నారు. జనగామ జిల్లా బచ్చన్నపేట మండలం చిన్నరాంచెర్లలో ఆదివారం కొత్త గ్రామ పంచాయతీ భవన నిర్మాణానికి ఎమ్మెల్యే ముత్తిరెడ్డి భూమి పూజ చేశారు. ఈ సందర్భంగా గ్రామస్థులతో ఏర్పాటు చేసిన సమావేశంలో ఎమ్మెల్యే మాట్లాడారు. ఊరిలో కొండెంగ సమస్య ఉందని, పలువురిని కరుస్తుందని.. అయినా ఫారెస్ట్ఆఫీసర్లు పట్టించుకోవడం లేదని గ్రామస్థులు ఎమ్మెల్యేకు విన్నవించుకున్నారు.
దీంతో ఆయన జనగామ ఫారెస్ట్ రేంజ్ఆఫీసర్ కొండల్రెడ్డికి ఫోన్చేసి లౌడ్ స్పీకర్ ఆన్ చేసి మాట్లాడారు. ‘ఊరోళ్లంతా నన్ను బొడ్రాయి కాడ కూసుండ బెట్టి సుట్టుముట్టిన్రు. గ్రామంలోకి చిరుత పులి వస్తే ఏం చేస్తరు’ అని అడిగారు. దీనికి కొండల్రెడ్డి ‘దానిని ఊర్లో నుంచి వెళ్లగొట్టడమో లేక పట్టుకోవడమో చేస్తం’ అని చెప్పారు. ‘ఊళ్లకెళ్లి ఎల్లగొడితే ఏడికి పోతది..చుట్టుపక్కల అడవి, గుట్టలు ఏమన్నా ఉన్నయా. దాన్ని పట్టాల్సిందే కదా. చెప్పరూ పడ్తరా ఏం జేస్తరు’ అని ఎమ్మెల్యే ప్రశ్నించారు. ఈ క్రమంలో ఫారెస్ట్ రేంజ్ ఆఫీసర్ కొండెంగ సమస్య ఉందని చెప్పబోయారు. ‘నేను అడిగేది చిరుతపులి గురించి.. నేను తెలుగులో అడుగుతుంటే నువ్వు ఇంగ్లీష్లో చెప్తున్నవ్’ అని ముత్తిరెడ్డి అనగానే కొండల్రెడ్డి కూడా‘నేను తెలుగులనే చెబుతున్న నీకు’ అంటూ సమాధానమిచ్చారు. దీంతో ఎమ్మెల్యే ఆగ్రహం వ్యక్తం చేశారు. ‘ఏయ్ ఏం మాట్లాడుతున్నవ్..ఎట్లున్నది నీకు.. సక్కగ మాట్లడవయా’ అంటూ ఫైర్అయ్యారు. దీనికి ఫారెస్ట్ఆఫీసర్ ‘మీరు రెస్పెక్ట్ ఇస్తే నేనూ ఇస్తా లేదంటే ఏం జేస్కుంటవో చేస్కో’ అని బదులిచ్చారు. మరింత ఆగ్రహానికి గురైన ఎమ్మెల్యే ‘పెట్టెయ్ ఫోన్’ అనగానే ఫారెస్ట్ ఆఫీసర్ కూడా ‘పెట్టెయ్ ఫోన్’ అని అన్నారు. వెంటనే ఎమ్మెల్యే కలెక్టర్ శివలింగయ్యకు, డీఎఫ్ఓకు ఫోన్ చేసి కంప్లయింట్ చేశారు.
తనో యూజ్లెస్ : కలెక్టర్ శివలింగయ్య
కలెక్టర్ శివలింగయ్యకు ఫోన్ చేసిన ముత్తిరెడ్డి తాను ఆర్నెళ్లుగా కొండెంగ సమస్య ఉందని, దాదాపుగా 30 నుంచి 40 మందిని కరిచిందని ఎఫ్ఆర్ఓకు చెప్తే ఏం జేస్కుంటరో చేస్కోండి అని మాట్లాడుతున్నాడని.. దీనికి గ్రామస్థులే సాక్ష్యమన్నారు. తాను లౌడ్ స్పీకర్ పెట్టి మాట్లాడానని, అందరూ విన్నారన్నారు. స్పందించిన కలెక్టర్ ‘అలా మాట్లాడిండా.. తనో యూజ్ లెస్’ అంటూ ‘విచారణ చేపట్టి మనం ఏం జెయ్యాల్నో అది చేద్దాం’ అని అన్నారు. ఎమ్మెల్యే మాట్లాడుతూ గ్రామస్థులు, ఇక్కడి సర్పంచ్తో రాత పూర్వక కంప్లయింట్ ఇప్పిస్తానని గవర్నమెంట్అంటే ఏంటో తెలిసొచ్చేలా చర్యలు తీసుకోవాలని కలెక్టర్ ను కోరారు.