భారీ బందోబస్తు మధ్య ముగిసిన సోని అంత్యక్రియలు
తరలివచ్చిన జేపీఎస్లు, ప్రజా సంఘాల కార్యకర్తలు
వరంగల్/నర్సంపేట, వెలుగు : జూనియర్ పంచాయతీ సెక్రటరీ సోని అంత్యక్రియలు శనివారం ఆమె తల్లిగారి ఊరు వరంగల్ జిల్లా నర్సంపేటలో పోలీసుల భారీ బందోబస్తు మధ్య ముగిశాయి. అంత్యక్రియలకు జూనియర్ పంచాయతీ సెక్రటరీలు, వివిధ పార్టీలు, ప్రజా సంఘాల లీడర్లు భారీగా తరలివచ్చారు. బీజేపీ రాష్ట్ర నాయకుడు, మాజీ ఎమ్మెల్యే రేవూరి ప్రకాశ్రెడ్డి, జిల్లా అధ్యక్షుడు కొండేటి శ్రీధర్, ఎడ్ల అశోక్రెడ్డి సోనికి నివాళి అర్పించారు. పాకాల రోడ్ నుంచి ప్రారంభమైన అంతిమయాత్రలో ఎటువంటి అవాంఛనీయ సంఘటనలు జరుగకుండా భారీ బందోబస్తు ఏర్పాటు చేశారు. సోని కుటుంబాన్ని ఆదుకోవాలని జూనియర్ పంచాయతీ సెక్రటరీలు, ప్రజా సంఘాల కార్యకర్తలు పెద్దపెట్టున నినదించారు. మధ్యాహ్నం సమయంలో అంత్యక్రియలు ప్రశాంతంగా ముగిశాయి.
సోనిది ఆత్మహత్యే
ఎమ్మెల్యే పెద్ది సుదర్శన్రెడ్డి జూనియర్ పంచాయతీ సెక్రటరీ బైరు సోనిది ముమ్మాటికీ ఆత్మహత్యేనని స్థానిక ఎమ్మెల్యే పెద్ది సుదర్శన్రెడ్డి వెల్లడించారు. శనివారం ఆయన మీడియాకు ప్రెస్ నోట్ రిలీజ్ చేశారు. సోని ఆత్మహత్యపై ఆమె తండ్రి బైరు శ్రీనివాస్ ఇప్పటికే స్పష్టత ఇచ్చారని చెప్పారు. కొన్ని ప్రతిపక్ష పార్టీలు సోని మరణాన్ని అడ్డం పెట్టుకుని కావాలనే తెలంగాణ ప్రభుత్వాన్ని తప్పుపట్టాలని చూస్తున్నాయని ఆరోపించారు. సోని మరణానికి ఆమె భర్తే కారణమని బాధితురాలి తల్లితండ్రులు పోలీసుస్టేషన్లో ఫిర్యాదు చేశారని తెలిపారు. సోనికి చిన్న పాప ఉందని, ఉన్నత చదువులు చదివించే బాధ్యత తీసుకుంటానని కలెక్టర్ హామీ ఇచ్చారని చెప్పారు. బాధిత కుటుంబంలో ఒకరికి ఔట్ సోర్సింగ్ పద్ధతిలో ఉపాధి కల్పిస్తామని వివరించారు.
