వెంకట సుధాంశు.. జీ సరిగమప ‘ది సింగింగ్ సూపర్ స్టార్’ రన్నరప్గా అందరికీ తెలుసు. కానీ, ఆ గెలుపుకి ముందే ఓ సినిమాకి టైటిల్ ట్రాక్ పాడాడు. ‘భీమ్లానాయక్, ఆచార్య’ సినిమాల కోరస్లోనూ ఇతని గొంతు వినిపించింది. ఓ ఇండిపెండెంట్ సినిమాకి బ్యాక్గ్రౌండ్ స్కోర్ కూడా ఇచ్చాడు. అందులో రెండు పాటలకి ట్యూన్స్ కట్టాడు. సరిగమప వేదికపై సుధాంశు ఇచ్చిన మ్యాజికల్ పర్ఫార్మెన్స్లే.. ఈ అవకాశాలన్నీ అతన్ని వెతుక్కుంటూ వచ్చేలా చేశాయి. మ్యూజిక్ అంతగా తెలియదంటూనే తన గొంతుతో ఎంతో మంది మనసు దోచుకున్నాడు.
నా పూర్తి పేరు జిల్లెళ్ళమూడి వెంకట సుధాంశు. అందరూ షార్ట్కట్లో జె. వి సుధాంశు అని పిలుస్తుంటారు. మా నాన్న వెంకటేశ్వర ప్రసాద్ సెంట్రల్ గవర్నమెంట్ ఉద్యోగి. దాంతో నాన్నకి ట్రాన్స్ఫర్ అయినప్పుడల్లా మా పోస్టల్ అడ్రస్ మారుతుండేది. అమ్మ పద్మిని ప్రియదర్శిని ప్రైవేట్ ఇంగ్లీషు లెక్చరర్ కావడంతో నాన్న ట్రాన్స్ఫర్ని బట్టి తనూ కాలేజీలు మారుతుండేది. అలా రాష్ట్రం మొత్తం తిరిగి ప్రస్తుతం హైదరాబాద్లో ఉంటున్నాం. మ్యూజిక్ విషయానికొస్తే నాన్న వీణ వాయిస్తారు. బాగా పాడతారు కూడా. అలా నాన్న నుంచి వారసత్వంగా మ్యూజిక్ అబ్బింది కాబోలు.
మూడు నెలలకి మించి
నా ఆరేండ్లప్పుడు తెలిసినవాళ్లు చిన్న కీబోర్డు గిఫ్ట్ ఇచ్చారు. ఆ టైంలోనే టీవీలో మన్మథుడు సినిమా వస్తుండటంతో.. అందులోని పాటలకు తగ్గట్టు కీబోర్డు వాయించానట. ఎలాంటి ప్రాక్టీస్ లేకుండానే పాటల్ని ట్యూన్లో పాడానట. అది గమనించిన నాన్న ఆ మరుసటి రోజే నన్ను కీబోర్డు క్లాసులో చేర్పించారు. కర్నాటక సంగీతంలో బేసిక్స్ నాన్నే నేర్పించారు. కానీ, ఆ తర్వాత నేను పెద్దగా మ్యూజిక్పై ఇంట్రెస్ట్ పెట్టలేదు. మూడు నెలలకి మించి ట్రైనింగ్ ఏ గురువు దగ్గరా తీసుకోలేదు. ఎందుకంటే ఆ మూడు నెలల గ్యాప్లో నా బకెట్ లిస్ట్లో క్రికెట్, బాస్కెట్బాల్, కవితలు రాయడం ఇలా బోలెడు ఇష్టాలు వచ్చి చేరేవి. వీటన్నింటిలో ఒకటిగా మ్యూజిక్ నేర్చుకోవడాన్ని చూసేవాడ్నే తప్ప , ప్రత్యేకమైన ఇంట్రెస్ట్ ఏం పెట్టలేదు. అలాగని మ్యూజిక్ని పూర్తిగా పక్కనపెట్టలేదు. చుట్టు పక్కల మ్యూజిక్ కాంపిటీషన్స్ ఎక్కడ జరిగినా వెళ్లేవాడ్ని.
మళ్లీ మ్యూజిక్ మొదలుపెట్టా
పన్నెండేండ్ల వయసులో.. ‘సరిగమప లిటిల్ ఛాంప్స్, పాడుతా తీయగా’ లాంటి రియాలిటీ షోలకి ఆడిషన్స్ ఇచ్చా. కానీ, సెలక్ట్ కాకపోవడంతో డిసప్పాయింట్ అయ్యా. ఒక విధంగా చెప్పాలంటే మ్యూజిక్ని పక్కనపెట్టా. మళ్లీ బీటెక్లో మా సీనియర్తో కలిసి ఒక ఆన్లైన్ మ్యూజిక్ కాంపిటీషన్లో పార్టిసిపేట్ చేసి టాప్–5 వరకు వెళ్లా. అప్పుడు కాన్ఫిడెన్స్ వచ్చింది. కానీ, ఆలోపే బీటెక్ పూర్తయింది. ఉద్యోగం వచ్చింది. కానీ, శాటిస్ఫాక్షన్ లేక మూడేండ్లకే ఉద్యోగం మానేశా. నాకిష్టమైన మాస్టర్ ఆఫ్ డిజైనింగ్లో చేరా. వైజర్సు సుబ్రహ్మణ్యం దగ్గర మ్యూజిక్ క్లాసులో చేరా. కీబోర్డు మళ్లీ మొదలుపెట్టా. కానీ, ఆలోపే కరోనా వల్ల మ్యూజిక్కి బ్రేక్ పడింది. చదువు ఆన్లైన్లోకి వచ్చింది. అప్పుడే సరిగమప ఆడిషన్స్ గురించి టీవీలో చూశా.
ఇదొక అఛీవ్మెంట్గా..
నా ఇరవై ఐదో బర్త్డేకి నాకు నేను స్పెషల్ గిఫ్ట్ ఇచ్చుకోవాలనుకున్నా. ఏదైనా అఛీవ్ చేయాలనుకున్నా. నా ప్యాషన్లో సక్సెస్ అవ్వాలనుకున్నా. ఆ ఆలోచనతోనే సరిగమపకి ఆడిషన్ ఇవ్వాలనుకున్నా. ఆ ప్రయత్నంలో ఇంతకుముందు నేను సెలక్ట్ కాకపోవడానికి కారణాల్ని వెతికి సరిచేసుకున్నా. మునుపటి సీజన్ కంటెస్టెంట్స్ని కలిసి..ఎలాంటి పాటలు సెలక్ట్ చేసుకోవాలి? షోకి వెళ్లాలంటే మ్యూజిక్ పరంగా ఏమేం తెలుసుండాలి? అనేవి అడిగా. అన్నీ ఫలించి కంటెస్టెంట్గా షోలో అడుగుపెట్టా. మొదట మూడు, నాలుగు రౌండ్స్ వరకే నా టార్గెట్ ఉండేది. ఆ తర్వాత మెల్లిగా మ్యూజిక్పై ఇంట్రెస్ట్తో పాటు నా టార్గెట్స్ కూడా పెరుగుతూ వచ్చాయి. దాంతో ఒక పక్క ఆన్లైన్లో డిజైనింగ్ కోర్సులు వింటూనే.. మ్యూజిక్పైనా శ్రద్ధ పెట్టా. ఫస్ట్ రన్నరప్గా నిలవడం అనేది లైఫ్లో ఓ మెమరబుల్ మూమెంట్ నాకు. ఈ విషయంలో ఆడియెన్స్కి, షో జడ్జిలకి, మెంటార్స్కి ముఖ్యంగా మా అమ్మానాన్నలకి థ్యాంక్స్ చెప్పాలి.
సరిగమపలో ఒక ఎపిసోడ్కి మ్యూజిక్ డైరెక్టర్ గోపీ సుందర్ గెస్ట్గా వచ్చారు. సాధారణంగానే పేరున్న మ్యూజిక్ డైరెక్టర్ ముందు పాడాలంటే బెరుకు ఉంటుంది. అలాంటిది ఆయన తన అప్కమింగ్ ప్రాజెక్ట్ కోసం మాలో ఒకర్ని సెలక్ట్ చేస్తారని తెలిశాక అందరిలోనూ టెన్షన్ డబుల్ అయింది. పోటాపోటీగా అందరం పర్ఫార్మెన్స్ఇచ్చాం. ఆయన నా దగ్గరికొచ్చి నా చెయ్యి పట్టుకొని సెలక్ట్ చేసిన మూమెంట్ ఇప్పటికీ నా కళ్లముందే వుంది. ఆయన మాటిచ్చినట్టుగానే.. తను మ్యూజిక్ చేస్తున్న ‘ తెలుసా.. మనసా..’ సినిమా టైటిల్ ట్రాక్ పాడించారు. అలాగే కొన్ని షార్ట్ ఫిల్మ్స్కి పనిచేస్తున్నా. రెహ్మాన్, మణిశర్మ, హ్యారిస్ జయరాజ్ మ్యూజిక్ చాలా యునిక్గా ఉంటుంది. వాళ్ల మ్యూజిక్ డైరెక్షన్లో పాడే అవకాశం వస్తే చాలా హ్యాపీ. అలాగే ఫ్యూచర్లో మ్యూజిక్ డైరెక్టర్గా కూడా ట్రై చేయాలనుకుంటున్నా. వీలైనన్ని మంచి పాటలు పాడాలన్నదే నా గోల్.
::: ఆవుల యమున
