- కండువాలు వేసుకునేందుకు క్యూ కడుతున్న సెకండ్ క్యాడర్
- ఉమ్మడి జిల్లాలో నిత్యం ఎక్కడో ఓ చోట చేరికలు
- లోక్సభ ఎన్నికల వేళ కాంగ్రెస్లో జోష్
నిజామాబాద్, వెలుగు : అసెంబ్లీ ఎన్నికల తర్వాత ఉమ్మడి జిల్లాలో కాంగ్రెస్లోకి వలసలు పెరిగాయి. ఆయా కారణాలతో కాంగ్రెస్ పార్టీని వీడి, వివిధ పార్టీల్లోకి వెళ్లిన వారు ఘర్ వాపసీ బాట పడుతున్నారు. దీంతో ఆ పార్టీలో జోష్నిండుతోంది. సెకండ్ క్యాడర్ లీడర్లు కొందరు ఇప్పటికే కండువాలు ధరించగా, సరైన సమయం కోసం మరికొందరు ఎదురు చూస్తున్నారు. చేరికలతో క్షేత్రస్థాయిలో కాంగ్రెస్ బలం పెరుగుతోంది.
జిల్లాలోని ఆయా నియోజకవర్గాల్లో ప్రతిరోజూ ఎక్కడో ఓ చోట చేరికలు ఉంటున్నాయి. అయితే కాంగ్రెస్ మాత్రం వివాదరహిత నేతలకే వెల్కమ్ చెబుతోంది. బోధన్ఎమ్మెల్యే పొద్దుటూరి సుదర్శన్రెడ్డి ఘర్వాపసీని పర్యవేక్షిస్తున్నారు. చేరికల తేదీల కోసం నేతలు ఆయనతో టచ్లో ఉంటున్నారు.
మున్సిపాలిటీల్లో మారిన సీన్
బోధన్ మున్సిపాలిటీ అనధికారికంగా ఇప్పటికే కాంగ్రెస్ఆధీనంలోకి వచ్చింది. చైర్పర్సన్ తూము పద్మ, ఆమెకు మద్దతుగా ఉన్న మెజార్టీ బీఆర్ఎస్, మజ్లిస్ కౌన్సిలర్లు గులాబీకి కటీఫ్ చెప్పారు. ఆర్మూర్ మున్సిపాలిటీలో కాంగ్రెస్కు అనుకూల వాతావరణం కనిపిస్తోంది. సీఎం రేవంత్రెడ్డి అపాయింట్మెంట్ కోసం 11 మంది కౌన్సిలర్లు ఎదురు చూస్తున్నారు. మున్సిపల్ మాజీ నేత, నందిపేట మండలానికి చెందిన యాక్టీవ్లీడర్ రేపోమాపో కాంగ్రెస్లో చేరడానికి రెడీ అవుతున్నట్లు సమాచారం. కామారెడ్డి మున్సిపాలిటీలో ఇప్పటికే 12 మంది కౌన్సిలర్లు కాంగ్రెస్లో చేరారు.
మాక్లూర్ సింగిల్ విండో లోనూ బీఆర్ఎస్ కు చెందిన ఐదుగురు డైరెక్టర్లు పార్టీకి రిజైన్ చేశారు. బాల్కొండలో మాజీ స్పీకర్, రాజ్యసభ సభ్యుడు సురేశ్రెడ్డి ముఖ్య అనుచరుడు, వేంపల్లి సింగిల్విండో చైర్మన్ జక్క రాజేశ్వర్ కాంగ్రెస్ లోకి తిరిగి వచ్చారు. మరో ముఖ్య నేత కొట్టాల చిన్నారెడ్డి బీఆర్ఎస్ ను వీడి కాంగ్రెస్లో చేరారు.
స్థానిక సంస్థల లీడర్లు..
బోధన్ సెగ్మెంట్లో మాజీ ఎమ్మెల్యే షకీల్ కు కుడిభుజంలా వ్యవహరించిన సాలూర సింగిల్ విండో చైర్మన్ అల్లె జనార్ధన్, పలువురు తాజామాజీ సర్పంచులు, ఎంపీటీసీలు, లోకల్ లీడర్లు బీఆర్ఎస్ను వీడారు. అర్బన్లో మాజీ డిప్యూటీ మేయర్ఫయీం ఎంఐఎం నుంచి కాంగ్రెస్ గూటికి వచ్చారు. రూరల్
నియోజకవర్గంలోని డిచ్పల్లి, ధర్పల్లి, సిరికొండ మండలాలకు చెందిన స్థానిక సంస్థల నేతలు కాంగ్రెస్లో చేరడంతో పార్టీకి అదనపు బలం లభించింది.
కాంగ్రెస్లో చేరికలు
బీర్కూర్ : బీర్కూర్ మండలం రైతునగర్కు చెందిన పలువురు శుక్రవారం కాంగ్రెస్లో చేరారు. పార్టీ నియోజకవర్గ ఇన్చార్జ్ ఏనుగు రవీందర్రెడ్డి వారికి కండువా కప్పి పార్టీలోకి ఆహ్వానించారు. ఈ సందర్భంగా ఏనుగు రవీందర్రెడ్డి మాట్లాడుతూ.. ప్రజలు స్వచ్ఛందంగా కాంగ్రెస్లో చేరుతున్నారన్నారు. నియోజకవర్గ ప్రజల సమస్యల పరిష్కారానికి తన వంతు కృషి చేస్తానన్నారు. మండలాధ్యక్షుడు బోయిని శంకర్, కాంగ్రెస్ లీడర్లు పాల్గొన్నారు.
