- వరంగల్ కాళోజీ హెల్త్ యూనివర్సిటీ ఎదుట ఉద్యోగుల ఆందోళన
వరంగల్ సిటీ, వెలుగు: వరంగల్ కాళోజీ హెల్త్ యూనివర్సిటీ వీసీ నందకుమార్ తమను వేధిస్తున్నాడని మంగళవారం ఔట్ సోర్సింగ్ కార్మికులు యూనివర్సిటీ ఎదుట ఆందోళనకు దిగారు. తన ఇంట్లో పని చేస్తేనే ఉద్యోగం ఉంటుందని, అప్పటి వరకు జీతం ఇచ్చేది లేదంటూ బెదిరింపులకు దిగుతున్నట్లు బాధితులు వాపోయారు. బాధితులు మాదాసి స్వరూప, బొక్క గణేశ్ మాట్లాడుతూ 2021 నుంచి యూనివర్సిటీలో ఔట్ సోర్సింగ్ పద్ధతిలో పని చేస్తున్నామని తెలిపారు.
జూన్లో ఐదుగురిని అకారణంగా విధుల నుంచి తొలగించారని, హైదరాబాద్లో తన ఇంటి వద్ద పని చేయాలని వీసీ బెదిరిస్తున్నాడని చెప్పారు. తమకు న్యాయం జరగకపోతే యూనివర్శిటీ బిల్డింగ్ పై నుంచి దూకి చనిపోతామన్నారు. ఇంట్లో చిన్న పిల్లలను వదిలి హైదరాబాద్కు వెళ్లి పని చేయలేమని చెప్పారు.
మా ఇంట్లో పనిచేస్తే తప్పేంటి?
గతంలో వరంగల్కు చెందిన వీసీ ఉన్నప్పుడు ఆయన ఇంటి వద్ద ఈ ఉద్యోగులే పని చేశారని, తాను హైదరాబాద్కు చెందిన వాడిని కావడంతో ఉద్యోగులు అక్కడికి రావాల్సి ఉంటుందని వీసీ నందకుమార్ తెలిపారు. ఈ విషయం ఔట్ సోర్సింగ్ ఏజన్సీకి చెప్పామన్నారు. ఉద్యోగులు తన ఇంట్లో పని చేస్తే తప్పేం లేదన్నారు. ఉద్యోగులను అవసరం ఉన్న చోట వాడుకుంటామని, హైదరాబాద్కు వచ్చిన ఉద్యోగులకు జీతాలు పెంచుతామని తెలిపారు.
